Prt " 4"
راحت فتحت المـاي وأبتدت ترشــه بالحمام على كل أنــحــاءهـ ,, مستانسـه بالرذاذ ,,, حتى الفوطه المعلقـه داخل صادهـا مااي ,,, لكنهـا ماأهتمت تمت تلعب بالماي وتنثرهـ يميـن ويسـار
بالمرهـ تتسلى وعلشان تنظفــه ,,,,
ألتفتت تبي تسكر الماي بعد ماغرق الحمام أنصعقــت باللي لقتــــــه بغت تصرخ بس ماقدرت !
بريعصي شكله مقرف وحجمه كبير مستقر وراهـا بالضبط ,,, بغـى يغمى عليهـا من الخرعه ,,, وطلعت ركض من الغرفه كلهـا ونزلت الدري بأسرع ماعندهـا
وشافت أمهـا تمسح الصاله بالممسحه : يمــآآآآآآآآآآآآآآآآآآآآآآآآآآآآآآآآآآآآآآهـ !!!
أم نواف ألتفتت عليهـا ,, ألآ " طــآآآآآآآآآآآآآآآآآآآآآآآآآآآآآآخ "
زلقـت نوره ورضخ راسـها خوش رضخه بالأرض ,,,,
أم نواف تركت اللي بيدهـا وراحت لهـا بسـرعه : ووي !! يمــه شفييييج ؟؟
نوره حطت يدهـا على راسهـا من ورى تتألم قالت وهي حابسـه صيحتهـا من الخرعه .. : في بريعصي بحمام نوافوهـ
أم نواف وهي تخليها تقعد على حيلها وتقول وهي عاقده ملامحها : خضيتي قلبي عليييج ,, علشان بـريعصي .... !!
نوره وهي مازلت تتألم من راسهـا وتحس روحها صدعت قالت بتنرفز خفيف : وتقوليـنهـا بكل سهولة بريعصي !! أنتي لو شفتيـــه بيشيييب شعرج من الخرعه ... كبيييييييييير ... ضببببب مب بريعصي !
أم نواف توقف بنتهـا : قومي بس قومي ,,, خلي حمام نواف .. وروحي حمام غنووم
نوره بسرعه : لالالالالالا !! لو أموووووت ماأدشـه ... أذا حمام نواف النظيف المرتب اللي يشرح النفس طلع لي فيـه بريعصي ,, " تتخصر " حمام غنيييم شبيطلع لي فيــه ....؟ فيرااااان ؟!!
أم نواف : يانوير أبوج بعد شوي بيجي يبي يشوف البيت نظييف !!! بتساعديني وله شلون ؟؟
نوره وهي حاطه يدهـا على راسهـا وتتجه صوب باب الصاله : بنظف الحووووش .... أبررك لي
طلعت وسكرت الباب وراهـا نزلت الدري اللي جدام باب الصاله بخفـه وهي عاقدة ملامحها من الصداع اللي جالهـا بسبة الضربـه ....
راحت جابـت المخمــه ومرت ع الغرفـه المبنيــه بجزء من الحوش وكانت شبـه صغييــرهـ ,, ومفتاح هالغرفـه كلـه عند أبوهـا من يومهم صغار مايسمح لهم يدشونهـا ماتدري ليش
ولما تسألـه عن السبب ؟ يقول لها علشان لا يتعبثون بأغراضه المهمه .....
وكذا مرهـ يشدهـا الفضول تعرف شفيهـأ ولما تحاول تطل من الدريشـه ماتقدر بسبب الستاره الغليضــه اللي مافي أمل ينشاف منهـا أي شي ,,, لدرجة أنهـا تشك أنـه نور الشمس يوصــل لهلـ غرفـه !!!
تنهدت ووخرت يدهـا عن راسهـا .. سحبت المخمــه وأبـتــدت من الدري اللي عند باب الصالـه ,, تـخـــم ....

.
.

بيت وضحى



كانت قايمة من صباح الله خير .. تنطر الساعه تصير 8 علشان تروح المدرسـة تجيب النتيجــه ....
