مدخل:
أنا فاقد بصوتي شي
يشبهني ولكن
وين ؟
فمــان الصّمت يــا كلّ الكلام الّلي على الخاطر
مَعــاد البــال يفتح لك مِثِل أوّل نــــوافذ نـــور
ولا عــادَ الورق يغري بياض إحساسك الطّاهر
وأكيد الصّمت به حكمة إذا صار الحكي مكسور
كبيرة كذبة الشّــاعــر هنــا يــا ظلّــيَ الشّــاعــر
وأشوف الشّمس تقراني بعيـن الكاذب المعــذور
ألا كيــف الشّعــور الحيِّ يصبح حيِّ ، ويكابــر !
وأنــا بـــاقـــي أحايلني أفصّــل للشّعور / شعور
أنــا ودّي تَعَــرْف انّــي غــديت إنســان متنـاثر
وتَعَرْف انّي مثل صبري كبرت بحزنِيَ المنثور
ولكـــن مـــا نسيت انّـــي كثيــر بحسِّيَ الــوافــر
ولا يمكـــن ظـــلال السّــور تلزمها حدود السّور
أنـــا ودّي تَعَــرْف انّ الحيــاة بصـــوتِيَ السّـاخر
تدور ( بدونِيَ) الّلي ما عَــرَف مثل الحيــاة يـدور
وتَعَرْف انّي أنا الأوّل وأنا الآخِـــر مــن / الآخِـر
وأنا الّلي بس من بعضي أجي في داخلك محصور
وأنــا الّلــي بـــس يقـــراك بسكــون الّليـل ويحاذر
ضجيجه يجــرح أنفــاس الهدوء بصوتك المغرور
وأنـــا الّلي بــسِّ لا نــادوا سحابك / جيتك الماطر
وأنا الّلي بــسِّ فــي عــزّ الهجير بـداخلك ممطور
وأنا الّلي بــسِّ مــن صمته يجي مجروح ومغاير
مثل صوت الجفاف الّلي تساقط من صداه زهور
وإذا بــاكر ما يشبهنــي بــدونـــك مــــا أبــي باكر
يكفّيني أعــيش الّلي مضى لــي بــك وأنا مبهــور
ويكفّيني أعيــش الّلي بقــى فــي داخلــي عابــر
اسلّي وحــدتي والـدّرب يـاخذني بـــلا جمهــور
مخرج :
أنا خايف أعيش الّلي
بقى منّي
بدون إلهام
/ وهج