بعد الأمتحان طلعوا مستانسين لأنهم قدموا زيــن وبالأخص نوره كانت واثقه أنها بتجيب العلامه الكامله بهلـ ماده
بينما وضحى مغلطه بسؤاليـن ثلاث ... بس ضـامنه النجاااح بالكيميا ....
لبسوا عبيهم وراحوا صوب بوابـة المدرسـه ينطرون أهلهم يجون ياخذونهـم .... وقعدوا ع الكراسي اللي داخل المدرسـه وكل ماسمعوا هرن طلعت وحده منهم تشوف أذا السيارهـ لهم وله لا ..
نوره بيجيهـا أبوهـا أو نوااف ... بينما وضحى بدون تفكير السايق ...
نوره وهي تقترب صوب وضحى بعد ماراحت تجوف السيارهـ أذا لهم وله لا وقالت : وضحى .. في واحد كل يووووم أجوفـه صاف سيارته جدام المدرسـه ويطالع البوابــه ؟؟ توقعيـن أخو وحدهـ من البنات ؟؟
وضحى : أذا مب أخو وحده من البنات أأكيييد مغازلجي .. ماعليج منه طنشيييــه .....
نوره : المشكله مايوقف ألا بمكان قريب من اللي يجي نواف أو أبوي يصف به سيارته ... يعني لأزم أمر صووبــه كل يووووم علشان أركب سيارتنا..
وضحى بلا مبالاه : تلاقينه ولا داري عن هوى دارج ... ينطر أخته وله الحب تطلع له .....
نوره ضحكت : حلوووهـ الحب ... صراحه هالبنات ميانيــن شلون ينقص عليهم بهلـ سرعه
وضحى بنفس الأسلوب : قلتيهـا بنفسج ميانيـن .... كل من قال لهم أحبج صدقوه !! الله لا يبلانا بس
نوره بزلة لسان : كلش أنتي مب منهم ؟
وضحى ألتفتت عليها وقالت : شقصدج ؟؟
نوره : نسينا حب الطفوله
وضحى : ووووووي مالت .... تزووج وجااب عيال وكل ماشافني قعد يضحك على خرابيطــه .. كنا يهاااال !! كبري مخج ياماما ....

" صوووووووت هـــرررن حاشر المكان برى "

وضحى قامت تنهي هالموضوع وهي تقول : يااااااااارب يكون محمود رأف بحالي وجاااا ... بذبحه لو يتأخر زيادهـ ..
نوره قامت وقفت وقالت : خل أجي معاج ... يمكن يكون نوووااااف لأنه يموت على هالأزعاج ..
وضحى بغشمره وطيب نيه : أأخووووج فلله ....
نوره بعبط : لا بيت شعبي ...
وضحى ضحكت من قلبها : ههههههههههه والله وتطورنا وقمنا ننكت يانويييير ...
ماعلقت نوره أكتفت بأنهـا تبادلهـا الضحك
طلعوا يجوفون من ... طلع السايق الخاص بوضحى اللي رفعت يدها لسما وهي تقول : أأشكرك يااارب .. " تلتفت على نوره تسلم عليها بالخد" أأشووفج اليوووم العصـــر...
نوره ببتسامه : آآوكي أنطــرج ... والعاشق الهيمان ينطرج بعد
وضحى بغشمرهـ : الله يخسه أخووج هذا .. بوسي لي أياااهـ ..
نوره تضحك : صج مافيج ذرة حيا ... عييييب أستحي ..
وضحى : حلفي عاد !! ... مابقـى ألا أستحي من أعدادي ... " تقرب صوبهـا وتهمس بأذنها مغيرهـ الموضوع " ألا أقول تقصديـن ذااك اللي عند السياره السووودهـ ؟؟
نوره : أأيــه ... بس لا تطالعينه علشان لا يحسبنـا نتكلم عنه ..
وضحى : أن شالله عمتي .. يلا سي يو ...
نوره : سي يو تو ...

