[IMG][/IMG]

قصتي مع اول خطبه

في كل عايلة او اغلب العوايل لازم تسمع هالجمله ( يازينها فلانه بنت عمتك عمك خالك خالتك ) ويصير كل حديث العايلة عنها طبعا ما ننسى انواع النفاق العايلي المنتشر شعرها طولها دلعها وهي لو تشيل الماكياج من وجهها تفقد القدرة على الانجاب ههههه ما علينا قصتي اليوم يوم رحت اخطب بنت خالتي (اماراتية ) وانا سعودي انواع الدراما خخخخخ طبعا عشان تكونون بالصورة لا تصدقون سوالف خليجنا واحد وحنا دمنا واحد عادتنا وحدة لا لا هذا كذب كله وانا احد ضحايا هالموضوع خخخخخخ في يوم من الايام قمت من النوم فجاة كذا لقيت جنني اسمه لازم تتزوج مدري وش هالمسكة الغلط اني اتزوج ياخي فالها دوام وراتب وسفريات وبنات هههه قصدي سهرات ليه تغث نفسك وتتزوج ماعلينا كلمت اختي الكبيرة تخصصها زواج طلاق تكلمها عن كورة او الملوخية او اللقيمات تقولك ضف وجهك بس فلانه تزوجت فلانه تطلقت ههههههه طبعا من القرادة وسوء الطالع تركت كل بنات العايلة وقلت ابي اللي تتكلمون عنها ومزعجين اهلي من عمر 9 سنوات فلانه وفلانه طبعا اول رد صادم من اختي اقول كمل حياتي عزوبي ولا تورط بنت الناس معك واصلا ما راح يوافقون مايبون سعوديين <<< وشلون ابوي تزوج من عندهم طيب هذه الحلقة الجاية اقصه لكم خخخخخخخخ المهم لزمت وقلت ابي فلانه طبعا استغليت احساسي المرهف بالموضوع واقنعت اكبر اثنين بالعايلة عمي وعمتي وتم الاتصال والاتفاق على الزيارة هنا صرت اهتم كثير بالورد وصرت انتف ابوه تبيني ما تبيني تحبني ما تحبني فجاة من عربجي كل اهتمامه الهلال فاز جوفنتوس انهزم الى رومنسي وصرت اقرا كتب عن ايام الخطوبه وكيف تتعامل مع السحلية وماتزعلها وكيف تتقرب من قلبها ووش تحب ووش تكره وهالسوالف حق النصابين حقين الحب هههههههه طبعا الكارثة واللي ما عرفتها انهم مبيتين النيه للرفض واكتشفت متاخر وكانت اهم اسلحتهم << حشا حرب ههه انه ما يتهنى بشوفه تخش وتطلع بسرعه ياجماعة ليه كذا بينا قرابة ما يصير ههههه وهذا اللي حصل بلمح البصر يادوب خشت وطلعت والملقوف اخوها عندي ويناظرني كاني سارق حلال ابوه خخخخخ يا معود ترا ما شفت شي حتى كيف حالك ما قلت لها كان الرد كذا (ماروم يا رايد ) حتى اسمي قاله غلط خخخخخ وقالي توني ناش من الرقاد يالله جدامي اسرع رفض زواج بالتاريخ خخخخخخ يادوب وصلت الرياض جاه الخبر البنت استخارت وقالت ماباااه ماباااه بالاماراتي خخخخ يااخي كرهت اي شي اماراتي منتخب انديه فعاليات حريم رجال اطفال حتى وانا اخش المنتدى احط اعلام الدول كلها واكررها الا علم الامارات خخخخخ رجعت اجر اذيال الهزيمة وانتقم من اي ملقوف بالعايلة يقول وش رايك ببنت خالتك طبعا بحكم اننا عوايل مترابطة مرة مررررة تم نشر الخبر حتى cnn وصل لها خبر والخدامه تقول انت سنو سوي امارات ليش بنت مابغى انت مع نظرات كلها شماته حسبي الله ههههه
الفايدة من القصة يا متابعين <<< هذا وجهي اذا احد خش مدونتك اصلا خخخخخخخخ
- ابتعد عن زواج الاقارب حتى لو هي من الامارات ولا يضحكون عليكم بخليجنا ودمنا واحد نصب هههه
- اذا سمعت جملة البنت بتستخير ونرد عليك هذه ترجمتها ( انقلع لا بارك الله فيك ما بقى الا انت نزوجك ههههه )
- لا تهاوش خدامتكم ابد بيجي يوم تسمع خبر زي هذا وتطقطق عليه مسكين كلو حرمه ما ابغى رايد خخخخخ

هذا الموضوع بدون رعاة لافلاس اغلب الشركات مع الضريبة المضافة