زين مبدا الرجم الي والشمس حيه

بعد صليت العصر والفي مالي




يوم مديت النظر عود عليه

مانشوف الا مراويح الخيالي




لا بيوت ولاش زول ولا مطيه

غير انا في راس مرقابي لحالي




مع قدوم الوسم والديره خليه

والهبوب البارده هبت شمالي




كثر دمع(ن) هلته عيني عشيه

عقب وطيت العمامه والعقالي




ثم طرت لي بكرتن وضحا(ن) ثنيه

هي شريدة مابقي من راس مالي




بكرتن عفرا سهيف وعسوجيه

دمها دمي وفازت بالدلالي





بكرتن ربي عطانيها عطيه

واشكر الله ربنا معطي الجزالي




جدها جد السعد في الجاهليه

ف اول الغاره وحماي التوالي




انشدو هذال يوم الحرمليه

يوم جا في تالي الخيل اجتوالي




ردها الفارس على القوم اللظيه

وكعت السبق عقب طاح الموالي