وضحى أبتعدت عنهـا وركبت من الباب الخلفي لسيارتهـا وفتحت الدريشه وطرشت لها بوسه بالهوى وأشرت لها بمعنى " باي "
تحركت سيارتهـا مبتعدهـ عن المدرســه ...
بينما نوره توهـا بترجع داخل ألا صوت سياره حشرهـا بالهرن ألتفتت ألا بنواف " أأخيراااااااااا ! "
رااحت له بســرعه وركبت أحذاهـ وسكرت الباب وهي تنافخ : كااان تأاخرت زياااادهـ ...
نواف : ووودي .. بس الهوى ضدي ....
نوره تمد يدهـا وتبند المسجل اللي ازعجهـا وتقول : مررني على مطعم ... أأبي أونس عمررري
نواف وهو يعدل نظارته الشمسيـه : خلاص راحت عليج .. أأمس طرشت لج غنوووم .. قلتي له ماتبيـن ومادري شنوو ..... اليوم مالي مزااج وعندي محاضرتيـن ورى بعض بعد ساعـه ونص
نوره بلمحة رجآ: عااد نويف ...!!! أمس كنت أدرس وأنت تدري أني ماراح أطلع فـمن جذي طرشته .. أعرف نذالتك أنا .... واليوم لما أرتاح بالي تقول مالك مزااج وعندكـ محاضرات ؟؟؟
نواف : زيييـن خلاص أشتغلت بس بالحنـه ... بوديج معصرهـ ماعندي أدفع حق مطاعم .. أمس أعلنت أفلاسي
نوره ماعجبها الكلام : لا والله .. أنا أكل من معصرهـ .... باأحلااااااامك
نواف يتكلم بنفس طريقة كلام أخته : لا يطييييح نصج بس .... " يعدل صوته " بشتري لج سندويج بيض بفلفل مع عصير برتقال وونسي رووحج فيهم
نوره : غلطانه أنا اللي طلبت منك توديني مطعم ... أنت وي مطاعم أنت .... حــدك مـ.....
قاطعهـا وهو يشغل المسجل من يديد ويدندن معاهـ مطنشهـا .. وهذي الحركه يسويهـا أذا مايبي يسمع كلام مايعجبـه ...
نوره بقهر : ترااااااااك بليييييد !
نواف : وأنتي أبلد ......
نوره صدت عنه ... ماتحب برووووودهـ ولا أسلووووبـه ولا حركااااته ... بس للأسف أنهـا تحبه..!!! معادلـة سهله موجودهـ بيـن بعض الأخوان !

