وردةٍ نبْتت على صدر الغمام من العذوبة
غصنه الاستبرق ورقة ورقها سندسيّة

تاخذ من الشمس روح الصبح وترتل غروبه
وان غشاه الليل قالت شاعري سولف عليّه

عن شعور الوصل يوم يبل ديم الهجر ثوبه
كيف جف الحلم دام العزم سيله عقربيّة

قلت جرحٍ نوجسه لو كان في شرحه صعوبة
لكن السجّة علاجه لو كفوفه حاتميّة

والظلام يعيش وسط النور ياكل من ذنوبه
ما على روحك ملام ولا على مثلي خطيّة

ماني بشاكي عليك الجرح يا خلّي
في غفلة النور كلٍ نام بجروحه
وش يدري النار عن حزن الفراش اللّي
ياما على جالها هام و رمى روحه
تحرقني الشمس و افرش فالثرى ظلّي
لومي عليك انت ، نار الشمس مسموحة
تركت قلبي معاك و لا انتبه كلّي
لا تضمن أن الجدار بيفقد اللوحة
قوم افتح الريح لأبواب العتب ، خلّي
حزني يهب أوضحه و يبرر وضوحه
صادق مثل دعوة أُم و نيّة مْصلّي
غارق مثل قلب صبّ و عين مجروحة
الدمعة اللي ورا توديعها " ذلّي "
لا هي بمستورة و لا هي بمفضوحة