ماني الحالي ساهر الليل ياخال
جالس الحالي بس ماني الحالي

اغلى من اغلى شي عندي هوى البال
واقرب من اقرب شي لي في خيالي

دايم معي طيفه على كل الاحوال
دايم معي لو بعدته الليالي

له منزلن بين المحاني ولازال
بين المحاني منزله مايزالي

اللي معه قلبي ويتلف له الحال
جعله فديته قلبي وحالي

ياما مضالي معه من طيب الفال
الله يوم اذكر معه مامضالي

اذكر مجالسنا على ذيك الاطلال
ايام كنت من الهواجيس سالي

واذكر معاهدنا على حب ووصال
عهد الغرام اللي من الكذب خالي

انه معي في حال والناس في حال
وانه يواصلني على كل حالي

وان بحت بالاسرار ماني برجال
والي خلق ما ابوح باسرار غالي

ليته كذب ليته قطع حبل الامال
ليته سكت او قال مالك ومالي

المشكله انه صدق كل ماقال
لكن حكم الوقت ياخال مالي

ضاقت بي الدنيا بعد بيننا حال
حكم القدر من بعد طيب الوصالي

علاه همي بين الاضلاع لاجال
يضيق به بين الضلوع المجالي

وعلاه دمعي فوق الاوجان ينهال
مثل الحصى من فوق جرفن هيالي

صابر وانا صبري على البعد لو طال
من فوق قدرة طاقتي واحتمالي