الحمد لله وجدتها قبل أن تزروها الرياح
قبل أن تلتهمها الضباع
قبل أن يستهبل الدود ويأكلها
وجدتها قبل ...... وجدتها وخلاص بقي هو كتر كلام وخلاص
المهم طبعا وجدت مدونتي في الصفحه الخامسه ورغم كده لسه عايشه
عملت لها تنفس صناعي والحمد لله أهي لسه شغاله وزى القرد اهيه
حاسس أن المدونه خاسه شويه ومسلوعه كده بس مش مهم
هحاول اكتب فيها اى حاجه علشان تبقي أموره كده وسط المدونات
المهم بما انى حاسس هنا بالغربه
ومدونتى بقت تشبه التربة
وانا بكلمكم دلوقتى وانا بشرب شوربه
يا سلام عليك يا ابو حميد وعلي شعرك
انا أقصد الشعر الي هو بيتكتب ده
مش أقصد شعري انا منعا بس للبث
وانا هنا أقصد اللبث الي هو تداخل الدنيا في بعضها مش اللبس الي بتعلق علي الشماعه في الدولاب
أو زى ما الكل بيعمل بنرمى لبسنا علي السرير وتيجى أمهاتنا يشيلوا من ورانا
حسبي الله ونعم الوكيل في الأبناء الي بيطلعوا عين أمهاتهم
انا ابن مطيع بس والدتى مش طيقانى الفتره دى
هى عندها حق اصلا انا نفسي مش طايق نفسي
طبعا دى اشاعه مغرضه بحاول اطلعها علي نفسي منعا للحسد
المهم انا مش فاهم انا كتبت ايه فوق هضغط زر الإرسال من غير ما اراجع كلامى
انا عارف انى حتى وانا بخرف كل كلامى حكم
المهم انا قررت لو فيه لسه عمر
أنزل معظم كتاباتى هنا
وهبدئها بقصه اسمعونى الي انا مش عارف هي قصه ولا خاطره ولا تخاريف زى الي بكتبها دلوقتى
طبعا هنزلها بكره او خلال الشهر ده أن شاء الله ما انا لسه ما أتجننت وهكتب مشاركتين في مدونتي في يوم واحد