لو كانت تعرف شلون تطلع النتايج من النـت جان وفرت عليهـأ هالعنـا ... كانت بغرفتها تحط لها ميك أب خفيف جداً عباره عن مسحـة بورده على ويهـا وقلوس وكحـل ,,
وشعرها القصير اللي يوصل لتحت نهاية رقبتهـا بشوي وغلييض .... خلته مفتوووح ماحاولت تلفـه !!
راحت سحبت لها عبايـة من كبـتهـا ولبستهـا .. وأقرب شيلهـ حطتهـا على راسهـا بأهمال وطلعـت مستعيله بعد ماخذت جوالهـا ودقت على نوره تبي تشوفها خذت النتايج وله للحيـن
رن وايد بس محد رد عليهـا ,,,,
وضحى : ياااابروودج يانوير لو تكونيـن نايمــه ...
رجعت أتصلت من يديد ,, وهم مالقت رد ... وللمرهـ الثالثه والأخيرهـ أتصلت وماجالهـا رد ...
أستقرت بالصاله وكملت مشي وهي طالعه من باب الصاله متجهه صوب السياره وعينهـا بـجوالهـا تكتب مسج لنـورة
" يالعنــز يالدبــه يالبليييييييييدهـ يالباااااااااااردهـ ,, النتايج اليوم وأنتي شبعانه رقااااد رقدت على عدوووج طووفـــه ...... !! "
طرشت المسـج وشافت السايق واقف جنب السياره قالت له وهي تمد يدهـا : عطني السويييج .. أنـا بروح
محمود بأدب : مدام ...I can t
وضحى : ياأخي مب رايحه بعيد .. مشوار قررريب ... رايحـه المدرسـة وبرجع .....
محمود : بـابـا ...
قاطعته : ماراح يقول شي ,,, هو راح يهاوشك لو طلعت أتمشى بروحي ... مب علشاني رحت المدرسـة وجييت ...
محمود برجى : بلييز مداام ,, بـابا في جنجال !! بلييييييز
وضحى بتملل : ياااللله ماتفهم .. أقولك بروح المدرسـة مب مسيعــييد !! ...." ترجع تمد يدها " عطني المفتاح يلا ذليت أمن جابتني على السيارهـ ..
محمود بعد تردد طلع السويج وعطاهـا آياهـ ... خذته وركبت السياره وحركتهـا طالعـه من البيييـت متجهه لمـدرستهـا ....

بعد فتره بسيطـه وصلـت المدرسـة شافت سياير شكثر عندها
وضحى وهي تبند السياره وقلبها يرقع من الخوف : الله يستــر ,,, بموت من الربكــه ...
رجعت طلعت جوالها وأتصلت على نورهـ .. لكـن نفس الشي ماترد ..
وضحى بقهر : الله ياااخذ أبليسج يانويير ,,,
نزلت من السياره وسكرتهـا وقفلتهـا ,,, ودشت المــدرســه تاخذ نتيجتهـا
أول مادشت لقت بنات طالعيـن متشققيـن ولما شافوهـا وقفوا يسلمون عليهـا ويسألون عن أخبارهـا بينما البعض الثاني من البنات اللي تعرفهم سووا نفسهم مايعرفونهـا ومروا من جنبهـا خطف !!
.
.

بيت بو نواف

كانت توهـأ مخلصه خمام الحوش والشمس حااارهـ رغم أنهم توهم الصبـــح ... وتحس العوار اللي براسهـا أنقلب صداع .....
سندت المخمه على أقرب طوفـه بالحوش ودشت داخل البيـت لقـت الصاله تلمع من النظــافــه ,, وأمهـا محد ... شكلهـا راحت تنظف الحمام الله يعينهـا ع الوحش اللي بحمام نواف
ركبت الدري بخمول وتكسر وتعب وراحت غرفتهـا ,, فتحت الباب لفحهـا الهوى البــارد حست بأنتعاش .....
