فارس/ (ابتسامة مكسوه ببعض المظلومية) جاي لك في الكلام.. سرقتي ورقة الإجابة حقتي في أثناء الاختبار وطلعتي وأنا إلي كنت كاتب ومتعب نفسي وكل اجاباتي متأكد من صحتها.
مها – رنيم/ (تتعجبان وتنظران الى بعض).
مها/ (بجد موجهة كلامها لفارس) شوف انت يا إما انك نصاب يا إما أنك مختل عقليا.
فارس/ (في عدم مبالاة ومحاولة الى امتصاص غضبها) مو مشكلة .. بسيطة يعني اجرام مع سبق الاصرار والترصد.
رنيم/ انت يا أخ شكلك مضيع وجاي ترمي بلاك علينا.
فارس /(يلتفت الى رنيم بثقة) والله يا أخت رنيم ماني مضيع ومتأكد من كلامي وعندي الأدلة.
رنيم /(تبدأ بالقلق والخوف وتنظر الى مها) يعرف اسمي بعد..!
مها /(غضب بسيط وتشير بأصبعها على "فارس") انت كيف عرفت اسمائنا ؟ وكيف لاحقتنا أمس ؟ أنت شكلك مجرم.
فارس/ (في موقف ثابت وجاد وينظر الى الاثنتين) حاسبي على كلامك ترى كل شوي لاحظوا انكم قاعدين تغلطون وأنا ساكت.
فيصل/ (اثناء حديثهم يمر بجانبهم شاب يدعى "فيصل" وكان فيصل معجب بمها منذ ان رأها وبدأ اعجابه يتطور لدرجة كبيرة لا يعي ما هيته عموما هاهو يمر بجانبها هي وصديقتها رنيم لكي يراها هذه المرة وقد كانت المرة الاولى التي يتشجع فيها ويقترب منها ولكنه تفاجئ بأن شخص اخر يجلس معهما وهو "فارس" فظن بأن هذا هو صديق مها او صديق مها ورنيم معا فحبطت معنوياته كثيرا ثم يمشي وهو يتظاهر بأنه يقلب في جواله).
مها /(تزداد حنقا وتوترا) طيب خلاص قول واختصر وش تبغا؟
فيصل/ (يستمع لكلمات مها ويكتشف بان هذا الشخص غير مرحب به بينهما).
فارس /(يمسك نظارته الشمسية السوداء بيده وقد خلعها عن وجهه ثم يبتسم وينظر الى مها) اسمعي يا قطة.
مها/ (تغضب) وجع في بطنك وفي شكلك.
فارس/ (يضحك) الله حلوه وانت معصبة.
رنيم/ (تقرب كرسيها من صديقتها مها وتسر لها بالكلام بشكل سريع) انا اقول نتصل على الامن الان أفضل من اننا نضيع وقتنا معه.
مها / (وقد استمعت الى كلام رنيم ثم تحزم موقفها وتنظر الى فارس) هذا الي بيصير الان.
فارس/ (يبدأ عليه الخشية فيدخل في الموضوع قبل ان تتخذا قرارهما) اسمعي يا مها انتي اخذتي ورقة الاجابة الي تخصني في الاختبار اختبار مادة المحاسبة الدولية.
فيصل/ (يقف عن كثب ليتابع ما يدور ثم .. يتريث قليلا ويبدأ بالإنصات من بعيد ويحاول ان لا يبتعد).
مها/ (تتعجب كثيرا من حديث فارس) انت متأكد إنك تتكلم جد ولا انت كذا مجنون خلقه؟
فارس/(يبتسم ويرمق مها بنظرة واثقة ويبدو الاستياء عليه) أمس في القاعة انتهيت من الإجابة على الأسئلة حقت الاختبار وبالغلط سهوا نسيت ورقة الاختبار على طاولتي واخذت وحده ثانيه غيرها على بالي انها هيه يهيألي انها معي ورحت للدكتور أسلمها له ويوم تنبهت بسرعة رجعت لطاولتي وعندي يقين إني بلقاها وتفاجأت أني ما حصلتها فغلب على ظني أنها طاحت أو تداخلت مع الأوراق وقعدت أبحث عنها ما لقيتها.
مها - رنيم /(تنظران الى بعضهما بمزيد من الاستغراب).
فارس/ (يستطرد في سرد حديثه موجها كلامه لمها) المهم أنا وقتها قلت فبالي يمكن هذا مقلب واحد من العيال بيستغل إني رحت بورقة ثانيه..عموماً التفت وراي إلا انتي قاعدة تحلين وتناظرين بورقتك.