.
.
فـ بيت أم زايد

كانت قاعده تنظف غرفـة زايد بعد ماتركها الصبح متجه للجامعـة وتشيل هالثياب المنثره يميـن ويســار : الله يـهـداك بس ...! مادري ليش مايحط الثياب المحتاجه غسيل على جنب والنظااف بمكانهـا ؟؟ لأزم يتهاوش مع الكبت كل يوم ؟؟
قامت تلقط الثياب المحتاجه غسيل وتحطهم على معصمهـا واللي مب محتاجيـن غسيل جمعتهم على جنب علشان لما ترجع تصففهم من يديـد داخل الكبت
طلعت من غرفته وهي تنزل الدري بخطوات موزونه لحد مانزلت تحت .... وسيـده راحت للحمام " الله يعزكم " اللي تحت...شغلت الغساله وبعد ماحطت الثياب ورشـت فوقهم صابون طلعت من الحمام وسكرت الباب وراهـا وخلت الغساله تشوف شغلهـا ..!! رجعت مرهـ ثانيـه تركب الدري راجعه لغرفة وحيدهـا ... وأبتدت تصفط الثياب بأهتمام وهي تستنشق ريحة عطرهـ مع كل ثيــاب تعدلهـا ... ببتسامه منورهـ ويها اللي هده الحزن : الله يخليك لي ويحفظك ....
قطع عليها شغلها صوت الجرس عقدت ملامحها بستغراب وتسأل .. تركت اللي بيدهـا وطلعت من غرفة ولدها وهي نازله الدري وسحبت الشيله تتغطـى فيهــا ولما وصلت عند باب البيــت قالت بصوت عالي علشان يسمعها اللي خلف الباب : مــــن ؟
ماجالها جواب !!!
أم زايد بستغراب وهي تعيد السؤال : مـــــــــن ؟؟؟
رجع الجرس يـرن ...
أم زايد بصوت واطي بالغصب ينسمع : أستغفر الله ....
فتحت الباب وطلت وتمـنـت أنهـا ماأستعجلت بفتح البــاب ألا بعد ماتاخذ القدر الكافي من الأكسجين لأنهـا أأأنـــــــصــــــــــدمـــــــــــــــــــت بالشخص اللي كان واااقف جدامهـا لدرجـة حسـت كل شي حولهـا توقف حتى نبض قلبهـا توقف عن ضخ الدم !!! ... سنيـن مرت ! لكن ملامحه ماتغيــررررت
أبتسم لها بحب وقال : شدعوه .. رحتي لأخر الدنيا ولا حتى زرتيني مرهـ ؟
حطت يدها الثنتيـن على حلجها من هول الصدمه بعد ماتركت الباب ...,.. دخل هو وسكر الباب وراهـ وهو يطالعها بشوق كبيييييييير ياما وياما أعترى قلبـه طول هالـ 20 ســنه وبصوت هادي قال : مشتاق لكم ..
صاحت وأذرفت دموع لا أرادياً .. بدون ماتحس لقت دموعهـا تنزل وكأنهـا شلالات ... مستحيل يكون هوو ... مب معقوله يكون طللع ...؟؟؟؟
بدون ماتحس لقت روحها هاجمـه عليه بكل شوق حاظنته بكل قوتهـا .. حاظنته بشوووق .. بوله ... بحب ... وهي تبكي من قلبها على السنيـن اللي راحت وهو بعيييد عنهـا .. وعن ولدهـا
غمض عينه ونزلت دمعه على خدهـ ... دمعه شوق ... دمعـة وله .. ودمعــه ألم ... دمعه مافارقته بكل ذيج السنيـن اللي راحت من عمرهـ بتهمه كان بريئ منــها بسبب وااحد ماخااف ربــه ولا تذكر أنه كما يديـن يدان !
ماتدري كم دقيقه مرت وهي حاظنته بقوهـ ... لأنها ماأنتبهت على روحها ألا وهي بالصاله معاهـ وهو قاعد أحذاهـا يتأملها ويدهـ مافارقـت يدهـا
سألته بعد ماهدت : متى طلعت ؟
بو زايد : صار لي 4 أيام من طلعت .. واليوم الخامس ..
أم زايد وصوتها شبه مختفي من الصياح ويدهـا مافارقـت يد بو زايد : وليش ماجيتنا على طوول ..." بألم " ليش تأخرت !
بو زايد : وأنا أعرف مكانكم أصلا علشان أجيكم على طوول ... رحت البيت القبلي مالقيتكم .... ولما سالت عنكم بطلعت الروووح لقيت حد يعرف عنوانكم .... وجيت ..!
أم زايد نزلت عينها بالأرض وهي تقول : غصبوني أطلع منه ... علشان أبتعد عنك وعن كل شي يربطني فيك .... وكانوا بيغصوبني أطلب الطلاق بس والله مااارضييييت ..
بو زايد وهو يرفع راسها : مثل ماغصبوج أنج ماتزوريني ... ولا تجيبيـن زايد لي !!!
أم زايـد صاحت من يديد : والله كنت أبي أجي .... بس .. " راح صوتها بالصياح من يديد "
بو زايد يحظنها من يديد وهو يقول : أدري ....أدري .... خلاص لا تصيحيـن .. نسيتي أني ماأحب دموعج ؟
أم زايد تبتعد عنه شوي وهي تقول : والله مانسيت ولا شي ,,, للحيـن أذكر كل شي يخصك .... كل شي ..
بو زايد بحب وعينه مليانه دموع لكنه حابسهم : تغيرتي .... شكلج أختلف شوي !
أم زايد أبتسمت له وهي تقول : شكلي من برى يمكن تغير .. بس من دااخل مازلت مثل ماأنــا ... ضعيفه ودووم محتاجه حد يساندني .. ومن بعدكـ الله عوضني بولدكـ
بو زايد سألهـا بلهفه لما طرت ولدهـ : ويــن زااايد !!؟ ماأشوفــه
ام زايد : زاايد بالجامعـه ... مب موجود ..
بو زايد حس بفرح لما سمع هالشي ... ولدهـ كبـــر ! ولا ودخل الجامعـه بعد ؟؟
لكنه بنفس الوقت حس بألم فضيييييع لما تذكر أنه كبر وعاش وتربى بعييد عن عينه قال وهو يحاول يخفي الصراع اللي داخله : متى يرجع ...؟
أم زايد وهي تتذكر ولدها ببتسامه : فديت قلبـه اليوم ماعندهـ محاضرات وايد ... راح يرجع مبجر علشاان يتغــدى معاااي مثل ماوعدني...
بو زايد بألم قالها : يدري أنـــي ........
قاطعته أم زايد وهي تقول : أأيـه يدري ... ويتذكر كل شي .. وعارف عدل أنك مظلووووم ....حتى يتذكر وبالتفصيل يوم سحبوهـ منك بالقوهـ ..... وماتدري شكثر يحبك ..
بصيص من الأمل أقتحم قلب بو زايد.. كان متوقع يرجع يلاقي ولدهـ كارهه ومفتشل منه قال : يدري بالقضيـه اللي أنسجنت فيهـا ,, وله بس يعرف أني مسجون مظلووم !!؟
أم زايد : يعرف القضيه اللي أنسجنت فيهـا ويعرف عدل الظااالم اللي دخلك السجــن مظلووم ..
بو زايد أنصدم من هالشي ٍسألها : شعرفه ؟؟ من قاله ....
أم زايد ضحكت بسخريه : مايحتاي حد يقوله ... قالها الظالم جدامه لأنه عارف ماراح نمسك عليه دليل
بو زايد تغيرت ملامحه... كساها الضييم والحقــد والكرهـ قال من كل قلبـه : حسبي الله ونعم الوكيل ......
أم زايد تبتسم له : ولا تهتم ... أهم شي أنك رجعت لنا .... رجعت لي وماراح تهدنا من يديد ...... وهو الله فووقــه .. الله ماينسـى عبيييدهـ
بو زايد بألم : ماتدريـن شكثر ودي أأذبـــحــه .. بس لما أتذكر نجاســتـــه أتعــوذ من أبليس ..... مب كفو أضيع السنيـن الباقيـه بعمري بالسجن من يديد ... مب كفو !!

