Prt " 1 "

كانت قـاعده بالحديقـه ومتربعه فوق أحدى كراسي الطاولات وحاطه بحظنها كتابها وعلى الطاولة اللي جدامهـا الدفتر .. وبيدهـا اليسـار ماسكه قلم أسود سائل حاطه طرفه بحلجها علامة على التفكير وكل شوي تعدل نظارتها الطبيـه دليل على قمة التركيز عندهـا ..... كانت تراجع لمادة الكيميا وخاصـه أنه أخر أمتحان لها راح يكون يوم الأحد هذا ولأزم تقدم عدل ..
لأنه لو جابت أقل من 97 أحتمال تنتحر من القهـر على أيام الوناسه اللي ضيعتهـا طول هالفتره علشان تدرس ....
قطع عليها جوها الدراسي صوت السياره وهي تدخل البيــت ... تنهـدت بضيق لما تذكرت أنهم توهـم راجعيـن من اللاند بعد ماتغـدوا هناك وتونسوا اخر وناســــه ورجعوا لها ....
ثواني ألا تجيها أختهـا الصغيرهـ تركض من بعييد وبيدها كيس كبيــره ماتدري شداخلهـا وقالت وهي تصرخ من بعييد : نووووووووري .... نوووورررري ...!
ألتفتت نوره وراها وقالت : هاا ؟
جات وقفت أحذاها وقالت وهي تطلع اللعبـه : شووفي شريت ... باربي ..
نوره خذت اللعبه وهي تساير أختهـا الصغيره : اللااهـ .. حلووووووهـ .... من شراها لج ..
ريم ببرائـه : نوووواف ..... نزلنا السوق وقال أشتروا كل اللي بخاطركم ... حتى ماما أشترت ...
نوره عقدت ملامحها لأنها فاهمه قصده من هالحركه قالت : ويييـنه الخاايس ؟
ريم تأشر بيدهـا على الفراغ اللي وراهـا : هناااااك بسيارهـ ... يمكن ينزل يمكن لوء ..
نوره هزت راسها بتفهم : زين روحي لعبي دااخل .. خليني أدرس
ريم : زيـن ...
خذت لعبتها من يد أختهـا وراحت دااخل تركض ... وبعد دقايق ألا صوت أمهـا وأخوها الصغير جايـن صوبهـا ...
أم نواف وهي بايـنه على ويهـا الوناسه : ووي يانوير .. طافج نص عمرج .... تونسنا وناسـه مابعدها وناســه ..
نوره تلف على أمها وتقول : ماأبي أتونس خلوني بيـن أربع طووف أكرف عمري ,, لا جبت الـ 97 .. ذيج الساعه بونس عمري سنه كااامله قبل لا أأدش الجاامـعــه ....
أم نواف وهي تقرب صوبهـا وتسحب لها كرسي من كراسي الطاوله وتقعد : تتوقعيـن من شفنـا هنــاك ؟؟
نوره وعينهـا بكتابهـا تتصنع اللامبالاه وهي داخلها بتموت وتعرف من : مـــن ؟
أم نواف : أنتي قولي من ؟؟ ...
نوره وهي تحط بعض الخطوط على التعاريف المهمه بهلـ صفحه : ماادري !...
أم نواف : شفنــا وضوح ..
نوره ضغطت على القلم بقوهـ زيـن ماأنكسر " هيـن ياوضييح .. هذي اللي مابتشبر برى البيـت وبتدرس !! أوريج تتونسيـن وأنا اتعذب نفسياً هني " قالت وهي مازالت لابسه قناع اللامبالاه : زيـن !!
جا أخوها الصغير واللي بـ أول أعدادي .. وقال بعد ماقعد بدفاشه على الكرسي المجاور لها : نواف يقول لج .. أذا تبيـن ياخذ فيج لفـه جدام البيت عن خااطرج لبسي عباتج وطلعي لــه ..
نوره : شنو يتصدق علي هو وويها العفن ... ماأبي ياخذ فيني لفه ولا لفتيــن ...... الله لا يحوجني له ..
أم نواف : يايمه مايصير اللي تسوينه بنفسج .. عنبو حتى أكبر عالم بهلـ كيميا ماسواهـا ....
نوره وعينها بكتابهـا : عادي بصير أحسن منه ...!!
أخوها الصغير " غانم " بضحكه ترفع الضغط ويرتشف رشفه عن خاطرهـ من قوطي البيبسي المحطوط ع الطاوله : والله أنج مشكله مالهـا أدنى حل .. مصدقه بتجيـب 97 .. حدج 70 ويخب عليج بعد
