انا اتابع هالمنتدى بس اليوم ضاقت الارض فيه من بعد المغرب وانا احاول اسجل في هالمنتدى والحمدلله سجلت بنات ربي يسعدكم ابغاء قبل كل شي تدعولي لعل فيكم من تستجاب دعوته
زوجي زعلان من البارح تاركلي البيت كله وطالع مادري وين هو فيه عشان مديت يدي عليه انا احبه وهو نفس الشي هو قلبه طيب بس هالمره احس اني زودتها حنا نمزح مع بعض زي اي زوجين بدايتها قبل شهرين سويت فيه مقلب ونسيت وهو بذاك الوقت ضحك ومانسى وقال اردها لك




البارح راح وسوا كروت دعوه زواج ممكن عشره وحاط اسمه العريس فيها ودخل البيت وراح على المجلس ونزل شماغه على الكنب واخفى الكروت تحتها بعد نصف ساعة قالي عطيني شماغي ورحت
رفعت الشماغ حصلت الكروت انا عطيته شماغه وطلع رجعت فتحت الكروت انصدمت وابكي مدري ايش جاني احس انجنيت بعد مارجع سألته قال ايوا بتزوج بس انتي تبقين الغاليه وحبيبتي
انا فقدت اعصابي حسيته يستخفني وصارخت عليه وهو يضحك يقولي مراح اروحلها غير يوم في الاسبوع انا ضربته بيدي ورميت ريموت التلفزيون وجاء في راسه
هو شاف اني انهرت وماقدرت امسك اعصابي وولدي وبناتي يبكون قالي الحمدلله على نعمة العقل والله لامتزوج ولا شي واني طابع هالكروت مقلب بدال الي سويتي في وجاب جواله وفتح محادثته مع صاحب المطبعه الي هو صاحبه وهو يقوله سويلي عشره كروت وزبطلي اسم عم حلو بسوي مقلب في الحرمه
بعد ماشفت المحادثة قالي ثمان سنوات من تزوجتك مامديت يدي عليك ولا احب ارفع صوتي عليك اخرتها ترفعين يدك علي وقام وطلع ارسلتله واتس اب سوالي حظر
اتصل عليه مسويلي حظر يجيني مشغول مشغول
اليوم جاء وحنا نايمين فتح الباب ونزل زبادي وحليب بنتي واغراض ومشى ومجاء لحد الان
غصب عني الي سويته اغار عليه لاحد يلومني وربي اكره الدنيا بدونه
قولولي وش اسوي اذا جاء محتاجه لكم
وإذا مجاء ايش اسوي والله اني ضايقه