البارحة مدري وش إلي خذاني
يوم اجنبو عني من الضيقه اشملت
جيت اتكـــلم بس عيا لســـانـــي
ماكني الا مرتكب ذنب واخملت
الله يسامح من ذكرت ونساني
وانا ادري اني لا ذكرته تجملت
عانيت وادري كل طيب يعاني
وعلى حساب طعوني الخضر جاملت
ياما خذوا مني ولا احد عطاني
من طيبتي في حق نفسي تساهلت
عزاي لا منه تحـــــهم زمــــاني
يمــــمت وجهي للكريم وتوسلت
والي يبي قربي وبعدي لقاني
امشي على وضح النقا ماتخللت
يامن سكنت اجمل زوايا كياني
ياما على نفسي عشانك تحاملت
مرات احس انك معي شخص ثاني
ومرات احس انك حبيبي ولا زلت
لا تفرح انك دجت بين المحاني
لو ما تخون الذاكره ما تسللت
عشان ما ضيك الجميل وعشاني
حاول تشيل من الوفا ربع ما شلت
ماني على خبرك حبيبي تراني
حتى عن صغار الاماني تنازلت