حذفت روحها على السرير وزفرت بتعـــــب وهي تحس ظهرهـا ذابحهـا ,, بعد 5 دقايق بالضبط قعدت على حيلهـا وفتحت درجها تطلع لها حبـة بندول ,,, وقامت طلعت من غرفتهـا ونزلت تحت تجيب لها ماي
أول ماوصلت المطبخ خذت أبرد غرشة ماي بدون ماتصب لها بقلاص وشربـتـهـا بعد الحبـــه ,,, ورجعتهـا بالثلاجهـ ....
ورجعت مرهـ ثانيـه تركب الدري ,,, وصلت فوق .. حذفت روحها على الكرسي اللي بالصاله وأنسدحت مافيهـا حيل تكمل مشي ليـن غرفتهـا ,,,,, غمضت عينهـا بترتاااح لهـا شوي
ألا صوت نغمـة جوالها المنبعث من غرفتهـا واصلهـا ,,,
نوره تنقلب لصوب الثاني وتدفن ويها بالكرسي : آفففففف .. أأبي أرتااااح حرام عليكم ...
ماراحت ترد ع الجوال خلته يرن ليــن سكت من نفســه ,,,,
رجع رن من يديد ونوره مسويـه له خوش طاف .. آخر شي سمعت صوت جوالها يعلن أستقبال مسج ...
نوره تنافخ : آففففففففففففففففففففففففففففف .. من عديييييمـة الذوق اللي مسندرتني من صباح الله خيير !!! آآكييد سلييو محد يحررق التلفون جذي ألا هيي أف !
قامت من ع الكرسي وراحت غرفتهـا حذفت روحها ع السرير ومدت يدها صوب الكومدينه وخذت جوالهـا شافت 5 مكالمات لم يرد عليها .. ومسجيـن وكلهم من توأم روحي اللي هي وضحى
نوره عقدت ملامحها وهي مازالت مستلقيه ع السرير : شسالفه ؟؟ ... شفيـهـا وضوح !! العاده تتصل مرهـ مرتيـن بالكثير وخلاص شطاري عليهـا اليوم ؟؟.... " أتصلت لها وهي تقول " الله يستر
مايمديه يكمل الرنه الأولى الا صوت صراخ وضحى جايـها : يالعفنه يالبـااااااااااااااردهـ ياأم الرقااد... جوالي زهق عيشته وأنا أتصل لج وأنتي ماغير خامــدهـ ... شنو عندج بيات شتويي !!!!؟
نوره بعد ماخلصت وضحى سلسلة الزف قالت : بل بل بل ,, كلتيني بقشوري حتى سلام مالحقت أسلم !!!! .. وبعديـن من قالج أني خامده خمد على عدوج يني .... كنت أأكرف بالحوووش وأأخـــــم ... أقولج كنت بنظف حمام نـ....
وضحى قاطعتهـا : مب شغلي شكنتي تسويـن .. ثاني مرهـ لا أتصلت لج الجوال يكون عند راسج يامال راس عدوج البط أن شالله .." شوي وبتصيح " مخليتني رايحه أجيب النتايج بروحي .. بالله راسبــه من يواسيني !!
نوره فزت على حيلها وقالت بصوت عالي مليان صدمه : النتايج اليوممم !!!!!!!!!!!!!!!!!!!!
وضحى : كملي بياتج الشتوي ,,,,,!! بــآآآآآآآآآآآآآآي
سكرت بويهـا
نوره أختبصت ماعرفت شتسوي .. النتايج اليوم وهي ماراحت تجيبهـا ,,,, قامت طلعت ركض من غرفتهـا ولما وصلت لعند الدري تذكرت أنـه نواف محد وأبوهـا بعد محد !!
مافي ألا غنووم يقوم ويجي معاهـا علشان تقدر تروح مع السايق .....
راحت ركض غرفـة غـانم لقته متعمق بالنوم اللحاف شرق وهو غرررب ..... والمخدهـ حاطهـا على راسهـ
وقفت عند راســه وهزته بقوهـ : غنووووووووم قوووووووم !! بسررررررررررعه تكفـــى
غانم وهو يتقلب بصوت نايم : هاااااا هاااااا هااااااااااااااااااااااا !!