.
.

كان قاعد بمكتبـه كاسيـه الأرتباك وصل له الخبر اليوم أنه اللي مايتسمى طلع من السجن ! شلون طلع ... معقولة الـ 20 سنه مرت بسرعة البرق بدون لا يحس .....
أخر مرهـ زار أم زايد كانت من 5 سنين ... من 5 سنيـن لحد هاليوم ماشافهم ,,, يمكن تهديد زايد لــه زرع بقلبـه شويـت خوف ...
للحيـن يذكر صوته الرجولي وهو يصرخ فيـه ..... ولو ماأمسكته أمه كان عادي يضربــه ويطحن أعضامهـ ... رغم أنه بالنهايـه راح يشارك أبوهـ السجن ...
كان يحبهـا ... ألا كان مجنون فيهـا .... ولما طلبت الطلاق منه وبعد عدتهـا على طول خذت أعز ربـعه .. حقد عليهـا وعليـه ..
كرهم أثنينهم ..... كـرهـ أبد ماينوصف .. حس روحه أنطعن بالظهــر !!! مايدري ليش ..... يمكن لأنه أعز ربـعه أخذ اللي كان يعشقهـا ويتمنى التراب اللي تمشي عليـه ؟
حب يدمر حياتهـا مثل ماجرحتــه .... والأهم من هذا ..... حب يضرب عصفوريـن بحجر
يهدم حياتهـا ويحرم اللي مايتسمى من ولدهـ ومرتـه ....
صحيح أم زايد لما خذتـه ... خذته مجبورهـ ,, وكانت عايفـه العيشـه معاهـ بسبب عصبيته الزايدهـ .. وتقلب مزاجه اللي مايعجبهـا
بس كان ممكن تاخذ أي واحد ... ألا سعود ..؟؟؟؟ ليش هم قلوا الريايل ...مالقت ألا سعوووووود !! سعود اللي كان رفيجــه وأغلى ربـعـه ..
جا لـه ذاك اليوم وطلب منه يبات عندهـ بالميلس يابلفيـت أنه زعلان مع أهله وفهمه أنه مب زعلان عليـه ولا شي وأنه هذا شي رب العباد كاتبـه ونصيبـهـا مع سعود مب معاهـ..
ولما تطمن سعود أنه رفيج عمرهـ رضـى عليـه .. وطاح الحطب مثل مايقولون ... ترك له الميلس بعد ماقضـى تقريبا الليل كله عندهـ .. وتركه ع الـساعه 2 ونص رايح يرتاح
هني أستغل الفرصـه وطلع جاب كل المـخـدرات اللي بسيـارته ووزعهـا بالميلس بكل مكــان بحيث أنه ماينوصل لهـا ألا أذا مشطوا الميلس تمشييييط !!!
ومن طلع النهـار ترك بيت رفيجه " السابق " وعلى أذان الظهـر راح بلغ عليــه .....و .....
قطع عليـه سلسلـة أفكارهـ الـكئيبـه دخول السكرتيرهـ عليـه وبيدها ملف به أوراق محتاجه توقيـعه .. زفر بأرتياح بعد ماصحتـه من ماضي رهيييب .. خايف من نتايجـه ....
رغم أنه بينه وبيـن نفسـه متأكد أنه ماغلط بشي ... كل اللي سواهـ كان رد أعتبــــار .. !!


