شقيقتي ..اختي الوحيده لهامنزله كبيره في قلبي متزوجه وتقيم في
منطقه اخرى تزورنا من حين لاخر وفي العطل والمناسبات وفي احد العطل
اقامت عندنا عدة ايام اعتادت في كل يوم تصحو باكرا وتجهز القهوه
وتنتظرني انزل اتقهوى معها ونسولف..... انتهت الاجازه
وسافرت ... واول يوم بعد سفرها نزلت كالعاده.... فلم اجدها! فخرت
من عيني الدمعه ...ومعها هذه المشاعر!

يامساء الصبح... صبح المساء وينه؟
جيت اتهيل دلاله صباح.. ولا تهيالي

جيت اتقهوى فناجيله واقدع تمرتينه
واشب ضوالسوالف مع طيب الفالي

جيت ولا لقيت اللي له القلب معنينه
الدار قفرا... ومجلسي من الغلا خالي

خرت من عيني دمعة... تسقي مدينه
يوم شفت الحزن بان بعيون فنجالي

جيت اشم الهيل باقي... في مواعينه
جيت اتفقد الدله الي ماكن لها والي

مهجورة ...عقب ماهي حبيبة يدينه
كانها تصد عني ماكنها ماتبي قبالي

تسال عن وليف الصبح وينه.. وينه
لك الله... يالدله الي كن حالها حالي

معذور لوبكى قلبي... فراق غالينه
معذورلوشلت القصيد وغنيت موالي

من دونك... يقصر قصيد تستحقيته
يا تاج راسي... الي تعلاعلى عقالي

ياهدية امي وابوي... الغاليه يالثمينه
ياشقيقة الروح والنفس ياظلي ياظلالي

سلمت يمين عودتني على مدة يمينه
تسوق لي الفنجال مر... وينقلب حالي

كل صبح اكحل عيني من سنا عينه
الى لمحت النورفي جبينه وتجلى لي

ياثقل دم الفراق... ويقطع الله سنينه
يذبح الغالي... لاغاب عنه... الغالي

الصبح في عيني مسا... والنورطا فينه
غاب صبح المسا وفقدت شمسي وظلالي

محمدعبدالعزيز