نورهـ صفقته بالكـتــاب على كتفه وقالت : موو أستانسـت وغازلت بنات سادس و خامس .. قووم فارج عن ويهي لا أطلع حرت الكيميا ووضوح ونواف فييييك ... فااارج أشوف
غانم وهو يقوم : زيــن بفاارج .. من حلات ويهج ...
حط البيبسي ع الطاوله ومر من جدام أخته لعانه وهو رايح
ولسوء حظـه أنه حرك البيبسي وأنكت على دفتر الكيميا اللي ملخصه فيـه نوره الدروس اللي درستهم كلهم
شهقت من قمة راسها وصرخت بقهر وهي شوي وتصيح بعد مارفعت القوطي : غنوووووووووووووووووووووووووووووووووووووووووووووووو وووووووووووم !
غانم وصل قلبـه لمخه من الخرعه وقال بصرقعه : والله آآسف .. قسما بالله ماقصدتهـا .... والللللله ...
نوره ألتفتت عليه وقالت : يالخاااااااايس ... يالحماااااااااااار ..... كل اللي درسته رااااح ..
غانم وهو يرجع خطوهـ للورى علشان يشرد لأنه شكلهـا قربت تنفجر : يمدحون الكمبيوتر اللي عندج هني " وأشر على راسـه "
نوره قامت وقفت وحطت الكتاب على كرسيهـا وقالت ودمعتهـا بطرف عينهـا : والله مااااأهــــدكـ ....
ركضت وراهـ تبي تتوطـى ببطنه .... وهو مشالله عليــه .. مركب تواير بريلـه وبسرعــة ألا هو فوق بدارهـ قافل عليــه غرفته
نوره وهي صوتها راح من الصراخ ودمعتهـا على خدهـا من القهـر : غنوم والله ماأنساهـا لك ... صدقني بردهـا ... والله وهذاني حلفت ..... وبتشووووووف يالياااهل
غانم بأسلوب يتسفز : آآيـه زيـن ... يصير خير ...
نوره رفست باب غرفته من الحرهـ وأبتعدت عنه تنزل الدري مقهورهـ وهي تمسح هالقطرات المالحه اللي عانقـت خدهـا ... من يوم الخميس ليـن اليوم اللي هو السبت وهي تدرس وتكرف وهالكه نفسهـا وكل مافهمت شي لخصته بهلـ دفتر والحين يجي هالبزر باردة مبردهـ يمحي لها كل تعبهـا ببيبسي ...!!
قعدت تتحلف فيـه وتتوعد بـه .. وهي متجهه لباب الصاله بتطلع ع الحديقـه وأول مافتح البـاب ألا بواحد طويل واقف جدامهـا
وقال بأسلوبهـ اللي تكرهه : آآهـ ياقلبي .. مو معقوله القمر فاتح لي البـاب .. ويـن يجيني نووم اللحيـن .....
نوره وهي في قمة غضبها : نووووااااف مب متفيجه لك اللحيـن ... كافيني اللي فيني ..
نواف : أفا أفا أفا ... النور يصيح ؟؟ ليش ؟
نوره بصراخ : لأنه أخووك الخاااايس ضيع علي شقـا هالثلاث أيااام ... وبرجع أكرف ليـن الله يشوف لي علشان أرجع نص اللي راح علي ... عرفت ليش النور على قولتك يصيح ؟؟؟؟
نواف بجديه : من صجج ..؟
نوره : لا أتغشمر معاااك .. " تدفعه عن طريجهـا " ووخر واللي يعافييك بس ....
طلعت من الصاله ورجعت الحديقه مالقـت امهـا ... الظاهـر دخلت البيـت من باب المطبخ !!
رجعت قعدت على الكرسي ومسكت الدفتر من الطرف وهي تنفضه بخفه علشان تزيح قطرات البيبسي .. وقعدت تشوف أذا اللي مكتوب ينقرى وله لا .... كان جزء كبير وااضح وينقــرى والباقي ذهب مع الريح !!!
قامت وقفت ورجعت دشت دااخل وسيدهـ على غرفتهـا ركبت الأستشوار وشغلته تنشف به الدفتـــر على أمل أنه الكلام ماايختفـــي .... لأنهـا صج صج بتنتهـي لو أنمسح شقاهـا كله


