مشكله لما يكون العرف طغى على الجانب الديني في مسألة كهذه .

أخوي أنت ما سويت شي غلط . موافقة أهلك على زوجتك ماله دخل ببرك لهم لأنها من خصوصياتك كرجل وفي الاخير ياما شفنا ضرائر في البداية ما يدانوا بعض وبعد ما انحطوا في الأمر الواقع قدهم شله .

أنت قد كلمت أبوك وأخوانك إذا ما رضوا يروحوا معك أقترح عليك تروح عند شيخ القبيلة وتدق باب المجلس . لاتشرب لا قهوه ولا تأكل شي وقوله : خالي لك ولا للذيب !!! إذا قال يهبا الذيب قوله تكفى يا ولد فلان أبغاك تكلم أبوي يروح معنا نخطب فلانه بنت فلان على سنة الله ورسوله وإذا ما قبل اضمن لي إنك بتروح معي نخطبها من أبوها .

يا ولد أبوك بيروح معكم وإذا ما راح روح مع الشيخ واخطب .

إذا قبلوا بك كزوج ياحي الله بذيك السنين اللي بتعوض ما فات وإذا ما وافقوا تكون كفيت ووفيت وجبت معك لحية غانمه يخطب لك ودقيت الباب.

إذا توجه لك عمك وقال وش يضمن بنتي وكذا : قوله هي عيني ولك عهد الله إني لها سند وذخر وأنا رجال بار بأهلي يا شيخ لكن الأيام حدتني أجيك كذا وأنا شاري بنتكم وأبغاك تصير عمي من بين كل المخاليق .

يا أخوي أنا ما أحب أوقف مع العشاق صراحة لكن إذا قد لك عشر سنين والقلب على هالموال لو ما حد قبل يروح معك وصل الموضوع حتى عند أمير منطقتكم وأنخيه .

إذا معد حد وقف معك لك حلين .

يا ترجع تخطب بروحك بين فترة وفترة يا تلجم زمام الأمور لأن لو البنت تزوجت وأنت على هالموال الله يعينك أخاف تكون مجنون ليلى الجديد.

يا ولد 10 سنين ثقيلة على قلب الرجال وهو أسير العشق.

الله يكلل جهودكم بالزواج ويرزقك 10 رجال أشاوس كلما زعلت من حد منهم تقوله يا ولد أبوك عشر سنين متعذب عشان يجيبك للدنيا قم صب قهوه الله لا يخلك تحب بنت 10 سنين وأمك تسمع.

الله يعينك
قبل فترة شفت في هذا القسم موضوع
مشابه لموضوعك اقصد لقصتك …
الحل ان لم تكن ذا وظيفة او دخل مادي
مستقل وتستطيع الزواج بها والعيش في
مدينة اخرى بعيدة عن اهلك ..
فأنصحك بالرضى بما هو قائم والاستسلام
لواقعك ..
انا اتصور لو تتزوج اي بنت اخرى فأن اهلك
سوف يتدخلون في حياتك الخاصة ..