نوره تشيل المخده عن راسـه : قووووم ودني المـــــــــدرســــه النتايج طلعت
غانم : شايفتني صافلج اللكزس عند البــاب علشان أوديج !!
نوره تضربه بالمخده : بــــلآآآ ملاااغـه وسخاافـه ع الصبح .. شلوون أركب مع السايق بروووحي
غانم وهو يسحب المخدهـ منهـا ويحطها على راسـه : نت ماي بزنس !!
نوره بأصرار : قووووووووووووووووووووووووم .... ذليتنــي ...
غانم يغمض : لا تحاوليـن .. آبي أنــام أمس راقد متأخر
نوره بصراخ : مب مشكلتي !! محد قالك أسهـــر !
غانم بصوت ينقطع تدريجياً : وهم أنـا مب مشكلتي اذا ماجات تطلع نتايجج ألا اليوم !!
نوره بعد ماطبعت يدهـا الثنتيـن على ظهـره بقوهـ وبقهر : نـاااااااااااااااااااااااااااام ... نااااااااااام يعلك ماتقوم ... أستغفر الله ..
غانم بلعانه : هالدعوهـ المحترمه .. راح توصل لسلطات العليــه أول ماأشبع نوووم
نوره ضربت ريلها بقهـر وهي طالعه من غرفته وترضخ البــاب بكل قوتهـا وراهـا بغت تكسرهـ
غانم بصوت عالي : اللحيـن شذنبــه البااااااااااااااااااااااااااااااااااااب !!! مالت عليج من اخت
.
.

دشت غرفتها وهي تدور على نفسهـا ومايطري ببالهـا غير " النتايج اليوم !! "
راحت خذت جوالهـا وأتصلت على وضحى
ردت عليها من طرف خشمها : خيير !!
نوره برجى : بلييييز وضوح جيبي معاج نتيجتي .... بلييييز
وضحى : عناد فيج و ياجزهـ هالتنقيعه المحترمه ع الجوال ماني جايبتهـا اللهم بشوف أسمي موجود بقائمة الراسبيـن وله لا .... أذا مب موجود بطير اخذ شهادتي وبقهرج....
نوره بغضب : أأحســن .. الله لا يحوجني لج
وضحى : ولا لج
نوره : باااي
وضحى : بايييـن !
نوره : ثلااااااث
وضحى : أررررررررررررررررررررررررررررربع
نوره سكرت بويها بتنرفز ,, بغت تصيييح من القهــر تبي تاخذ نتيجتهـا ومحد معبرهـا
أتصلت على نواف يمكن يكون خلص محاضرته ويقدر يجيهـا ....
رن شوي وطلع لهـا مشغول .... لأنه ضغط ع الزر الأحمر ...
رجعت أتصلت من يديد مارد عليهـا ......
تنرفزت ..
مابقـت الا سلوى !!
قالت بتفكير بقلبها " أأخر مرهـ شفتهـا كنـت متهاوشـه معاهـا !! ... يمكن ماترضى تكلمني ؟ ولـــه تطنشني مثل وضيييح ... آآآآآآآف يالقهــر ... لا ماأظن سلوى تسويهـا .. ماتشيل بقلبهـا واايد أساساً ........"

بعد تردد أذا تتصل ولـه لا ,, شالت تلفون غرفتها وأتصلت على بيــت خالتها واللي يصير يصير !
شوي ألا تـرد عليهـا هنادي : ألوو !
نوره : ألوو هلا هندوووهـ ...
هنادي : أهلييين .. شلوونج قلبي ؟
نوره : بخييير
هنادي : وشلون خالتي وريل خالتي وأخوانج
نوره مب بمزاج لهلـ سلامات قالت : كلهم بخير .. هندووووهـ بليييز عطيني سلووى ..
هنادي : سلوى محد .. راحت تجيب شهادتهـا
نوره بصدمه : ماطلعتهـا من النــت ...
