يا سحابة قابلتني على شط البحر

البحر مالح وهي تحمل الماء القراح

مر تشبعنا ضمأ و مر تغدقنا مطر

برقها نوره لمع ما معه رعد ورياح

المطرينزل خصوصي على نوع البشر

خيرها من طيبها يحيي الأرض البراح

الربيع

هذا الصباح اللي بدأ حر وغبار
ينقصه من وبل المراديف همال
يا الله بليلٍ والمطر فيه سبار
كن السحاب ايعانق الأرض شلال
وايزين في الصحراء حكاية و مسيار
ونقضي فرحنا بين راحة و تجوال
بين الغصون أللي نمت توها اصغار
و بين الزهور و بين جلسة و موال
ساعات نمشي بين وردات و أثمار
و ساعة نشرف في نقى عالي الجال

الربيع

ساقتني الذكرى على ذيك الأيام
وابحرت في ذكرى الليالي القديمه

يوم عمري دون خمسة عشر عام
والنفس من كثر المشاكل سليمه

ماكنت أخاوي الليل والعالم نيام
كن السهر عندي من اكبر جريمه

ماكنت أعاني هم وجروح واوهام
كن المشاعر من خفوقي عديمه

أقوم من صوت المؤذن ليا قام
مرتاح مع شوف الصباح ونسيمه

اكبر طموحي ألبس شماغ بسام
واروح به لصارت أقرب عزيمه

وعلى تراب الأرض بالعود رسام
رسم الطفوله والقلوب السليمه

واليوم دار الوقت وبالوقت منظام
شفت العجايب بالليالي العظيمه

شفت القرايب تزرع أشواك وألغام
وعلاقة الجيران ماهي حميمه

ماتت مابين الناس وصلٍ بالارحام
والاخو صار أخوه ضد وخصيمه

والكذب شاع وراعي الصدق ظلام
وكثر الكلام وكثر هرج الشتيمه

إن كرهوك حطو خطاك كنه ادهام
ولامن بغوك أبدو قلوب رحيمه

حتى اللي بقبره غدا جسمه عظام
ماسلم من قول القفى و النميمه

ماشفت بينته على رووس الاقلام
والعمر يمضي والليالي مقيمه

العمر محدود وتال العمر خام
ويارب تجعل خاتمتنا كريمة ...

منقول