بالبداية أشكرك أخي الغاوي على طرحك الموضوع ..
أعتقد إنّك فرضت أمثله عشان توصّل فكرة ..
لكن شيء صحّي إنه صار نقاش وفيه أخذ وعطاء بمنتهى الرقيّ ..
وكثير سعدت بـ مختلف الآراء اللي بالنهاية كل شخص يعبّر عن رأيه بمنظوره ..

بالنسبه للمشهد الأوّل ..
أول شيء خلونا نتّفق على شغله ..
إنّ العُرف من مقاييس الدين مثل ما درسنا ..
بمعنى تفسير المشهد الأول هل هو برّ أو ليس ببرّ ..
لا يخضع لتفاصيل المشهد .. لا بل لبيئة الشخص ..

فيه ناس مقيّده بإنّ اسم الولد البكر على اسم أبوه أو جدّه ..
وفيه ناس معطينها الحريّه ما أحد يتدخل ..
أتكلم عن شخصي .. جاني اعفاء تامّ مع حلفان من الوالد والوالده الله يطول بأعمارهم ..
إنّي ما أسمّي على اسمهم لا بنت ولا ولد ..
ممكن زميلك أهله من طبعهم ما يتدخلون بالتسميات ..
جرت العاده عندهم على كذا .. فأنت تستغرب لأنك مو متعود على ذا الشيء ..
رُغم إنّه جدا أمر طبيعي .. فالنّاس تختلف مشاربهم ومذاهبهم وتفاكيرهم ..


بالنّسبة للمشهد الثاني ..
يقولون عندنا قبل لا تخطب البنت اسأل عن أمّها ..
ذات الشيء للبنت إذا أمّ زوجها حرمه شرّانية ..
ما تنلام لا ردّت الولد .. لأنها بتحتكّ بأمّه عمرها كلّه ..
خلونا واقعيين شوي ..
بالنهاية ذي حياتها وبتعيشها ..
بتضحّي براحتها وسعادتها وتعيش بكدر ..
وياما تقدموا رجال كفو لخطبة بنات ..
لكن انردّوا والسبّه أمهاتهم ..


كان ودّي لو الموضوع تشعّب أكثر بالشيء اللي وصل لي من خلال عنوانك ..
ويتم مناقشة العلاقة بين الزوج والزوجة والأمّ ..
من ناحية الغيرة وكيف الرجل يوازن بين زوجته وأمّه ..
والزوجة كيف تكسب أم زوجها ولو هي غيّاره كيف تتعامل معها !
ومثل هالمحاور اللي تخلّي مجال النقّاش يتوسع ..