هنادي : بلا ,, ولما ظـمـنـت النجاح والنسبـه الحلوهـ راحت تجيبها علشان تكمل فرحتهـا ....
نوره بأحباط والدمعه بطرف عينها : ماشافت نتيجتي
هنادي بعد تفكير : مممم والله مادري عنهـا ... ماسألتهـا ..... أتصلي على جوالهـا يمكن جافت لج
نوره : خذته معاهـا ؟ ولـه كالعاده ماتدري ويـنه
هنادي ضحكت بعدها قالت : لا لا خذتــه .... أتصلي لهـا
نوره : أوكي مشكوررهـ ... بااي
هنادي : باي

سكرت وعلى طول أفترت لجوالهـا وأتصلت على سلوى
رن شوي وجالها صوت سلوى : ألووو
نوره ماعرفــت شلون تتكلم معاهـا فقالت بعد تردد : هلا سلــوى شلونج
سلوى بونـاسـه : بخيييييرررر ,, دريتي نجحــت ... نسبتي 98 ...
نوره كانت متوقعه أنه سلوى راح ترد عليهـا عادي لأنهـا ماتشيل بقلبهـا فقالت بفرحه لها رغم أنها بتموت وتعرف نتيجتهـا : مبروووووكـ تستاهليـــن ...
سلوى : الله يبــارك فييج ,, ها بشري ؟ وأنتي ناجحه ؟
نوره تحطمت من قلب : ماادري ماخذت النتايج .. ليش أنتي ماشفتي نتيجتي معاج !!
سلوى : لا .. ماشفتهـا لسببيـن أولا من الونـاســه ماقدرت أشوفهـا وثانيـاً لأني زعلانه عليييج قلت احرقصج
نوره خلاص صاحت : حراام عليكم والله أبي أعرف نتيجتي .. كنتي اخر أمل لي ...!! ... ووضوح ماتبي تجيبهـا معاقبتني يابلفيييت ...
سلوى كسرت خاطرها فقالت : أول ماأرجع البيـت بشوفهـا لج ....
نوره : متى ؟
سلوى : مادري .... أبوي بيودينـا نتريق بمطعم ... !! يمكن أتأخر
نوره : خلاص خلاص مشكورهـ قلبي ... أنـا بدبر نفسي
سلوى تحاول تقويهـا : لا تصيحيـن نويييير أأكييييد طايفـه الـ 100 ... خبرج أنتي حمص
نوره ضحكت بالخفيف وقالت : ماأبي أطوف الأميـه ولا شي .. أبي أجيب 97 أو أكثر ماأبي أقل
سلوى : أن شالله بتجيبينهـا ونسوي أكبر حفلة تخررج ببيتنـا ولـه بفندق ..!!
نوره : آآآميييييييييييييييييييييين... يلا فديتج أخليج ...
سلوى : الله معاااااج .. وبشريني
نوره : آوكي .. باي
سلوى : باي

حذفت الجوال أحذاهـا وكملت صياح من القهـر ,, طول أيام الأمتحانات تكرف وشاده حيلهـا واللحيــن لما جات تشوف النتيجه محد متفرغ لهـا ,,, باجر الجمــعــه يعني لازم تنطر ليوم الأحد وهي مافيهـا صبر تنطر ساعتيـن ثلاث ليـن ترجع سلوى البيت وتعطيهـا النتيجه !!!
وسط صياحها سمعت صوت جوالها يعلن أستقبال مسج
فزت وخذته يمكن وضحى رحمت حالها وطرشت لها أذا هي ناجحه وله لا ,,
فتحت المسـج بس تحطمت لما طلع من نواف يقول فيـه
" أنـــا بالـمــحـاضــره ... أذا تبيني ضروري ... دقي لي بعد ساعه ونص "
مـدت بوزهـا بزعل توهـا بترجع جوالها مكانه ألا جوالها يرن
" توأم روحي يتصل بك "
على طول ردت ...
ألا وضحى متشققه من الونــاســه : نوووورووووووووه نجحـت ......