بينما عند أم نواف دخلت دارهـا وبيدهـا الاغراض اللي شرتهـا لقـت بو نواف نايم بعمق ماحبت تزعجه وتصحيــه اللهم حطت الاغرض على جنب وفصخت عبايتهـا ,,,
وخذت لها ثياب ودشت الحمام تاخذ لها دش داافي يرخي أعصابهـا عقب التنقل من محل لمحل .........
ولما خلصت تروش .. طلعت وشعرهـا مبلل لقـت بو نواف قاعد على طرف السرير شكله توهـ قايم ... قالت وهي تحرك الفوطه بخفه على شعرها الأسود : صح النوم ! ...وأخيراً قمــت
بو نواف وهو يتثاوب بخمول : هلا ... هلا ! ... متى جيتوا ..؟
أم نواف : توونـا من شوي ... بس صج صج الطلعه مع ولدك وناســه .. لها طعم غيير
بو نواف : زيــن عيل غيرتوا جوو شوي بدل حكرت البيــت .... ونوره جات معاكم ؟ وله كالعادة منحبسه بجحرها !
ضحكت ام نواف بالخفيف وهي توقف جدام المنظره وتحط الفوطه ع التسريحه : حراام عليك .. تبي ترفع راسنـــا ...
بو نواف : هي رافعته بدون شي ...
أم نواف : بنتي وأعرفهـا عدل لا جابت ذيج النسبـه العاليــه وفرحتنــا ودخلت حدى هالجامعات ... ساعتها بس راح ترتاااح وتريحنا معاهـا ...
بو نواف وهو يلبس ساعـة يدهـ وقال بثقه : قصدج لا دخلت جامعـة قطــر ...
أم نواف تمد يدهـا وتاخذ الكريم الخاص بالشعر وتقول : وأنت للحيــن ؟؟؟
بو نواف : وليـن بكرهـ ...
أم نواف : الدنيا تطوررررت يابو نواف .. محـنـا على أيام يدك ويدتي !!!
بو نواف : تطورت ولـه غييررهـ .. ماأرضـى بنتي تدرس بجامعات مختلطه ..... تبي تدخل الجامعه عندهـا جامعة قطر ماتبي تقعد بالبيـــت تجابلج
أم نواف تسكر السالفـه لأنهـا عارفه نهاية هالنقاش : عااد ساعتهـا يحلهـا ألف حلال .... أنت قووم اللحيـن صل المغرب .. ترى أذن .....
بونواف وهو يقوم : أن شالله ...

مر صوبهـا وهو داش الحمام بينما هي تطالعه من منظـرة التسريحه وتوزع الكريم بشعرهـا ... ببتسامه صافيــه ....
.
.


