‏جنّبني الليلة اللي في طرفها ملام
ماهوبـ من قوها من قو تأثيرها

ماخفت اراضيك خايف دمعتين اتّهام
ما يذبل مْن الدموع الا معاذيرها

تزعلني النظرة اللي ما تقل اهتمام
عن غصنها اللي تبرّا من عصافيرها

المسك ماهو ختام المسك ماهو ختام
انت اول ايّام عمري يا مقاديرها

ارفع مقام الهوى ياللي مقامك مقام
مافيه حاجه تصير ومنت بـ تصيرها

احفظني مْن الضما والجوع والانقسام
يبكيني مْن الصور تاريخ تصويرها

بيني وبينك قصيدة لو يخون الكلام
ما ضاع قدر الحروف وضاع تقديرها

ماني من اللي عثا بين الشعر والغرام
انا اصدق اعذارك اللي طال تبريرها

الحب وجهـه وامان ومغفرة واحترام
ويعوّضك خيرها عن سو تدبيرها

جرّدني مْن انتظارك لا ينوح الحمام
هي فرصة العمر لذّتها بـ تأخيرها

مرّت ثلاثين عمري بين ذنب وسلام
مرّت وانا شرّها مرّت وانا خيرها

ما يزعج من الكرام الا مرور الكرام
والدار من طيبها طابوا مساييرها .
لـ أحمد البحّا