نوره بيـنهـا وبيـن نفسهـا أستانسـت بس قالت وهي تمسح دموعهـا : شسوي لج أرقص لج يعني !!!!
وضحى وهي تضحك بهبال : يالخاايسـه هذا بدل ماتقوليـن لي مبروووووووكـ ,,, 96 بعيـــن العدووووووووووو
نوره تلعب بطرف بلوزتهـا وتقول من طرف خشمها : مبروك !!
وضحى بضحك : وترى حتى أنتي ناجحــــــــه يالدبــه ... جيكت على أسمج .. مالقيته وسط الراسبيــن تنكــدت <- من ورى قلبهـا
نوره نقزت بسرعه من الفرحه : واااللللللللللله ... كم نسبتي !!
وضحى : شدراني ,, لأزم أنتي تجيـن وتااخذيـن شهادتج .... " بفرحه " مبروووكـ علينـــا .....
نوره بوناسه : الله يباااااااااااااااارك فيج .... باي باي بروح أبشر أمي
وضحى : آوكي باي

سكرت وضحى من نوره وهي تضحك من الفرحه ومن ردت فعل رفيجتهـا
ركبــت الســيـاره وحطت شهادتهـا أحذاهـا ,, بتروح البيــت تبشــر أمهـا ,,,,,, وبتتصل تبشر أبوهـا تبي العالم كلهم يفرحون معاهـا أخيراً بتدخل الجامعه ..
الطريج كان طويل بس من فرحتهـا حســتـه قصــيــر صــفــت السيــاره داخل البييـت ونزلت منهـا بعد ماخذت المفتاح وسكرت الباب بقوهـ
وعلى صوت تسكير البـاب طلع محمود من ملحقـه وجا لها بسرعه وقال بخوف : مـدام .. وااااجد تأخير أنتــآ!!
وضحى تمد له المفتاح وتحذفه براحـت يده : ماتأخرت ولا شي ساعه ورجعت لا تسوي لي فيهـأ أنك تحاتيـنـي ,,, أشكــرهـ خايف ع المعــاش ...
محمود بلطف : No .. مدام أنـا في خوف على أنتآآ ميبي أنتآ مايعرف يسوووقـ !!!
وضحى تسكته : خلاص خلاص ماأبي أسمع زيادة حجي .... لا تعكر لي مزااجي ....
تركته ودشت داخل البيييـت .. " آآففف هندي ملللغ .... صج طيييب ومعانا من كنا صغــار لكـن بعد ملللغ ويستفز ساعات ....... ياحلاتك ساكت بس ! "
دشت البيــت وهي تنادي بأعلى صوتهـا على امهـا ,, لكن ماحصلت رد ....
نادت الخدامة ولما جات .. سألتهـا عن امهـا قالت أنهـا طلعت من الساعه 7 ... وماتدري ويـن راحت ... ولما سالت عن أبوهـا جالهـا نفس الجواب اللهم هو رااح الشغل بس امهـا آآكيييد راحت لربعهـا !!
وضحى لما مالقت حد يشاركهـا وناستهـا قالت بفرح للخدامه : مايـاا .. نجــــــــــــحـــت ...
شافت أبتسامه باهته على وي الخدامـة ماتحمل أي تعبير للفرح بس الأكيد أنهـا مجامله وقالت لهـا بالأنجليزي مبرووك .... مبروك بارده .. تعور القلب أأكثر من ماتـفــرحه !!
وضحى تضايقت !! صرفتهـا وراحت فوق جناحهـا قعدت بـ صالتهـا وفتحت شهادتهـا تشوفهـا درجاتهـا كلهـا مرتفعه ,, ونسبتهـا حلوهـ ......واحلى من الحلوهـ
ولا بحياتهـا حلمت تاخذهـا ,, كان طموحها دايماً عند الـ 87 أو 88 أو بالكثير 90 ..... بس 96 وآآيــد بالنسبـه لهـا
سكرت الشهاده بحزن وهي تتخيل شكل أم نوره لما تقول لهـا بنتهـا أنهـا ناجحــه اأكيد ماراح توسعهـا الدنيـــا من الونــاســـه ,, آآكيييد مابتخلي حد من قرايبهـا وأهلهـا ألا وبتقول له بنتهـا ناجحه ,, وراح تدخل الجامعه بأذن الله ,,,,, بينما هي .. أمهـا محد ,,,, وأكيد ماتدري أذا النتايج اليوم وله لا ,, زيـن منهـا تدري أنهـا خلصت أمتحان !!!
