احسن الي والك
ماترجع العشره
صدكني من نلتقي..
كل مابقى نخسره
ارجوك تلغي الحلم
وتأجل الفكره
الماي طاح برمل
وانكسرت الجره
احسن الي والك
نبقى على الذكره
طول غيابك سنه
وبلاعذر وارجع
وشلون ارجع الكَلب؟
وادريه مايرجع
بديت احس مو الي
حسيتك اموزع
وفكرة اثنين بكَلب..
مرفوضه هل فكرة
الماي طاح برمل..
وانكسرت الجره
مانلكَه نفس الخجل
والخوف والرعشه
ولايوم فوك الورد
يرجع ندى الغبشه
سكته ونضيع وكت
لو ردنه نتمشى
وكلمن بحسبه التها
وبيَّ انشغل فكره
صفحه بعمرنا انتهت
واحنه طويناها
فوك الرفوف انست..
وتراب غطاها
وتريد بعد السنه
نرجع ونقراها؟
ماكو جديد وحلو
بكتابنا شنقره
صدكَني من نلتقي..
كلمابقى نخسره
ارجع بعد هالسنة
وما ادري بيَّ اشصار؟
تقبل اعيش بقلق
ونظل بلا استقرار؟
مره المحبه تجي ..
ومره الشمس تندار
الفرصة راحت اذن
والجيه متاخره
أرجوك تلغي الحلم
وتأجل الفكرة
محبتي لكم