قبــل فتــرة وقت مآكنت أتكلم عن العروبة بردودي وفي موضوع أو أثنين ، وقت مآكنت مزعجكم فيها إزعاج !
بعد ماوصلنا لمرحلة مابعد داعش ، وبعد مرحلة إن لم تكن معي فأنت ضدي ، والحروب القايمه وللاسف بيننا ووصلت والعياذ بالله للإخراج من الملّة وكأن الله وكلنا على عباده وصار المطوّع او الشيخ يكفر هذا وهذا الليبرالي او الي هو من الجهة الثانيه يتهم هالمطوع او الشيخ بالغلو او أته داعي لضلال او داعي جهنم… الخ ، وكل الي شرحته بردي الي قبل هذا !
المهم فكرت مع نفسي وزعمت أني لقيتلي حل وأخيراً ، بحكم أن الدين ولاحول ولا قوة الا بالله صار لعبة بيد هذا وذاك ، وصارت الحرب والتحزب تحت اسم الدين لا هذا ولا هذا !
فكرت وش ممكن نجتمع عليه لاصار الدين هو مشكلتنا هالحين هو درعنا يحمينا من بعضنا وهو سلاحنا الي نحارب بعضنا فيه ، فصعبه توقف بين الحزبين في وضع مشحون لدرجة ان الحياد ممنوع ، وصعبه كل واحد منهم يتلقاك من جهة !
طرت فكرة العروبة ، بحياتي ماكنت اكتب وادافع مستميت عنها كذا لدرجة أني احاول أرجع لما قبل الإسلام ، فقلت كلنا عرب ومافيه شيء نختلف فيه بعروبتنا مافيه لانصوص ولا اختلاف علماء ولاشيء ، يعني شيء كلنا متفقين عليه ونفخر بأصالته وتاريخه وسمعته وكذلك قيمه ومبادئه الي ورثناها من يعرب وقحطان حتى نقلتلكم قصايدهم وفيها وصاياهم قبل وفاتهم رحمهم الله فكنت متوقع مئة بالمئة ع الأقل في عرقيتنا بنتفق ، ع الأقل الدم يحن وكذلك التاريخ شاهد وبنفس الوقت العادات والتقاليد الحميدة الي بدت مع يعرب ولازالت ماشيه إلى اولادنا !
بالإضافة إلى إن كل مره يصير ديننا ضعيف يكونون العرب وقتها متفرقين ونعارات واختلافات بينهم ، والعكس صحيح كل مره يصير فيها الاسلام قوي يكونون العرب متفقين ويد وحده وقلوبهم على بعض !
فتوقعت كل هالمؤهلات ممكن ترجح كفة الفكرة ولو ع الأقل بين العدد القليل الي إطلع على ماكتبت سواء هنا او في تويتر ، يعني لو هالعشره عشرين نجحت معهم الفكره ولاراح أوصل أكثر منهم ، لكن ع الأقل يكون الواحد عنده أمل انه في شيء يجمعنا بدون مانختلف ع الاقل !
لكن ماش دخلنا بأمور وسوالف حنا بغنى عنها ، ودخلنا بتشكيكات وأمور الله أعلمبها ، مع أني اشوف حتى هالتشكيكات والإختلافات والاسئلة سهله وبسيطة نقدر نتجاوزها ولها أجوبتها ، لكن لازم أول وقبل أي شيء يكون عندي دافع البحث عن الجواب والإقتناع فيه ، ثاني شيء اخطاء الماضي هي من الماضي لانوقف عند فترة معينه ونفرش عيوبها وبلاويها ونفصلها ونقول هاه هذا تارييخنا خلاص ابوجهل والي كانوا يعبدون اصنام راحوا وولا زمانهم والواحد من عشرة الي كانوا يئدون البنات راحوا وولوا والي يشربون الخمر ويورثون الميت بزوجته كلهم راحو وولوا وكلهم بفترة معينة جاء فيها الرسول صلى الله عليه وسلم وعدلها ، قبلها كانوا على دين ابراهيم واسماعيل عليهما السلام ، ركز بالزين وخل الشين ، شف صلة الرحم الاخلاق وغيرها الصفات الي من يعرب باديه الى يومنا هذا ولا تغيرت !
غير كذا دخلت بسالفة القبايل والعنصرية وظنوا كثيرين اني ألمح أو اصرح فيها ، والي خلاهم يشكون اني أدعوا للقبليَّة هو اني قلت ( ابونا يعرب بن قحطان ) حتى أن البعض يظن أني جالس اتفاخر بقحطان قبيلتي ؟؟ ،، مع اني والله ثم والله لاني قحطاني ولاني حولهم ولا جت هالسالفه براسي أصلاً ، لكن عشان تعرفون لأي درجة صرنا نتصيد على بعضنا !!
