__
نداري الحانا عن خطا الالسنه والعيب
ونسعى على ما يستر الوجه ويصونه
دروب المراجل كايده ، والمقام اصعيب
ولا كل رجالٍ ، مراجله مضمونه
الاقوال تبغي فعل والفعل يبغي ذيب
صبيٍ تشوف الطيب في نظرة عيونه
الاخلاق وهبه ، والمراجل ماهي بتغيب
معا واحدٍ يمناه ماهي بملعونه
نعرف الرخاوي فالرخا قبل مس الجيب
ونعرف الشديد ف شدّة الوقت واطعونه
ونعرف المراسل فالرياجيل ود وجيب
ونعرف الثقيل اللي معانيه موزونه
ونعرف نتغاضى عن كلامٍ ماهو بمصيب
ونعرف انتقاضى في كلامٍ يقولونه
ولايوجع الا الظن في واحدٍ ويخيب
والى خابت ظنونك لا تشره على ظنونه
ولا أخير من كثر التشرّه ، سوى الترحيب
وتبسّامتك في وجه .. من باح مكنونه
لو انحاسب العالم على مجريات الغيب
ما يبقى لنا صاحب ، على ما يسوونه
اخذ ما يزيدك جاه من دون شك وريب
الارزاق مضمونه ، والاسرار مدفونه |