القلب لك من ريش صار وجناحين ،
ما طار .. إلا يوم ~ عقلي تطيَّر !
أشتاق لك ,, شوق الزهر للبساتين
وهذي فصول العُمْر , طُبْ وتخيَّر .
لـ غْياب ماغيَّر ولا شي , للحين :
زاد الوله .. والشوق فيني تجيَّر !
عليك متغيِّر ؟ من مفارق سنين!
القلب { قلبي } بس ، وجهي تغيَّر .
إللي بعمري ؟ شافوا الهَم [ بعدين ]
لكن أنا .. شايف همومي صغيّر !
حُبك خذاني من شبابي على وين ؟
مشيت لك مغصوب , كنّي مسيَّر !
عايش على الأحلام وبيوت من ( طين )
وأيّام معدوده ... وقلبٍ تحيَّر !
ياما فقدت أرواح ناسٍ عزيزين ،
ودنياي أسايرها وماني مخيَّر .
واقف على أطراف { باب الثلاثين } :
والشيب ضيفٍ ما دعيته وسيَّر !
وجهي تغيَّر من [ تجاعيد لِـ سْنين ] ،
بس إنتْ قلبك ليش .. فجأه : تغيَّر !