في آحدى الجامعـات

كان قاعد في الكافتيريا يرتشف كوب قهـوه دافي ... وعينه مانزلت عن الشـاب اللي قاعد بالطاولـة اللي تبعد عنه شوي .... كان يضحك من كل قلبــه وبايـن أنه بالـه خالي وماعندهـ شي يعكر عليـه جووهـ !!
حط كوب القهوه على الطاولـة ومرر صبعه بطريقـه دائريـه حول حواف الكوب وكأنه بالـه أنشغل بشي ... شي محد عارفـه غيييــرهـ ..!
سمع صوت خطوات جايـه من وراهـ وعلى طول حط كتبـه على طاولـه وقعد مجابله وقال : آووووفـ ... مابغـى يفرج عنـا !....
رفع نظره وطالـعه بدون ماينطق
فهد بتسأل : أقول زيود .. خلصت محاضراتك وله للحيـن ؟
زايد ببرود : أيـه مخلص من زمان ..
فهد وهو يوقف ويشيل كتبـه : عيل قووم ... عازمك فـ ستار بكس
زايد بنفس البرود وهو ينزل عينه بقهوته ويرجع يمرر صبعه على حواف الكوب : لا بكس ولا سطـار ... قاعد أنطر ناس تطلع .. بعدهـا راح أطلع !
فهد بستفسار : ومن هم هالنـاس .. ماخبر جامعتنـا فيهـا بنات علشان تنطرهـا تطلع !!وتوصلهـا سالمه غانمه لباب البيـت ؟؟
زايد طالعه وقال : عندي اللي أهم من البنــات ...واللي يهمني أكثر منهم بعد
فهد رفع واحد من حواجبه وقال : لا تقول لي تنطر الحبيب اللي معلقك ومب مخليك تنام ؟!! ترى صج صج بطيح من عيني ’’
زايد : جربت هذا بويهك ؟ " يأشر على كوب القهوه "
فهد ضحك وقال : أتغشمر الله يهداكـ .. محشوم وتكرم عنهـم ..... " يأشر له براسـه " يلا قووم ع الساعه 2 لأزم أكون بالبيـت الوالد بعفسني لو أتأخر ثانيـه ..
كلمة الوالد تمت تتردد ببال زايد ... ! ليته مثل باقي الشباب ... لو رجع متأخر لقى أبوهـ يحاسبه ويهاوشه على تأخيرهـ ويحاتيـه من كل قلبــه !!!
... صحيح أمه ماتقصر من هالناحيـه أبد ! بس بعد هو شـاب .. ومحتاج لريال يفهمه
مهما تفهمته أمه ماراح تقــدر تحس فيـه كثر أبوهـ !!! " عقد ملامحه بدون لا يحس لما تذكر السبب الرئيسي باللي وصل له ابوهـ وضغط ع الكوب بقوهـ "
فهد أستغرب من حركة زايد اللي ساعات يضحك ويسولف .. وساعات يسكت ويصير بالعافيـه يقول كلمة ..... غررريب هالأدمي .. رغم صداقتهم اللي دامة من أيام الثانويـه .. ألا انه مازال مايفهمه عدل !!
ترك الكوب وقام وقف وهو يشيل هالكم كتاب وقال : مشيـنـا ...
تعـدى فهـد اللي أرتسمت على ويهـا علامة أستفهام كبيرهـ !! من تصرفـات زايد ... توه يقول مايبي يطلع ...!!!!
مر زايد على ذاك الشاب اللي كان يراقبـه وعطاهـ نظرات معناهـا أبداً مب مفهوم وهو ماشي ..... !! يكررررهـه .. ويكررررره اللي جاابـه ... ويكره كل أسم يرتبط بذاك الحقيير
فهد شال كتبه ولحق زايد وهو يقول : صبببر صبببر .. مسرع ماغيرت رايك !
زايد وهو يطلع نظارته الشمسيـه من جيب قميصـه : ليش منت ناوي ترجع مبجر ؟
فهد وهو يمشي أحذاهـ : بلا .. بس ع الأقل قول أنك بتجي معاي ... مب تشيل قشك وأنت رايح !
زايد بعد مالبس نظارته قال ببرود : آوكي ولا تزعل .. " طالعه " أنا جاي معاك !!
فهد بأسلوب سخريـه : والله ! أحلللف ... قول قسم !!
.
.