مها / (بدهشة وتحملق في فارس) إيوه ..؟! وش تبغاني أسوي يعني اصورك وقتها؟
فارس /(لا يأبه) المهم انتظرت ألين أشوف وش إلي حاصل لأن مستحيل أحد راح يسوي هالحركة هذي إلي كلها نذاله وساكت يناظر فيني!
مها / (باستياء)وبعدين خلصنا ما انتهت قصة حياتك؟
فارس / (لا يأبه ويواصل كلامه موجهه الى مها) سلمتي انتي ورقة اجابتك واعتقد شفتيني ما طلعت.
مها/ (بجدية وثقة وترفع صوتها على نحو اعلى) ولا أعرفك أصلا مصدق نفسك ان حنا نعرفك ما أدري انت عبيط ولا في عقلك شي..؟
فارس/ (يكمل) هدي هدي جايلك بالكلام.. يا حلوه.
مها/ (بغضب) لا تقول حلوه قسما بالله لا انادي لك الامن الان احترم نفسك.
فارس/ (يبتسم) خلاص ولا تزعلين هدي يا شينه.
مها/ (باستياء) لا والله تنكت .. صدق انك سخيف.
رنيم/ (مستاءة ومؤيدة لكلام مها) بقوه.
فيصل / (يتابع ويزداد حماس ثم يتصل بصديقه نايف).
نايف/ (وكان مشغولا يتحدث مع صديقة له بالجامعة اسمها رغد) هلا يا بعدي.
فيصل/ (يخفض صوته ويضع يده على سماعة المايك بالجهاز لكي يقلل الضوضاء) تعال بسرعة بسرعة.
نايف / (لا يكترث لطلب فيصل ويبتسم لصديقته) العجلة من الشيطان يا ولد وش تبغا الحين؟
فيصل/ (يحاول ان يجد له طاولة قريبة فينظر يمينا وشمالا ثم يجد طاولة بعيده نوعا ما ويجلس عليها) يا شين أعجل اعجل ابغاك ضروري وينك فيه؟ .. بعيد؟
نايف/ (يبدأ بالانتباه لما يقوله نايف بشكل اكبر ويغير نبرة صوته) خير وش العلم؟
فيصل / (يرفع من صوته قليلا وكانت الكافتيريا الخاصة بالطلاب في حديقة الجامعة قريبة وحولها طلبة) تعال الان انا عند الكافتيريا موضوع مهم ما ابغا اكثر فالكلام تعال.
نايف/ (يهب بسرعة ويعتذر لصديقته رغد) عن اذنك يا حبي بروح اشوف وش يبغا فيصل وراجع لك اوك.
رغد/ (تبتسم) اوكي.
مها/ (تقف وتمسك بكتبها وشنطتها) اعتقد اننا اعطيناك وجه اكثر من اللازم يالله يا رنيم مشينا.
رغد/ (تقف معها بسرعة وتمسك بشنطتها وجهازها الجوال) يالله.
فارس/ (يقف معهما ويمسك ذراع مها) دقيقة ما خلصت كلامي.
مها/ (تسحب ذراعها بقوه من يد فارس) فك يا وقح انت شكلك ما تربيت.
فارس)/ (بغضب) الا متربي وبتسمعين كلامي لين اخلص اسمعي انتي اخذتي ورقتي بالخطأ الله اعلم هالكلام عندي عليه شهود ومنهم ريهام .. قولي بعد ما تعرفينها؟
مها/ (مندهشه) ريهام ؟
رنيم/ (تتنظر الى مها) ريهام الي معنا بالقاعة امس؟
فارس/ (يبتسم) الله ينور عليكم المهم قالت انها شافتك تأخذين ورقتي يوم شفتيني رحت للدكتور.
مها / (متوترة) يعني وش تقصد ..؟ اني حرامية سارقتك عمد ؟ اقولك ما اعرفك.
فارس/ مو مهم ما تعرفيني المهم انك اخذتي الورقة ليش؟ ما ادري والان الدكتور رحت له وشرحت له كل شي ما اقتنع الا بشرط انك تجين معي عنده وتعترفين انك اخذتيها سواء ناسيه سهو او عمد بكيفك عشان يرضا يعيد لي الاختبار عالاقل او يعتمد لي الإجابات.