في مكان بعيــد وآيد عن هالبيــت

كان الجو هـادي عندهم ومافي أي حس .. وهو واقف بالمطبخ يمرر السجيـن اللي ملاها جبـن فوق التوست بضجــر وببالـه أفكار رايحه ورادهـ ...
ولما خلص منهـا حطها بصحن وأبتدى بالتوست الثـالث .... لحد ماخلــص .. حطه بالصحن .. وألتفت وراهـ يصخن الماي علشان يسوي له شــاي وبينما هو على هالحال دخلت عليـه أمه اللي كانت توهـا قايمه
وقالت : زايد ... أنت هنــي ؟؟
ألتفت زايد عليها وأرتسمت شبح أبتسامه على شفاته وقال : مابغيتي تقوميــن ...
أم زايد : ووي يايبـه .. أنهلكت اليوم .... ماغير اكل بهلـ دوى .. السكر مغربلني وأنا أمك
زايد ألتفت هالمرهـ بجسمه كامل عليها وقال : وليش مادقيتي لي !!
أم زايد : شنو ماعندي سالفه أدق لك .... السكر يرتفع وينزل وأنا تعودت عليــه عشرة عمرررر ..
زايد بجديه : يمه لا تتهاونيـن بصحتج جذي .. ثاني مرهـ لا حسيتي بأقل تعب دقي علي ماني متعيز عنج .... وخل تروح الجامعـة بستيـن ألف داهيــه .. صحتج عندي بالدنيا
أم زايد : أدري أنك مابتقصرر .. من يومك ياهل وأنت قايم فيني .... " تنهدت وكأنها تذكرت هموم كانت تتناساهـا " الله عوضني فيييك
زايد نزل نظره لتحت لما حس بحزن أمه .. مايحب يشوف هالنظره بعيونهـا يحس مليون سيف ينغـرز بصدرهـ وبكل برود ينتف قلبـــه ويقطع عرووقـه.......
ألتفت على الغوري اللي سخن الماي وبنــده وراح طلع كوب يصبه فيـه
فتح الكبت وطلع له لبـتـن وحط قفشتيـن سكر بالكوب ...وبعدهـا حطه بالصينيـه جنب الصحن وقال وهو يتحاشى يشوف أمه : بيحطون فلمج المفضل ع أم بي سي 2 اللحيـن
أم زايد ماردت لأنها سبحت بأفكارها لبعييد بعيييد وآآيــــد !!!
زايد وهو طالع الصاله رفع صوته علشان يرجعها لأرض الواقع .. الماضي ماراح يفيدهـا بشي غير النكد والضيق : أأنــطـــــررج ..
أم زايد ألتفتت لصوت ولدهـا لقته أختفـى عن نظرهـا مسحت دمعه متعلقه برمش عينها وطلعت الصاله وراهـ وقالت بعتب : كم مرهـ قلت لك ... ماتتمشـى بالبيت بدون قميص !!
زايد وهو يحط الصينيه جدامه ع الطاوله ويقعد ع الكرسي : يمـه متعـوووود ! وبعديـن البيت كله مافيه ألا أنا وأنتي ... أستحي من منه مثلاً ...
أم زايد : ولو .. ماتقعد لي جذي ... بالله لفحك الهوى وطحت علي مريض .. من بيفيدني ؟؟؟ ولـه حد جانا وشافك ماخذ راحتك بزياادهـ شبيكون موقفك ....
زايد وهو يحط طرف التوست داخل الشاي : عاادي .. واحد فـ بيته راح يحاسبوني شلبس وشنو ماألبس !! وبعديـن هالناس ماراح يعجبها العجب ولا حتى الصيام برجب ... واللي ماأعجبه يطق راسـه بالطوفــه ..
أم زايد تقعد أحذاه وتشغل التلفزيـون بالريموت كنترول بعد مايأست منه : الله يهديييكـ ...
زايد بعد ماأكل له شوي من التوست قال وهو يغمس طرف التوست بالشاي ويمدهـ لأمه : آآميـــن .... أجوووف فتحي حلجج ...
أم زاايد تبعد ويها : لا لا يبــه ... والله ماأأبي مالي نفس ...
زايد يتمسكن : ترديـن يدي !!! ترديـن يد زاايد حبيبج ؟؟
أم زايد : ماعاش اللي يردك ... بس والله طفحانهـ أكل ....
زايد : عشان خااطري زيــن ....
أم زايد كلت شوي عن خاطرهـ وقالت : هاا ! مستانس اللحيــن ...
زايد وهو يقط اللي بقـى من التوست بحلجه ويشرب وراهـ رشفة شاي : ألا بمووووووت وناسـه ...
أم زايد : أموت وأعرف وييــن يرووح الأكل اللي تاكله أربع وعشريـن سااااعــه ....؟
زايد بضحكه خفيفه : لا آله الا الله ... بعد أحسديني على هالكم لقمه اللي اكلهـا باليوم ....
أم زايد طالعته بنص عيـن : كم لقمه ؟ ... آآآي وااضح !!!...
زايد وهو يتربع فوق الكرسي : ماعليج فيني دودهـ متكفله بأكل كل شي أأطرشه لهــا .. ههههههـ
أم زايد تدزهـ بالخفيف : تنكت مع هالوووي ....
زايد ضحك بدون مايعلق وعينه على التلفزيـون جدامه .. بينما أم زايد حاولت تبعد شبح الماضي عن بالهـا وتندمج بفلمهـا المفضل على قولـت زاايـــــد ....... بدون أمل !

