هذه القصيدة من بعض ردودي على قصيدة أخي وحبيبي شاعر المنتدى ـ نجم ضاوي من خلال مجاراتي له في قصيدته ،،ألم،، نسّقتها كسابقتها وأقمنا بعض من الوزن ، وتصرفت ببعض المفردات ـ أرجو أن تنال أعجابكم .

ابشر وانا لك جاهز وافي الــكــيــل ** بالـلـي تـريـده يالـلـي ينخى خـويّـه
ان كانها بالجاه جوك الـرجــاجــيــل ** وان كــانــهــا بـالـمــــال كلي هدية
وان كانها بالشوف حنا الـمـثـاقـيــل ** تــشــوفــهــا يـالــقــرم نـذر عـلـيّـه
اللي خذت قلبك وخلتك مـهـيـبـيـل ** تشوفها ولو عــاضــبــت بـضـحـويــّة
نسري لها يا سيدي تــالــي اللـيل ** عداتنا الــهــجــــــــــاد في كل هيّة
بس اثبت انك فارس تركب الـخـيـل ** ما تـنـتـظـر راي الــعــجــوز الـبـلـيّـة
ولا تدرّج معيه ثــم تشكي الـحـيـل ** ولا تـقـول عـلـومــي ما هي كــذيّـة
هذي فرصتك اليوم قبل الــمـقـابيل ** قبل نـســافــــــــر يم ديـــــار العذية
انا نويت اشوف زين الــتــمــاثــيــل ** ان شفتها ما عــــــــــاد تطري عليه
في قربها يا خوي نرســـــل مواويل ** يطرب لها من عـشـقـتـه غشـمريـة
عجل علينا كان حــبــك لـهـا حـيـل ** عــجــل عـلـيـنـا وحــدد الـدار لــيّـــه
تشكي لمثلك شاف كل الـبـهاذيل ** ودمــــــــــــــوع عينه تقل وبل برديـّة
من ظرف وقتي يا صديقي تـهـاويل ** ما من صــديق بالـلــــــــــوازم حذيّـة
قلّت يا بو ضاوي علوم الرجـاجــيـل ** وصــارت علينا يالــســنــافــي بـلـيّـة
يا شين وقتي كانـه اقبل بي الليل ** تقفل على صـدري ديـــــــــــار فضية
ولا ذبــحــنــي غــيــر كــثر التنابيل ** اهل الــســوالــــــــف والعلوم الرديّة
يالقرم انا ودي اشـوفـك مـع الخيل ** نبي انــتــطــارد بالفضى لـنـا شـوية
ونوسع المضمار لـمـطـول الــذيـــل ** للي تــجــرّه خـلـفـهـا جــرهـــديّــــة
تلقى الوصــايف يرفعنه زمــامــيــل ** يخشى على الشيخــة تطيح بهبـيّة
يمكن يجي معهم حسين التماثيل ** اللي بـشـوفــــــــــــه لك حياة هنية
يمكن تشوفه وفي يدينك مـنـاديـل ** من النوع اللي عطيته بعرسه هديّـة
والكل منكم يشتكي حــالــه وحيل ** وتقعد تفضفض مع ســـــــلام وتحيّة
ويا سعد يومي يوم نسمع مواويـل ** من بينكم عجّت اصـــــــــوات شجيّة
يالذيب قلّي وينه بام الـمــخـالـيـل ** والا مــــع الــفــطّــر او سنّ الثــنـيّــة
يا صاحبي اشرح لي كـل التفاصيل ** وانا معك بالروح وكــــــــــــــل الهويّة
اعـــــــواك يعذبني وزود الـمـواويـل ** ما كنّك الا ذيـــــــــــــــــب ذب الثنيّة
يرجي عشاه ويقنب بـتـالــي الليل ** ويخشى من اللي ينقل الـبـنـدقـيـة
عذبتني بـعـواك يا نـافـــل الـجـيـل ** عـجـل عـلـيّـه ويـــنــه عـجـل عـلـيّـه
واجيك انا يا صاحبي باول الـخــيـل ** والـوايــلــي ما قــالـــوا ينسى خويّـه
امـا تجي معنا براس الـمـحـاصـيـل ** والا تـــــروح الــــروح لاجـلـك ضـحـيّـة

القارظ العنزي