يوم انا بين القطيعه والوصال
أنثر آمالي على كبد الوجل

من ضماي اسمع سواليف الظلال
واحسد اللي من مواريده نهل

كم سحاب اخيل عن رجواي مال
وكم سراب ألفيه لاجيته ذهل

لو تعد الريح لهموم الرمال
مايصوغ الهم في جوفي مثل

مختلف ظني وفيني ضيق بال
لو تحركني تفرقع بي جبل

ناج البحر ( في رحلتك ) ياهجسي الطارف
لعلّ منه ( ألقى الرجا و) اتفيض ديمومه

لين ايتصاعد ( فالسما لك ) قطْره التارف
ثم يتكاثف ( من هوى في)جوف مركومه

كان انعزل ( عن صورته ) مملوحه الهارف
عن عذبه الي ( شيمته كم ) تروي احزومه

ثم ارتخى ( نجل النقا ) لك غيثه الذارف
أشرب حيا ( لامن همل )وانشد عن علومه

واحذر تضيع ( إليا حدرت ) ابموجه الجارف
لاهاج ماتقدر على ( هوجه ولا ) عومه

حاول تبرر ( رحلتك في )جهدك الشارف
من قبل تِسْكن ( فاعلاتن ) فيه مجزومه

ان غصت جوفه ( حضرتك لك )غوصة العارف
تلقى الجواهر( كامنه في ) جوف كظلومه

ارقى مع التَّيار( ياصاعد و ) متحارف
والادمي ( من عصمته ) يرضيه مقسومه

( ياصاحبي ) لوكنت من عمق البحر غارف
ما تلتفت ( لجل الوفا ) للقوس واسهومه

للصيرفي ( سوق الجنا ) في عملتك صارف
مايبخسك ( في عملتك ) لاجيت في سومه

لوكان همي ( صرفته في ) داخلي سارف
ما تنصفه ( يوم أكتبه ) بالقاف منظومه

ماجيت لعذوق التمر ( من نخلتي ) خارف
لولا الغلا ( ماشفتني ) والشوق واسلومه

يابحر ( أنا خفّيت )لجلك حزني الظارف
( في سيرتي )خبّيت وجهه عنك بكمومه

حاولت لكن ( للصدى مع )بابي الدارف
في درفتينه ( صيحتين بـ ) همس مصرومه

صريره اللي ( من دويّه ) يزعج المارف
عند المرافي ( والمواني ) ضاعت احلومه

كيف النجا ( لا صاحبي ) في همي الطارف
يوم انهمل ( ياصاحبي ) من عين ديمومه؟!

في رحلة النسيان، يامن رحلها
كظلوم ليل لساري الدرب حالك

الديره اللي ضيف بالك نزلها
ماهي ورى ظهرك ولاهي قبالك

أرفق بنفسك قبل ياتيك اجلها
لايِفْزِعك لاقمت ضافي ظلالك

أربط يقينك لين تقطف نفلها
تضفي بشمسك من تمنى زوالك

وليا وصلت لغايتك تحتفلها
بعد الَّلتَيَّا وَالَّتِي طاب فالك

سعيد من نفسه تدارك زعلها
يوم انجرف خلف الغضب كل هالك