.
.

بيت بو نواف


بنــدت الأستشوار بعد مانشف الدفتــر .. وراحت تتصفحه تحاول تقــرى شي وأرتاحت نسبياً لما لقت شي ينقـــرى .. حطت الدفتر على جنب وراحت تدور بالدروج على دفتر فاضي ترجع تنقل فيـه كل اللي راح عليهـا ...
وبعد طلعت الروح لقــت ..... مسكت قلمهـا وقعدت تكتب وتوهـا ماوصلت لنص الصفحه ألا نغمة جوالها تحشر الغرفــــه طنشــت لأنهـا مب فاضيـــه والجوال نفسـه ماطول بالرنيــــن
ورجعت دفنت روحها بالدفتر تكتب بحرص وبالمرهـ تراجع من يديد ... لكن صوت جوالها اللي رجع رن عكر عليها جوهـا ...
نوره : آآووووووف ...!
قامت من على مكتبها وراحت صوب سريرها خذت الجوال وردت بعد ماشافت المتصل : هااا يالأذيـه شتبيـن ؟ الوحده ماتعرف تدرس بجو هاادي ؟؟
وضحى تنعم صوتها : هاااي دلـبي ... " بلهجه لبنانيه " شو أخبارك .. لك أشتـئـتلك موت ؟
نوره وهي ترجع تقعد على كرسي مكتبها وتقول بعد ماحطت جوالها جنب الدفتر ع السبيكر : يشتاق لعدوج النكد قولي أميــن ... تراني متنرفزهـ منج ..
وضحى ضحكت من قلب وقالت : أأدري أأدري ... عارفه ردت فعلج أساساً ... بس شسوي ياأختي مليــت طقت جبدي من مجابل الكيميا فقلت أخذ فترة نقاها ....
نوره : ع الاقل عطيني خبر أنج بتطلعيـن تهيتيــن ... مب مخليتني على عماي .....
وضحى : شدراني ... قلت أكيد لو عطيتج خبر بتفتحيـن لي قاموس نصايح وأنا مب ناقصه عوار راااس
نوره : صج جليلة حياا .... أنا أعور الراس يعل راسج العواار اللي مايفارقهـ ...... هيـن ياوضييح .. الوعد يوم الاحد أن ماندمتي
وضحى بمرح : زيـن فكينا من دعاوييج ... " تدلع علشان تغيضها " توني طالعه من اللاند .. واللحيـن أنا بفيلاجيو... تبيـن أجيب لج شي ماشيات .... لا يردج الا لساانج ..
نوره : لا مشكورهـ ماأبي منج لا شي ولا ماشيات ... أأبي أأدرس بجوو هادي ممكن
وضحى : لا مب ممكن ... بسج رحمي حالج .... طول الوقت تدرسيـــن ماتصدعيـن أنتي ..؟
نوره تتنهد بضجر وملل وصوت هادي : وضووح تعبت والله ... أأبي أجيب نسبه عدلللــه ماأبي أتخرج من 3 بحيالله نسبـــه ...
وضحى : زيـن كلنا نبي نجيب نسب بس ماسوينا بروحنا جذي ... اللي يشوفج يقول ذي ناويـه تدخـــل أحسـن جامعــة بالولايات المتحده ... مب جنج داشـه جامعة قطر !!
نوره عقدت ملامحها وقالت : وشفيهـا جامعـة قطر .... شحلاتهـا وشزينهـا وأحسن البنات متخرجيـن منهــا .... عيل عاجبج شغل الصياعه اللي ببعض الجامعات المختلطه ..
وضحى : والله المتربيـه عدل ماراح تضيع بيوم وليله ....
نوره : آآكييد فديتج ,, مب مستعيله البنت تضيع من أول يوووم ... لااحـقـه !
وضحى : زيـن جب جب يالمعقدهـ ..... والله أنا ماعلي منج بدخل فرجينيا وأنتى بألف طقاق يطق راسج هاليابس ..
نوره : ويرضج معاااي .. يلا أشوف سكري ... متصله تنكديني ؟؟
وضحى : لا ...! أصلا أنا داشـه محل بضاعته تذبح .... قلت بشتري لج معااي علشان نطقم بيوم .... بس مايبيـن بعينج ......
نوره : لا تشتريـن لي ,,, ليــن قعدت سنه كامله بالبيت أريح قبل الجامعه بخم مجمعات الدوحه كلهــا ....
وضحى : زيـن يمه .. خمي المجمعااات .... يلا باي أبي أتنقى على رااحتي بدون سندارهـ ..
نوره بتسأل : طالعه برووحج ؟؟؟
وضحى بنغزهـ : لا جايبـه البيت كله معااي ؟؟
نوره : تطنزيــن ...
وضحى : لا أستخف دمي .... أأكيد جايـه برووحي من متى أطلع من البيـت ومعاااي حد .. لا أمي متفرغه ولا أبوي ... وماعندي أخووو كبييير ..!!!
نوره : زيـن علـ الأقل حد كبير يكون معاااج ..
وضحى بسرعه : وييييييـه واللي يرحم والدييييج .. لا تشغليـن لي أسطوانتج .... أعرف شلون أصون نفسي وأحافظ عليهـا .. مب محتاجه أبو ولا أم يحموني ..... شقالولج نوره !!؟
نوره : بل بل كلتيني .. مايسوى علي فتحت حلجي ..... زيـن بااااي خليني أدرس
وضحى : آوكي .. بكلمج بعديـن
نوره : أووكيه .. يلا بااي ..
وضحى : بايات ....

