من عايش البهتان ما عايشه .... خير
يبقى على ما قيل طافي ....... منارة
ومن عاشر الكذبان ما ياصل ... البير
حبله قصير وغبقته .......... بالخبارة
أعايش المبدا ولا همني ......... العير
اللي بنى بالكذب عش ........ وتجارة
احاسب النفس الشقية ........ بتدبير
ما لي وحقوق الناس لو هي .. عمارة
ورفيقي الوافي عشير ....... المناعير
ما هو راع الوجهين والكذب .... كاره
وش عاد لو خالط كثير .... المشاهير
لا بد من يوم يجيه ........... انكسارة
ويشمت به المظلوم ويرسل . تباشير
ويبشر اللي مثلهم .......... بالخسارة
يالله يا مشكاي يا رازق ........ الطير
يا مثبت نجوم الفلك في ...... مداره
لا تمهل اللي يسرق الناس .... ومغير
يركض على غراتهم في ......... نهاره
لا يستحي من الله ولا يرجي الخير
يا لعن ابو حضه ومسفه ....... قراره
يا رب بشرني عسى سقطته .... غير
نسمع دوي اخبارها في ........ دماره
يفرح بها من ذاق شر ....... المعيثير
ويطلق عنان الروح عقب .. انحساره
لا تيأس يالمظلوم جتك .... التياسير
اشوف ناشي الغيم يرسل ..... خباره
الليلة او الصبح تاتي ....... المعاصير
اللي توسع حفرته مع ........... غباره
تدفن جثمان ابليس وترسل .. بتقرير
يثبت دخول النجس في جوف . داره

القارظ العنزي