اخوي عزوز ،، بنظري الي يغير شكله او طريقة كلامه او يبدل أي حقيقة تخصه هو الحاله ، مثل (وظيفته او عمره ) او اي شيء شخصي عشان الاخرين ، هذا انسان ناقص عقل وعلم وناقص شخصية !
المفروض الواحد ماعليه من الناس كيف يشوفونه المهم هو وش يشوف نفسه !
كثيرين أعرفهم نفس النوعيه الي قلت لا وزد عليهم الي يطق أبر ( مسرطنه وتتسبب العقم ) عشان ينتفخ ويصير عضلات ويتباهى قدام الناس !!
ونوعيات كثيره تسوي أشياء ماتتواكب مع عاداتهم ولا تقاليدهم ولا حتى قناعاتهم ، صحيح انه كذا حقق مزاعمه الساذجه !
ولكن وش دفع مقابلها وهي وهم حتى هو في قرارة نفسه يشوف انه " خربها " ، ضحى بنفسه بشخصيته واحيان بصحته !!
إستحالة تقوم أي حضاره ماتتناسب مع البيئة الي انولدت فيها ، يعني مستحيل تشيل حياة الفرنسيين او البرازيليين وتجي تنزلها زي ماهي على مجتمعنا ، فيه اختلاف ديني ثقافي وحتى لغوي !
اما هذولا الي يتقمصون شخصيات غيرهم وأحيان ( الجنس الآخر ) تحت داعي التطور والحرية هم ناس مساكين ضايعين ، القروي الأمي صاحب المبدأ هو اكثر حضارة وثقافة وأكثر إيجابيه ومنفعه للمجتمع من هالي يدعي التمدن والانفتاح !
كل شيء له حدود وقيود وعلى ماقيل ( الرجال مخابر ماهم مناظر ) ، واذا على الأمة والبلاد فهي بخير بدونهم ، هم أشبه مايكونون بالعضو المصاب " بالغرغرينه" الأولى بتره قبل ماينتشر !
وختاما اسمحلي الخصلك مشكلة هذولا ببيت شعر أظنه للمتنبي الا وهو :
( لكل داء دواء يستطب به .... الا الحماقة أعيت من يداويها )
اخوي اسمحلي اذا ماعطيت الموضوع حقه بالرد هذا ، انت ماقصرت تكلمت عن المشكله بالتفصيل ، لكن انا بصراحه تنرفزني مثل هالمواضيع ، وانا ما أصلح اقول رايي وانا منفلت مايمسكني ولا إبليس نفسه ، وطرحك وتعبك وحماسك واهدافك النبيلة يستحقون ارقى من رأي مشحون و متفلت !
وعموما بحاول اعوض النقص الي بردي بتقييم ، ولايكفيك !
واصل الضرب على وتر مجتمعنا الحساس ولاتوقف