حاولت تفرح نفسهـا بأمل زائف ...يمكن أبوهـا يستانس ...؟؟ خذت جوالهـا وأتصلت على أبوهـا وبعد ماطول بالرنيـن جالهـا صوت أبوهـا الجدي : هلا
وضحى بفرحه : يافديت احلى هلا ,,, من أحلى ابو بالدنيــا
أبو وضحى بجديه : هلا وضحـى ,, أنـا مو قايل لكم لحـد يتصل فيني وأنـا بالشغل !!!! تحرجوني جداام الوفــد وأنـا كل شوي مستأذن وتارك لهم الأجتماع وطالع ... شنو ماعندي شغله ألا أنـتـوا
وضحى أنمغص قلبهـا قالت بشبح أبتسامه تحارب علشان تبقـى وماتحتل مكانهـا الدموع : يبــه نجــحــت
بو وضحى بجفاف : مبروك .... في شي ثاني
وضحى غرقت عينهـا بالدموع وقالت بصوت خافت جنه جاي من بئر : لا ...
بو وضحى : يلا عيل مع السلامه ...
وضحى : مع الـ....." ســكـــر "
ماقدرت تستحمل أكثر أنفجرت بنفسهـا وقعدت تصيييح وتصيييح .... وهي مغطيــه ويهـا بيـــدهـا ...

بينما ببيت رفيجتهـا العكس تماماً
كانت حاظنــه امهـا وتناقز من الونــاسه : نجحـــــــــــــت يمـــه نجحـــــــــــــــــــــــت .......
أم نواف وهي مب سايعتهـا الدنيا : مبروووووووووووووك يابنتي ألف مبرووووكـ ..... وآخيراً بشوفج بالجامعه ...
نوره تبتعد عن امهـأ وتقول وهي تلهث من كثر المناقز وخصلات شعرهـا تبعثرت على ويها وبفرحه كبيره غامرتهـا قالت : مب مصدقــه نجحــت ,,,, " ترجع تناقز من يديد " وآآآآآآآي !!.... اللحيـن باقي النسبه ... ياااااااااااااااااااااااااارب 97 .... وأأذاا 100 ماراح أزعل نـعمــة ...
أم نواف ببتسامه عريضـه مليانه حنان الأمومه : تستاهليـن مليون بعد مب بس 100 ..... آآمشي خل نبشر أبووج
نوره ركضت تبي تسبق أمهـا لتلفون وهي تقول : آآنــــا بقول لـــه ....
نزلت من الدري تركض ووراهـا امهـا تمشي بسرعه وعند الدري خففت السرعه لحد ماصارت تنزل على مهلهـا
وصلت نوره الصاله وقعدت ع الكرسي جنب التلفون وهي تقول : ووووي يايمــه ... سلحفااهـ ..... مافيج لياقــه
أم نواف بعد مانزلت الدري وصارت على أرض الصاله : خليـت اللياقــه لج ... وخري أشوف وخري خل أقـعـــد
نوره بدلع وهي ترفع سماعـة التلفون : موووبي ,, مووووبي ,, أنـا اللي ناجحه وله أنتي ! أنــا بكلمــه .....
أم نواف تسحبها من يدهـأ تخليهـا توقف وتوخرهـا وتقعد هي : أجووف هاتي ,,, خل أدق له بالشغل
نوره : مب لازم نسمع صوت السكرتير بو نفس خايســه ,,, على طووول دايركت نتصل لبابي ,, ونقول لــه
أم نواف وهي تمسك السماعه وتتصل : يمكن يكون عندهـ شغل ولـه شي ,, تبينه يقلب فرحتج نكـــد
نوره تقعد على ركبتهـا أحذى امهـا : مايسويهـا باباتي ...... أقص أيدي لو ماقال لي بيسوي لي حفلـه بأكبر فنادق الدوحــه
أم نواف وهي تسمع الرنيـن ورافعه واحد من حواجبهـا : آي هيييـن !
