لدي اخت احمدالله على وجودها .. قبل اطلب اي شي ..
القاها جايبته شاي قهوة اكل..
رغم انها أصغر مني بكذا سنة لكن احس
وكأنها تؤامي..
بنفس الوقت دووم احب اشوفها سعيدة
واي طلب تبغاه اعمل المستحيل عشان
اسويه لها ..
الاثنين اللي راح كان نفسي في كنافة هي بس
سمعت ودقايق وكانت مجهزه لي احلى
كنافة من صنع ايديها ..
كثير اوقات اذا واجهة مشاكل تجي
وتحكي لي صار وصار وعملت كذا وكذا
وانا طبعا كلي آذان صاغية لها..
بعد ماتخلص تقولي ها عندك حل ولا
تعبي ضاع بلاش ههههه ..
اضحك عليها واقولها للأسف ضاع بلاش
وكأني اقولها خبلة انتي مالقيتي حد تحكي له
غير انا هههه..
اليوم حبيت انها تغير جو وتستانس اخذتها
وطلعنا أنا وهي بس وديتها مول واخذت لها
هدية وبعد كذا اخذتها كوفي ..
وجلسنا شربنا كابتشينو وجبنا كيكة تمر
وسوالف ولا احلى طبعا أنا مستمع فقط ههه..
وطبعا كالعادة لازم تصوير وسناب وهي
الله يهديها راحت صورت ومعنا الكابتشينو والكيكة
واننا بمقهى وست الحبايب ياحبيبة شافت السنابة
ومافي دقايق إلا و الوالد حفظه الله يتصل ..
واحلى سينفونية وعيد وتهديد ..
اجمل مافي الموضوع إني سمعت وخلص
وقفل بدون اي اشارة مني حتى هههه
والحمدلله تعمدت ارجع متأخر وهو نايم واختي
طبعا نزلتها عند باب البيت واستودعتها الله
ومن وقت مانزلتها لا حس ولا خبر هههه
وانا بكرة اتوقع راح افتح بابا مسجدنا
لصلاة الفجر قبل الامام عشان اقابل عمي
ويتوسط لي عند الوالد حفظه الله وان ماتوسط لي بيصير لي كذا