(في هذه الاثناء يتدخل فيصل وكان معه صديقه نايف الذي بالكاد وصل مسرعا ويتداخلون مع أصحاب الحوار المحتدم)
فيصل / (يوجه الكلام لمها ورنيم ويشير بيده اليهما) السلام عليكم ..بعد اذنكم.
مها - رنيم/ (تنظران لفيصل في خوف ودهشه).
مها/ (تنظر الى فيصل) ومين هذا بعد ليكون بعد ناسي كتبه كلها معي بعد ؟
فارس/ (ينظر بحذر الى فيصل ونايف) وعليكم السلام.
نايف/ (باحتقار ينظر الى فارس) ما سلمنا عليك.
نايف/ (تبتسم وتنظر الى نايف).
مها/ (تنتبه الى ابتسامة رنيم وتستغربها ثم بسخرية تتكلم مع رنيم) يا سلام .. ما شاء الله.. ممكن تعرفينا علاخوان؟
نايف/ (يبتسم لرنيم).
فيصل/ (ينظر الى نايف منزعجا من ابتسامته لرنيم).
رنيم / (تشير الى نايف بيدها معرفة به لصديقتها مها) هذا نايف تعرفت عليه قبل أسبوع تقريبا.
مها / (تنظر الى نايف بازدراء) اهااا ..
مها/ (تنظر الى فيصل) والاخ ..؟
نايف / (يبادر نايف بسرعة) اا هذا صديقي فيصل.
رنيم/ (يبدوا عليها عدم معرفة فيصل ثم تبتسم).
فارس / (في سخرية لمها ورنيم) ما شاء الله يعني الحين قلبتوها تعارف وهالي هجموا هذولا صار مالهم علاقه فيكم!
نايف/ (يقرب وجهه من فارس بعدوانية) ايه وش عندك يعني؟
فارس/ (يخاف ويلزم الصمت).
مها/ (تسخر من فارس) على أساس عاد نعرفك انت ووجهك زيك زيهم ترى.
فيصل/ (يتدخل وكأنه يريد ان يكسب ود مها) بدون غلط الله يخليكم الان انا مريت من هنا وسمعت كأن فيه خلاف على ما يبدو لي بينكم فقلت اشوف يمكن تحتاجون مساعدة.. هل الأخ مضايقكم بشي؟
مها / (تستغل الفرصة لتستنجد بفيصل وزميله بطريقة استغلالية مؤقته وتنظر الى فارس) اا الصراحة هذا الأخ الي مسمي نفسه قلت لي اسمك ايش..
فارس/ (بانتباه) فارس.
مها/ (بتعالي) ايوه زي ما ذكر لكم جاي متهجم علينا ويدعي اني سرقة ورقة الامتحان الخاصة فيه بكل وقاحة وبدون سابق معرفة جاي يقط بلاه علينا وحنا لا نعرفه ولا شيء.
فيصل / (ينظر الى فارس) وش راي الأخ مارس اا اقصد فارس.
مها/ (تضحك بدون ان تستطيع مقاومة الضحكة ثم تغلق فهما بيدها بسرعة).
رنيم/ (تبتسم).
نايف/ (ينظر بنظرات " الشر" لفارس).
فارس/ (يرتبك) اا الحين رغم اني اشوف انكم برضو ما احد يعرفكم هنا.
نايف/ (يقترب قليلا من فارس) مو شغلك بعدين جاوب على قد السؤال ثانياً ومسألة يعرفونا نعم قالت لك الأخت رنيم انها تعرفني خلاص هذا بحد ذاته كفايه لك انك ما عاد تقول نفس كلامك الأول يا اخ يلويو
فيصل/ (يكتم ضحكته).
مها – رنيم/ (تضحكان).
فارس / (يرتبك ويخاف) عموما انا كلامي مع الأخت مو معكم.
نايف/ (بنفس نظرات "الشر" والاستفزاز يوجهها لفارس) لا كلامك الان معنا نعم خير وش بغيت؟
مها/ (تبتسم وتتدخل لخوفها من نشوب عراك مثلا وتقول لفارس) ا ا .. معليش مو مشكلة خله يكمل كلامه كمل حنا كلنا نسمعك انت وصلت عند كلامك يوم تقول ريهام شافتني اخذ ورقة الإجابة حقتك والدكتور يقولك خليها تجي وتثبت وتعترف اني اخذتها عشان يعيد لك الاختبار او يقبل الإجابات..!
فارس/ (ينظر الى مها باحترام على غير ما بدر سابقا) نعم صحيح.