طلعوا من الجامعة وتفرقوا عند سيايرهم كلـن ركب سيارته متجهيـن لـ ستار بكس
زايد أول ماركب سيارته وحرك من عند جامعته طلع جواله يتطمن على أمه لأنها الوحيده اللي طول الوقت منشغل باله فيها .. رن وايد لكن ماحصل رد
زايد وهو يطالع ساعة يدهـ اللي تشير لـ 10 ونص . : مب معقولة نايمه للحيــن ؟ دومها تقعد مبجر مع أذان الفير !!
تذكر حوارهـ أمس معاهـا ولما قالت له أنهـا السكر مغربلهـا ... معقوله يكون نزلـ معاهـا هالمرهـ وهي علشان ماتزعجه مادقت لـه ؟!!! معقوله تكون مرميـه بغرفتهـا تنطر دخلته عليــها علشان يعطيهـا أي شي بـه سكر ,, معقولة لو يتأخر عليهـا زياادهـ راح يفقدهـا ..... !!
وصل عند الدوار وبدل ماياخذهـ وهو رايح يســار ... خذاهـ ورااح يميــن متجهه لبيـتـــه وهو يدعي من كل قلبــه أنهـا تكون بخيير !!
بينما عند فهد اللي كان يدندن مع المسجل أنتبـه على سيارة زايد وهي تغير مسارهـا .. رفع واحد من حواجبـه بغرابه : ها !! ويــن رايح هذا ؟
طلع جوالـه وأتصل على زايد لقاهـ مشغول ... رجع أتصل مرهـ ثانيـه هم مشغول !! لأنه من الصوب الثاني كان قاعد يتصل ع البيـت على أمل أنه يلاقي رد
كتب له مسج وطرشـــه وأنتظــر ردهـ لكنه ماحصل رد ...
فهد وهو يزفر من قلب : آووووووووووف .. الله يعيني على طبعك !! " بنفاذ صبر وهو يضرب السكان " ياأخي قول أنك غيرت رايك !!

الطريج رغم طولـه ألا أنه زايد وصل بسرعه .. صف سيارته عند باب البيــت ودقاته قلبـه تضرب ألف بالثانيــه عمرهـا ماطنشت تلفون البيـت ألا أذا كانت تعبانهـ وتعبانه واايد بعد !
وأذا جات تطلع تزور أهلهـا تعطيـه خبر ... لكن هالمرهـ ماعطتـه خبر ولا ردت ع التلفون .... مافي ألا جواب واحد لكل الأسئله اللي تزاااحم ببالـــه
آآآكيييد نازل معاهـا السكر ...!!! آآآكيييد
نزل من سيارته وبخطوات سريعه توجه للجرس وحط صبعه عليــه بدون لا يشيله ... وباليد الثانيــه قعد يطق الباب بخووووف أكتسـى قلبــه ...
حس أنه طول وهو يطق البــاب رغم انه ماكمل الـثانيـتيـن
نزل نظره لمخبى بنطلونه ودخل يدهـ يدور المفتاح ... وهو على هالحال أنفتح البــــاب
رفع راسـه بسرعه وأنذهل من هالرياال الغريب اللي فتح لـــه ؟؟؟؟؟؟


نهـاية البـارت الأول