هنيكم يا هل الوطن والسعد ...... فوق
باميركم ساس الكرم ......... والسماحة
هنيكم في رؤيته كلها .............. ذوق
الذوق راقي والبراعة ............ سلاحه
نجل المليك اللي بنى المجد .... ويلوق
بنى لكم مجد وسيع ........... المساحة
والبحر الاحمر بالخبر يطرب .... الشوق
يطرب له اللي معتني ......... بالسياحة
يا ليتني في ديرتي والحق ..... الحوق
احجز مكاني بينهم ............. بالبراحة
اما اتجول فوق الاطعاس ...... وعروق
والا اتشمس مفترش شاطي ...... راحة
والا مع اللي بالسفينة بها ......... سوق
ربانها متخصص ................ بالملاحة
تجري بنا من حولنا كل .......... غرنوق
هذا يطير وذاك يرخي ........... جناحه
أخير من ديرة هل السرق ....... والبوق
دليلهم خلى السياحة ............. مناحة
هذا يبتزك ياخذ الطاق .......... مطبوق
وهذا تهديده معلنه ........... بالصراحة
ما ينفعك جيبك وقفلك ...... وصندوق
والله ابتدفع والا تسمع .......... وقاحة
خلك بدار ما حوت كل .......... مطفوق
دار المعزة تعتزي في ............ صلاحه
وخل الردي يجلس على الدرب مفهوق
يندب بحظه وينشغل ........... بالنياحة
والبحر الاحمر شوفته تجلي ..... الموق
وتغوص أعماقه او تعوم ...... بضحاحه
من شوفته تبدع على كل ....... طاروق
ويذكر عليك اللي بعيد .......... أمراحه
يطري حبيب كامل الزين ........ زملوق
أدعج غنج كله جمال ........... وملاحة
فايق جماله بالغنادير ............. مرموق
متميز من بينهن ............... بالفصاحة
ما شفتها بالزين مع كل ......... مخلوق
من شافها قامت تزايد ........... جراحه
قربه علاج اللي من الشوق .... محروق
يزيد شوقه ويتزايد .............. جماحه
يا ديرتي الله يجيرك من .......... العوق
ويسعد بك شعبك في مساه .. وصباحه
يا ديرتي مانتي رخيصة ولك ..... شوق
مير اللي مثلي منجبر ........ في مراحه
حبك بقلبي مسكنه كل ........... معلوق
يجري بدمي يا بعد كل ............. واحة
القارظ العنزي