قالت قصيدك ليل سود معانيه
رويانةٍ بالدمع وامدادها دم

الى متى ياشاعر الهم تخفيه
والى متى تطوي ضلوعك على هم

قلت البكا صعب عليّه وانا ابيه
لا واهني اللي بكى وما تندم

لي عبرة يلعبها الحزن والتيه
ولي صرخة وعجزت ابا القا لها فم

لا ماكتبت الشعر لحدٍ بسليه
ولا نيب مداحٍ ولا با اترنم

احساس لا أبيعه ولا نيب شاريه
مر يجي شهد ومرات علقم

الى لمحتي دم جوفي اف خليه
على الورق لاصار روحك تألم

قلت الشعر يوم ان لي حاجة فيه
وحزين انا .. الى متى .. الله يعلم