مها/ (بحزم) طيب ووشهو دليل الإدانة لي غير الشهادة الي انت ذكرتها؟
فارس/ (بثقة وكأنه بدأ يتنفس الصعداء) اا .. نفتش شنطتك او كتبك.
مها/ (بثقة) موافقة بس قدام الدكتور والان وش قلت ؟
نايف/ اتركيه عنك والله ما يقدر يفتش شي لك وحنا موجودين.
فيصل/ (يمسك بعضد نايف وموجها كلامه لفارس) طيب واذا ما لقيت معها شي؟
فارس/ (يلتفت الى فيصل) اا اذا ما لقينا شي خلاص تثبت براءتها.
فيصل / (بسخرية وحنق معا) ياهوه يا براءتها وبس خلاص لا حبيبي ما فيه شي اسمه براءتها فيه حاجة اسمها تأخذ عقوبة صغيرة كذا اهداء مننا لك.
نايف/ (بنظرات مليئة بالشر وينظر الى فارس) وياليت تقبله بطيب نفس.
فارس/ (ينظر الى فيصل ونايف) وش يعني هذا يعني تهديد ؟
نايف/ افهمه زي ما تفهمه.
مها/ (مقاطعة) خلاص يا جماعة يالله الان نروح للدكتور يالله رنيم.
مها – رنيم/ (تذهبان).
فيصل – نايف – فارس/ (يتبعهما البقية).
فارس/ (يبطئ من مشيه حتى أصبح يمشي في الأخير ويتناول جهازه الجوال ليتصل على ريهام بشكل سريع)
نايف /(ينتبه له نايف بينما فيصل كان يراقب مها) شوف الحيوان من يكلم.
فيصل/ (ينتبه لكلام نايف) هاه.
فارس/ (ممسكا بالجوال) الو..
ريهام/ (ترد وكانت مع صديقتيها سمر وليان بأحد الممرات بالجامعة) هلا قلبي.
فارس/ (متوتر ومرتبك) اقولك انتي متأكدة انك حطيتي الورقة في شنطتها؟
ريهام/ (تبتعد عن زميلاتها للتحد بحرية اكثر) ايه متأكده إني حطيتها وش فيك.
فارس/ (بارتباك لأنه أحس بمراقبة نايف له ويبدأ يخفض صوته) يالله تعالي الان كلنا رايحين لمكتب الدكتور امين عشان نفتش شنطتها بسرعة.
ريهام/ (تهز راسها) اوك باي.
ريهام/ (ثم تنظر الى صديقاتها) يالله عن اذنكم بروح قريب وارجع ولا نتقابل بعدين.
ليان/ على وين؟
ريهام / (وهي مستعجلة وتهم وتمشي مبتعدة) فالموضوع الي كلمتكم عنه.
ليان/ اهاا..
نايف/ (يمسك بجوال فارس بشكل مفاجئ ويخطفه منه بسرعة) والله وقفطتك وقفطت حركات النذالة.
فارس/ (يحاول ان يسترد جواله بالقوة ولكن نايف منعه بيديه) هات الجوال احسن لك.
فيصل/ (يسرع ليفض الاشتباك) نايف خلاص اتركه.. وش المشكلة؟
نايف/ (يبتسم بحقد وهو ينظر الى فارس) الأخ لقيته يكلم وحده الان بنشوف منهي.
فارس/(مستغربا) وانت وش دخلك اكلم وحده ولا ملايين؟!
مها- رنيم/ (تتوقفان لتنظران ما يجري من بعيد). -
نايف/ (يضحك) بالله طيب الان اشوف .. (ينظر في جوال فارس ثم السجل للمكالمات فيجد اخر رقم اتصل عليه مسجل باسم رهوم حبي) يا ولد .. "رهوم حبي" يعني ريهام اهاا الحين عرفنا الاتفاقيات.
فارس/ (يمد يده ليأخذ جهازه) هات الجوال بس ايه متصل على ريهام عشان هي الشهادة في القضية هذي ولا انت ما تسمع اول يوم مها ذكرتها؟
فيص/ (يأتي ليأخذ الجهاز من يد نايف بهدوء ويعطيه لفارس) تفضل خذ جوالك اتركه يا نايف الان خلونا نمشي.
نايف/ (ينظر لفارس بنظرة شك ومقت)
فارس/ (يأخذ جواله ثم ينظر الى نايف بنظرة كراهية وامتعاض فيواصل معهم المشي).