طبعاً كلكم تعرفون ( عدنان و قحطان ) وسالفة عرب بائدة وعرب عاربة وعرب مستعربة ، وهالسوالف فيها إختلاف كبير يعني كل واحد عنده دليل على رايه !
المهم أنا وقفت على راي يقول ( سميت العرب بهذا الإسم على يعرب بن قحطان ) وقيل غير هالكلام ، فأنا اخذت الموضوع من قاصرة بحكم التشابه ( عرب ويعرب ) وقمت اوجه الكلام لبنو يعرب وأقصد فيهم كل شخص يتحدث العربية وعاش وتربى بين العرب إن شاء الله إكوادوري ، لطالما أنولد وعاش وتربى بيننا خلاص هو من بنو يعرب الي أتكلم عنهم !
وتوقعت بكذا بكون ع الاقل هالعشرة عشرين الي يقرؤن موضوعي وأي واحد جاي من الشارع وعربي اللغة والمنشأ بيفهم اني امدح وافخر فيه وبالثاني وبالجميع طالما انا بمنتدى الكل فيه عرب فانا افخر بكل واحد فيهم ، ورغم وضوح هالشيء الا أنه يجيني واحد بالنهاية يشكك فيني أني أحتك !!
انا والله يشهد علي ماتعدت نيتي وفكرتي اني القى شيء نجتمع ونحايد عليه ، وكانت نيتي اولاً وأخيراً أني أحاول ع الأقل أسوي شيء اكثر من أني اتجنب الخوض في الصراع الي صاير ولا حتى أقراله ع الأقل أزود بشيء ، بالنهاية هي محاولة (( لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا ))
بالنهاية انا أنسان عندي هدف وغاية أسعى بإذن الله لتحقيقها او المحاولة في أسوأ الاحوال ، من وقت عزمت على هالهدف بحثت بقوقل لين طحت بمنتداكم كنت ادور مكان اجهله ويجهلني وابدأ منه ، ماعرف أي شخص هنا ولا أحد يعرفني ، ماعندي أي نيّة او ع الأقل المحاولة بالتباهي او التكبر او التفاخر او إدعاء شيء لمجرد اني اشتهر بينكم او اُعرف او احاول أتصنع التميز… اللخ ، انا لو عندي هالافكار والنوايا كان مواضيعي وردودي غرقت المنتدى ، وكان دخولي يومي ومتواصل مع اني ادخل من جوالي وبامكاني كل ثانيه ادخل ، مع ذلك يالله مرتين ثلاث بالاسبوع ادخل وهذا مو عيب باالمنتدى بالعكس لكن بلادة فيني !
بالنهاية هالكلام ذا كله من زمان ودي أقوله ، ويمكن اكثر ما أشغلني بهالسالفه هو سوء الفهم الي صار بيني وبين احدى الاخوات ، حيث فهمتها غلط كما صححتلي وهي بنفس الوقت كما صححتلها فيما بعد ، اننا نوصل لهالنتيجة في موضوع انا نزلته في قسم اساساً بعيد عن النقاش وماخطر ببالي أصلاً انه يتحول لنقاش وجدل في معظمه توقعت فكرته واضحه !
الخلاصة انا وربي يشهد علي اني اكتب بنيتي كما هي ولولا ارتياحي للمنتدى واعجابي فيه وبادارته وباعضاءه صدقوني كان بلحظه اسحب وكذا كذا انا جديد لو أختفيت محد منتبه ، وأتمنى إختلافنا في الآراء مايشخصن الامور ، في النهاية حنا نتبادل الكلام والافكار وناخذ ونعطي مع بعضنا ، وأتمنى مانتخطى هالشيء ، واخلاقك واخلاقي فوق كل شيء !
هذا الكلام الي بقلبي جاكم على لساني ، ويسعدني ويشرفني التعامل بالمثل ، واحلى شيء ان الي بالقلب ينقال سواء عتب او نصيحة او وش ماكان لأن الصراحه راحه كيف ماجت ، صحيح ان كلامي كثير وحوسه لكن خوذوا زبدته ، وأجدد احترامي واعجابي بالمنتدى وأهله وأدارته الي اعجبتني اكثر بعد حذفها لموضوعي ، كبر بعيني التقدير والاحترام والاخلاق العالية والراقية جدا الي كلموني فيها ، لدرجة اني استحيت من هالموقف الي حطيت نفسي وحطيتهم فيه