يارب رد الي مضى وايامي البيض الملاح
قبل الفؤاد يذوبه حر الزمان ويقهره

يا كم مره ضاق بالي واثرها الدعوه مزاح
ويا كم مره اتغابى والامور مفسره

وجيه مافيها حياء وعقول ما فيها فلاح
واجب علي البعد عنها دام باقي مقدره

ما عاد باقي في نفوس البعض ذره من صلاح
ولا عاد ادور لي صديقٍ باللوازم اذخره

ولاني بطامع في يدين الوقت واعرفها شحاح
ولا عاد في ظل الخيال اعيش وقتي واهدره

وما عاد يغريني فرح ماعاد يفزعني صياح
وحتى الزمن لا حدني ماعاد سيفي اشهره

اول صمودي كالجبل ماحركه عصف الرياح
واليوم نسمات الهوى يمكن تمر وتكسره

ويمكن يتعبك الزمن وتعيف موضوع الكفاح
وتعيش في غربة وهم ماغير ليلك تسهره

وتضحك على ظلم السنين لو كان مابك ارتياح
وتكتم شعورك بالعنى في داخلك ما تظهره

احر من وقع السيوف واشد من طعن الرماح
لا صار فيك الهم باين وانت صامل تنكره

وجتك الجروح الغابره تفزع مع جداد الجراح
همٍ مسك حبل الوريد وهمٍ آخر ينحره

يارب من شح السنين طالبك مده وانشراح
انت المغيث الي بفضلك كل قاعٍ تزهره

( عماد محمد الرشيدي )