يجي من آخر الدنيا صَدَى صوتٍ خَفِيْ مَكْبوت
يصيح يقول: وين الحب ؟ ومثلك خانقٍ صوتـﮧ

ولكنْ صوتـﮧ الخافِتْ .. بَنَىْ وسْطْ القلوب بيوت
تِطِيح بيوت هالدّنيا وهو ماطاحت بْيُوتـﮧ

تِذَكّرْ صاحِبك وارْجَع تقرّب لـﮧ وَلَو بالصّوت
حرام تْضَحّك الدنيا عليـﮧ وتَطْلب سكوتـﮧ !

على آخِرْ نِفَسْ واقف... تِجِيْ وَلاّ يجِيـﮧ الموت
واشوف الموت أَحْرَصْ مِنْك وأشوف انّك تِبي موتـﮧ

وأخاف إنّك بَعَد موتـﮧ تِحِنّ وتفتَح التابوت
وأخاف مْنْ القهر يَقْفُل بْوجهك باب تابوتـﮧ

بْتَبْكِي والنّدم قاتِل مَعَادْ يْفيد .فاتْ الفوت
تِبي تَفْسيرْ لحْروفٍ على التّابوت مَنحوتـﮧ

حُروفٍ خَطّها بِيْدَـﮧ قبِل تَجْفَى وقَبْل يْموت
لَحَنْ . غامِض . لْمَعْزوفَـﮧ . يِتيمَـﮧ . مالَها نوتَـﮧ

بْتَرْجَعْ لآخِر الدنيا لْمَصدَرْ صوتـﮧ المَكْبوت
تبِي تَلْحَق بِقَايا الصّوت( تِطَمّنْ ) ماهُوْ بْصوتـﮧ

بَروحْ لآخِر الدّنيا عسى ماينْقِطع ذا الصوت
أحِسّ إنّه يناديني وأحِسّ إنّـﮧ صَدى صوتـﮧ

رجوعي كان مِتْأخّر سبقني قبل أجيـﮧ الموت
عسى ربّي يسامحني مَدَام " إنّي " سِبَبْ موتـﮧ !

وَبَدْخل في قلوب الناس وْلَـﮧ في كلّ قلب بيوت
بَعَوّض ْ حُبّـﮧ بْحُبّ القلوب وْبَسْكن بيوتـﮧ

وَبَصْرخ فوق تابوتـﮧ بصوتٍ خافتٍ مكبوت
ولكنْ من يِفَسّر لي حروفٍ فيـﮧ منحوتـﮧ ؟

يعيش الناس ماعاشوا وتبقى ( قصّـﮧ التابوت )
قِفَلْ في وجهي (العالم) بْقَفْلَـﮧ ( باب تابوتـﮧ )

بصيح وبَخْتِنق وابكي ولكن بَعْدْ فوت الفوت
عرَفْتْ الحين ليـﮧ .. آخر رسالـﮧ .. كانت النوتـﮧ

( أنا بالهجر عذّبتـﮧ .. وَلاَ حنّيت قبل يموت
وهو بالموت عذّبني .. عذابي كلّـﮧ سْكُوتـﮧ )