عسى السحاب اللي تثقّل بالأمطار
تنثر على (وادي حنيفة) مطرها
تنثر عليه من المخاييل مدرار
تسقي طلول سهولها مع وعرها
دارٍ لها في ماضي الوقت تذكار
يجيبنا تاريخها عن خبرها
بَنَت لها عزٍّ ملا كل الأقطار
عزٍّ على حكم الشريعة عمرها
يا ما دعت للدين بالسر وجهار
وياما تُلي بأقطارها من سورها
واليوم صارت حسبة أطلال وآثار
تهدّمت حيطانها من حجرها
وقفت فيها حاير الفكر محتار
ذيك القصور النايفة وش دمرها
سبحان من دبّر بكونه له أدوار
مجري العيون الجارية من حجرها
يرفع وياضع.. عالمٍ كل الأسرار
يعلم منافعها ويعلم ضررها
إلى حكم بأمره جرت كل الأقدار
ما ينفع العين البصيرة بصرها
لي لفتةٍ لأهل البصاير والأبصار
تاخذ من صروف الليالي عِبرها