وهــج
مرحبا والّليلة المعنى يبي حـــسّ وذهانة
والذّهين الّلي يفـــكّ العقـدة ويعقــد بَخَتْها
وانْ عَقـَــدْها كـــلّ شـيٍّ بالّليانــة بالّليانة
العــرب تلقـى حلاة أمثــالهم فـي فلسفتهـا
.........................................
عاشق
ياهلا والعلم غامض وان حضرله ترجمانه
بيّن الخافي وحل عقودها اللي عاقدتها
كل شخصٍ سيرته عنوان فعله في زمانه
والعناوين العريضه سرّها في ترجمتها
......................................
وهــج
البحر لو خالطه أحيان شيّ من الرّعانــة
ما تطيش أعماقه الّلي ما تعرفوا آخرتهــا
والتّصحّر من يلومه في خضار السّيسبانه
ومن يلوم السّيسبانــه لا تمــادت شربكتهـا
.......................................
عاشق
البحر مايعطي السبّاح طوق ولا ضمانه
غبته فيها السلامه والخطر بمواجهتها
التصحر لو عطى غر المزون من الميانه
كل ليله هلّت الدمعه وحنّت مرزمتها
.......................................
وهــج
الشّواطي لو يفلسفها الخطر فيهــا حصـــانة
واحتمالات البحر وين الظّنون الّلي أسعفتها ؟
ولو صحيح الغيم ثابت ما تزحزح من مكانه
كان هامت كلّ أرضٍ بالغيـوم الّلــي سقتهــا
............................................
عاشق
الردار اللي على المرسى بعزة عنفوانه
ماتعـــداه البواخــــر ليـن يعرف برمجتها
من حنان الغيم مدري كم تثنّت خيزرانه
والغصون المايله ماتعرف الا ساقيتها
..............................................
وهــج
لــــو تعــــدّته البواخر مـن يعــــزّي هالفطانة ؟
الهبايـــب يمكــــن تخالـــف هقـــاوي باخــرتها
مو غريب الغصن يظهر بعض من جود امتنانه
الغــــريب إنّ السّحـــايب ما درت بالّلي تحتهـا
................................................
عاشق
الفطانه من صفاته كاسبٍ منها المكانه
والسفينــه ما تسافر والهبايب ناطحتها
كان قطـرات النــدى للورد زادت من حنانه
السحايب هلت الهمال والارض اضحكتها
............................................
وهــج
كلّنا يكرّم غـــروره قـــبل لا يخسر رهــانـه
ويالفطيــن النّرجسيّة هالمعـــاني امكـــرّمتها
كـــمّ ســـيلٍ لا تحـــدّر يجــرح القــاع وأمانه
كــمّ أرضٍ ما تبشّ من السّيول الّلي اجرحتها
............................................
عاشق
ادري ان النـــــرجســيـــه ما تربـــت بالطمانه
والشموخ اللي وصل للغيم يحكي عن ثقتها
كم وادي يوم جاه السيـــــل شفنــــــا ديدحانه
مثل عقــــــــدٍ حطتـــــــه بنت الحمايــــل برقبتها
.................................................. ....
وهــج
أدري انّ طويق تظهر في معالِمْه الرّصانة
والثّقة متساوية ميـــر الـــدّروببـــأوّلتها
وش عـلام الزّعفرانـــة لا اكتبتها زعفرانة
ضاقت أنسام الرّبيع الّلي تخطــرت سالفتها
..............................................
عاشق
ما شهدنا بلا دليــل ولا حكينا بدون خانه
والبيــوت بلا معانــي ما تهيّــض قافيتها
ما تضيــــق ولا تغيّــــر وان حكينــا بالامانه
كم حقوق تضيع لولا ان الامانه حافظتها
..........................................
وهــج
يفقهـــق الّليل الغرير الصّبح في مجمل بيانه
والبيوت تعيش في عين الشّموس الّلي قرتها
قالوا الشّاهي حمــاره مـــن حمار الاستكانة
والظّنــون ان مــا تعدّت لونهـــا مـــافسّرتها
...................................
عاشق
لا بدا سهيل اليماني وبانت القمرا وزانه
اكتمــل نور المجــرّه من نجومٍ نورتها
والختام المسك والابداع يشهد لك زمانه
الوهــج كلماتها بالمسك والعنبــر كستها