احيان ننحط بمواقف لانحسد عليها ونتمنى محد ينحط فيها والله..
اللي صار اليوم كنت طالع اجيب اهلي من بيت خالي..
وفي الطريق حبيت اخذ قهوة من ستار بوكس ..
ما شاء الله كان المكان مزدحم وقفت السيارة في اقرب مكان ونزلت..
اخذت طلبي ورجعت للسيارة ..
طبعا والله ملتزم دوم بحزام الامان ومستحيل امسك الجوال وانا اسوق
المهم طلعت ولسه دوبي ارتشف اول رشفة من قهوتي ..
الا واطالع وعسكري مروري واقف ع راسي ...
طالعت فيه ونزلت قزاز السيارة ..
طبعا طلب الرخصة والاستمارة اعطيته اللي طلبه الا ويقولي لارابط حزام وكمان
تتكلم بالجوال ؟..
انصدمت والله ومو عارف كيف افهمه اني واقف اشرب قهوة مامشيت بالسيارة..
وجالس ارد ع اهلي بالواتس ..

اللي قهرني مو فاهمني لا ويقولي والله لو تسوي نفسك اعمى كمان حتاخذ القسيمة حتاخذها..
طبعا تعبت افهمه بالاشارة لكن كان يظن اني استهبل واسوي حركات..
بالاخير اتصلت ع اخوي وشرحت له الوضع واعطي العسكري الجوال يقولي مااعترف
بالواسطات ..
اي وسطات يابن الحلال والله رفع ضغطي الله يسامحه ...
رجع اخوي قال لي افتح المكبر عشان يسمعني..
فتحت المكبر وبدا اخوي يتكلم ويفهمه واخيرا اخونا في الله فهم بس بعد شو ..
المهم بعد هذا كله اعطني المخالفة واخذتها على مضض..

اللي يقهر هو ماسكني عشان حزام وجوال ..
وفي الاخير عطاني قسيمة وقف خاطئ ...

انجلط انا وكان ودي ارجع له بس للاسف مافي مترجم هههه.