نوره ضغطت على الزر الاحمر تنهي الاتصال وهي تقول : ماتـغيـر !
دخل عليها غانم وقال : ياافديت صوت خطيبتي والله
نوره طالعته بنظرات حقد وقالت : خييير شتبي ؟؟؟
غانم بتسأل : هذي وضحى ؟؟
نوره عادت سؤالها : شتبي ؟
غانم وهو يقرب منها ويمرر صبعه بالفراغ اللي بمكتبهـا : جاي أتأسف ...
نوره : زيــن والله صحى ضميييرك !!
غانم طالعها وقال : ماعلينــا .. تبيني ألخص لج الكتاب تعويض عن اللي محيــتــه ؟
نوره كانت بترفض بس قالت دامه يعرض خدماته خل تستغله : أصلا مب بهوااك هو .. غصباً ورى خشمك رااح تعيييييدهـ .....
غانم : مع أنه أسلوبج زفت مثلج .. بس بعد تمونيـن اختي العوودة شسوي ؟؟
نوره قامت وقفت وحطت القلم فوق الدفتر اليديد وقالت : أشوف أنثبر ... وعييد اللي بالدفتر القديم هني ..... أأنقل عدل مو تزيييد وله تنقص شي .. بنحرك !
غانم وهو يقعد : أن شالله عمتتي .....
نوره تنفخ : آآووووف ... هذا حمل وأنزاااح ... باقي لي أأدرس اخر درس وبجذي بكوون خلصت الكيميا عدل وباجر أراجع ع السريع وأن شالله أجيب علامه كامله ..
غانم طنشها وقعد ينقل اللي بالدفتر القبلي بالدفتر اليديد ... بينما هي راحت صوب سريرهـا
قعدت وفتحت كتاب الكيميا على اخر درس وأبتدت تراااجع
مادري متى ناويـه ترحم روحها هالبنت !!!!!؟

.
.

