أحبتي ..
لاحظت ان النقاشات والحوارات صارت زي شفرة الموس ، ياتجرح هذا ياتجرح هذاك مع أن الأمر والله ليّن وهيّن زي الأسفنجة !!
عموماً نظام أن لم تكن معي فأنت ضــدي هذا مايمشي في النقاشات والحوارات الهادفة او ع الأقل الواعية ، هي الدعوى رأي ورأي آخر ، المسأله بسيطة جدا أبسط من شرب الماء ، شخصنة الأمور ومعاداة الطرف الثاني ومعاملته على انه هو تافه وجاهل واني انا الفاهم الواعي ،ووالله هذا مايدل الا على تفاهة الي يفكر كذا وجهله !
حتى قالوها بدونا وهم بالصحراء ولا يقرون ولا يكتبون ولا يعرفون شيء ، غير الطعوس والحلال ، قالوا :
مايحقّر الرجال إلا الردي
طبعاً هالكلام والله ما اقصد فيه أي شخص بالنفس ، لكن ملاحظه عامه اشوفها كثير ، وخاصة تويتر ادخل اي نقاش تلقا ذا يكفر وذا يدعشن هذا وهذا يصف هذا بداعي الضلال والعاشر مدري ايش… .اااالخ !
وهالأمر ما لاحظته الا بأقل من سنه ، ماكنا متحزبين كذا ولا كنا معادين لبعضنا إلى هالدرجة أصلاً ، مدري وش وصلنا لكذا هل هي فتنة خارجية والا اختلافات قناعاتنا والا أسباب كثيره اجهلها !
بصراحة وضعنا من كثر مانشد فيه أنقطع ، بدال ماكنا كلنا ماسكين بخرقه وحده هذا يشد اشوي وذا يرخي اشوي ، مع الاسف صار كل واحد بجهه مخندق ضد أخوه
كلام من الخاطر والله من قلب متقطع الف قطعه من القهر