قالت الشاعرة/ احلام عابره.
تعال المس القلب تراه ........ تعبان
تبعثر النبض وغير الدم...... مجراه

من غبت وهو على شوفتك.. ولهان
والروح من حزنها تصيح ..... ويلاه

لك مكانه بالنفس ما يرتقيلها انسان
يسألوني عنك وترد الحواس .اهواه

يالي وجودك على الخفوق ...سلطان
وحدك الي كل مافيني ........ يتمناه

لواقول إن غلاك يسري بدم الشريان
لاوالله هاذ الشعور من سنين تعديناه

ولو قلت غيابك يشعل بالقلب .نيران
والفكر من صدودك هج مني ....وتاه

وصفك بحرفي تعدى كل ذا.يا فلان
انت احساس تغلغل بقلبي .واحتواه
الشاعرة/ احلام عابره.
========================
. <{ سلامة قلبك }> .
احلام سلامة قلبك من قيلت تعبان
ياليتني اعرف حبيبك واتكلم معاه

واجيبه يمك باللين وإلا بالعنفوان
وسَكِّنْ روح تصيح من العناء ويلاه

ومادام له مكانة بالنفس ليه زعلان
اليا اسألوك عنه رد احساسك يهواه

لكان وجوده على خافوقك سلطان
وهو الوحيد اللي كل مافيك يتمناه

حس يامن غلاك سرى بدم الشريان
وترفق بغالي غيرك ما يحلم بغلاه

إلى متى وأنت تشعل بالقلب نيران
يا داله ولا همك سهم منك قد رماه

اسرع وارجع قبل آخذ منها عنوان
اجيبك لها بقوة حرب ما تقدر علاه

والعذر والسموحة لهاضت القيفان
وتلاطم موج البحر يرقص للمعاناه

احساس شاعر كود يخفف الأحزان
لأجل يعتدل النبض و الدم فمجراه

وأختنا في الله تكرم لله ولا تهان
ومن حاول يؤذيها منا يلقى جزاه
الشاعر/ حمد بن فهد المخالده السبيعي

أخي الكريم الغالي النسيم المسافر اسعدك الله في الدارين الدنيا واﻵخرة وحفظك الله في السر والعلن دين ودنيا وآخرة اسعدني مرورك الأروع والأجمل يسعدك ربي سعادة لا حد لها.
أخوك / حمدفهد

أختي الكريمة الغالية احلام عابره ربي يزيدك إحترام وتقدير في قلوب كل البشر.
صح بدنك مدد بلا عدد يحفظك ربي دين ودنيا وآخرة اسعدني مرورك الأروع والأجمل يسعدك ربي سعادة لا حد لها في الحل والترحال وفي كل مكان وزمان اتمنى لك السعادة ماحييتي اللهم آمين.
أخوك / حمدفهد