اليوم التالي وخصيصاً في أحدى المدارس الثانويـه

كانت تمشي مع وضحى وهي تحاتي الأمتحان اللي راح يبدأ بعد شوي : تصدقيـن خايفـه أزفــت ....
وضحى : أقص أيدي لو زفتي ... ماكله الكتاب وتقوليـن بتزفتيـن ؟؟ عيل أنا اللي بعتهـا أمس وطنشت حق الكيميا شقول .... يلا الله يكتب اللي فيه الخير
نوره بطنازهـ وهي تضحك : ههههه رايحه تخطبيـن ؟ شنو الله يكتب اللي فيه الخير !!! سكتي واللي يرحم والديج ماأبي أضحك
وضحى أبتسمت ببـلاهه وقالت : آآيه عيل شيقولون .....؟
نوره ترفع يدها لفوق وتقول : الله يوفقج يانووره يابنت حنان ويخليج الأولى على بنات الدووحه ...
وضحى تدفعها بالخفيف : يلا منااك ... واايد ماخذهـ مقلب بعمرج ...
نوره بغرور مصطنع : من حقي ....
وضحى بتسأل : أقول نواري ... مب جنه البنات قاموا ينقصون ؟؟؟
نوره بلا مبالاه : تلاقينهم طقت براسهم يراجعون شوي قبل الأمتحان ....
وضحى : عبالج الكل حمص مثلج ... " توقف وتلتفت وراهـا " نويررر ... الساحه مافيها ألا كم بنت ... أمشي أمشي خل نروح الصف لا يكون بدى الأمتحان ؟؟
نوره : شدعووه يبدأ قبل الجرس .... لا لا ماأظــن ..
وضحى تطالع ساعة يدها وفتحت عينها على كبرهـا : يالعنززز ... بدى الأمتحاااان .....
نوره بغباء الدنيا : واللله ؟؟؟ بس مارنوا الجرررس !
وضحى : تلاقيـن الجرس كالعاده خرباااان مايعدلونه ألا كم يوم بالاسبوع ....... " تمسك نوره من معصمهـا " أمشي بس أمشي لا نرسب بالكيميا وقعدي صيحي دم ع الايام اللي راحت وأنتي تدرسيـن
نوره عقدت ملامحها وهي تاركه جسمها يسير بقيادة وضحى : فال الله ولا فاااالج .... ناجحه أن شالله وجايبه نسبــه تصدمج ...
وضحى بلعانه : آآكيد بنصدم أذا 50 ....
نوره ضربتهـا بقوهـ على ظهــرهــا بغت ترجع البنت قلبها : ووووووووووووعمــى ... أفتك من غنووم تجيني أنتي ..
وضحى تركت معصمهـا وألتفتت عليهـا بغضب وكأنهـا تألمت وهي تقول : يالخااااااااااااايســه ... يعووووور ضربتيني مكاان الطيييحـــه !
نوره حطت يدها على حلجها بعد ماأنتبهت على اللي سوته : آوهـ !! سووووري نسييييييت
وضحى : يعل ياخذج هالسوووري قولي أميـن .....
نوره بنص أبتسامه بسبب الغضب اللي أرتسم بوي رفيجتهـا : آآميــن ...!!
وضحى تمشي عنهـا وتتركهـا وراهـا وتسرع نورهـ بخطواتها وتتعلق بذراع رفيجتهـا : خلاص عاااد قلنالج أسفيييـن لا تعصبيــن ...
وضحى : زييين رضيينــااا ...هديني ..
نوره تحط راسها على كتف رفيجتها ومازالت متعلقه بذراعها وتتدلع : موووبي موووبي ...كيفي رفيجتي !! عندج أعتراض ؟؟؟
وضحى طالعتها وأبتسمت توهـا بتنطق الا يجيهـم ذاك الصوت المليان دفاشـة الدنيا : أنتوووووا اللي هنااااااك !!
أنقزت نوره وطالعت مكان هالصوت اللي عرفت صاحبته : نعم مس !
المس بغضب : بدل سوالف الحب والغرام اللي مسوينهـا هني روووح ألحقوا على الأمتحان لأني لو شفت رقعت وحدهـ فيكم عندي بالمكتب لا تلومون الا نفسكم ....
وضحى : مس مارن الجرررس ؟
المس : يعني ماسمعتوا مس ريم وهي تقول كل وحدهـ على صفهــا ...
نوره : لا ماكنـا حولهـا ... صلحوا المايك علشان نسمع كلنــا ؟؟؟
المس بصرخه : على لجاانكم أأشووووووووووف !
مشوا نوره ووضحى بسرعه على لجانهم وهم يضحكون

دخلوا اللجنه اللي هم فيهـا وكل وحدة قعدت على طاولتهـا المذكور عليها أسمهـا كانت نوره بأول الصف بينما وضحى بأخرهـ ...
.
.
.
درة الاحساء غير متواجد حالياً رد مع اقتباس