نوره بحرهـ ممزوجه بدلعها : يمـــــه ....!! أصلا حتى لو ماسوا لي راح تسويـن لي أنتـي لأنه خالتي بتسوي حق سلوووى ... وماأظنكم يالخوات تسون شي بدون ماتستشيرون بعضكم
أم نواف ماردت عليهـا لأنه جالهـا صوت السكرتير : ألووو .... هلا أخوي ... بو نوااف موجود ؟؟؟ آآهـاا .. أوكي حولني عليــه .........." سكتت وهي تطالع بنتهـا وأول ماجالهـا صوت بو نواف عطت السماعه بنتهـا "
نوره بصرااخ وفرحه : ييييببببببببببببببــه نجـــــــــــحـــــــــــــــــــــت
بو نواف ببتسامة عريضه : طلعت النتايج !!؟
نوره بصراخ ووناسه : آآيــــــــــــه طلعت قالت لي من شوي وضووووح
بو نواف بفرحه خفيفه : مبرووووووووك يابنتي..... من قدج اللحيــن دااشـه الجامعه !!!
نوره بفرحه : وآآآآآآآآآآآآآآي يبــه ماتصدق شكثثثر مستانســه ... بس قالت لي وضحى أني نجحت أستخفيـت لو تقول لي نسبتي مادري شبيصير فيني ...
بو نواف : تستاهليـن كل خير يانورهـ ,, ولج أحلى هديــه لأحلى نورهـ بالكــون
نوره ببتسامه عريضـه : شنهـي ,,,
بو نواف : مب جني عطيتج وي وآآيــد ... يلا يلا بــاي لما أرجع يصير خير
نوره بحب لأبوهـا قالت بدلع : أفف زيـن بنطركـ مو تتأخر ...
بو نواف : لا مابتأخر ع الساعه 1 أن شالله أكون عندكم ....
نوره : آآوكي يبــه ,,, ننطركـ
بو نواف : آوكي يلا مع السلامه

أرخى يدهـ وحط السماعه وهو على ويهـا شبح أبتسامــه .. فرحان لفرح بنتــه .... رغم الكتـمـه اللي على صدرهـ من وفـاة سعــود
يمكن يكون حزن رغم أنه ينكر هالشي ,, ويمكن يكون شي ثاني هو نفســه مايدري شنهو !!
معقولة تأنيب ضميييير ؟؟ وويـن ضميره كل هالسنيــن ... ماصحى ألا لما مــات سعــوود
بو نواف بصوت مسموع رغم أنه واطي : لا ..... مب تأنيييب !! وليش يأنبني ضميري .. مب أنا اللي ذابحــه ..... هذا يوومـــه " نفخ من قلبه وهو يقول " ماأبي أفكر بهلـ ماضي اللي صاير لي مثل الكابوس ملازمني صاحي ونايم ,,,, أنـا مرتاح مع أهلي اللحيــن صحيح ماأحب حنان ... بس متعود عليهـا وكفايـة أنهـا آم عيالي !! أم نواف ونوره وغانم وريم .... الله لا يفرقهم يارب ولا يبعدني عنهم
تردد ببالهـ كلام عقله اللي قال بقسوه " خاايف !! ... خااايف يافايز تبـتــعد عنهم ؟ مثل ماأبعدت سعود عن مرته وولدهـ!! من حقك تخاف .. وليش أساساً ماتخااف ..... ماتــدري ! يمكن الزمن يرجع يعييد نفســـه
يمكن العشريــن سنه اللي صارت ماضي اللحيــن ... تكــون مستقبلك المشؤووم !!! .. المستقبل اللي ماتقدر تنكر أنك خاايف منــه .....وخايف وآآيد بعد !!.... "