ان شاء الله خير
النقل لمكان تاني
هو برضه تبعنا بس فيه مميزات عن السابق و برضه له عيوب بس انا شايفة الوقت المميزات اكتر هههه
العيوب عارفاها بس مش هافكر فيها الوقت

مش عارفة افرح و لا ازعل و مش عارفة اذا كان ده في خير او لا او هيكون تغيير للأفضل او العكس
بس مجرد احساس اني هابعد عن المشاكل اللي هناك حسيت بالارتياح
حتى لو المكان الجديد هيكون ليه مشاكله برضه لكن اهو تغيير يارب يكون للأحسن

اللي فرحني ان المكان قريب و مش هتعب في المرواح و المجي
اللي ضايقني انه حصل بسرعة و بشكل مفاجئ و اللي عمل كده كان مفكر اني هتضايق ميعرفش ان ده من مصلحتي و هرتاح و لو شوية

الصبح ان شاء الله هاروح تمم النقل و الحاجات الادارية دي اللي مبفهمش فيها

ان شاء الله يكون خير و راحة ليا
اللهم آمين

الحمد لله

اكتر شيء عجبني ان الناس فاهمة الشخصية صح
و عارفين مين بيحب يوقع بين الناس و ينقل كلام غلط

للأسف لما يكون المدير او المسئول كده اكيد دي مشكلة كبيرة
هو ماشي بمبدأ فرق تسد يعني مستعد يقلب كل شيء و يوقع بين الناس و يغلط في ده و دي و ينقل كلام غلط عشان مصلحته أو و الله مش عارفة عشان ايه ده تقريبا مرض 😂
لكن الحمد لله ان بقى الناس فاهمينه و فاهمين دماغه و هدفه


بقى مكشوف اوي
هههههه احلى شيء لما يتكلم و يلبخ بالكلام و انا و زميلاتي قاعدين نبص لبعض و نضحك من كلامه اللي فاهمين سببه

المهم محاولة لإحداث وقيعة في مكان عملي الجديد بيني و بين زميلاتي الموجودين فيه من مديرنا اللي هو نفسه مديري بالشغل اللي اتنقلت منه بسي الجميل أنهم فاهمين و عارفيني كويس
لدرجة أن واحدة قالتلي الحمد لله انك انتي اللي اتنقلتي عندنا مش حد تاني

و ده خلاني مبسوطة انهم فاهمين و عارفيني مين الكويس و مين اللي بيحاول يوقع

المهم اول يوم كان كويس و فيه تفاهم
لكن لازم يكون فيه شيء يضايق بالموضوع و الشيء ده كان المدير او القائد

بمناسبة الكلام عن القائد

كنت حضرت من كام سنة كده تبع الشغل دورة تدريبية في التنمية البشرية
كانت عن مهارات القائد و صفاته كان مدتها 3 أيام
استفدت منها منكرش
لكن صراحة كل اللي اخدناه فيها ملهاش اي علاقة باللي بنشوفه و بنتعرض في الشغل و عن القائد و صفاته طبعا ملهاش اي علاقة بواقع شغلنا
صراحة مفيش اي حاجة من الصفات دي تنطبق عليه

لكن اللي قبله كان شخص رائع و محترم فعلا و معظم صفات القائد تنطبق عليه و كان بيعاملنا كلنا زي أولاده و في نفس الوقت كان حازم في الشغل و لكن عمره ما أذى حد بيشتغل معاه أو يعني تحت إدارته على العكس كان بيتحمل المسئولية و بيقف معانا في اي مشكلة تخص الشغل لكنه طلع معاش و من بعده و احنا مش مرتاحين في الشغل و مع الحالي

ربنا يعطي كل واحد على قد نيته

صراحة دعوة جميلة و مريحة جدا بالنسبة لي
سواء الكلام عن نفسي او عن غيري

و كل شخص عارف نفسه و نيته ايه
و الأحسن ان ربنا اللي عالم بكل اللي جوانا

المهم

الحمد لله لغاية الوقت مرتاحة خاصة قرب المكان ..مبقاش فيه تعب المشوار و البهدلة الناتجة عن بعض الاشياء
اما طبعا الحلو ميكملش كالعادة
بسبب استمرار محاولة نشر المشاكل و توقيع بين الناس
و للأسف من الشخص المسئول
يارب بس يبعد شره عننا

جمعة مباركة على الجميع