-
-
ان شفت عيني قاصرة عنك الشوف
لا تحسب إني بالفعل ما أشوفك
أنا إذا شفت الخطأ منك مكشوف
ألدّها .. ما ودي .. إنها تشوفك
أنا أدري إنك راح تبلشني حلوف
ويلحقك ذنب .. ولا أصدق حلوفك
لكن بطوّفها، مدام ..إنها .. تطوف
وأبيك .. تفهم.. حاجةٍ / ما تطوفك
دمحتها لك يابن عمي مهو خوف
وان خفت أخاف لسمعة آخر حروفك
أنا ..ولـد عمـك .. إذا جـارت ظـروف
معاك أوقف .. قبل تشرح / ظروفك
أجيك وأحوف الرجاجيل لك حوف
وتبطي الرجال اللي تحاول تحوفك
وليا لحقك من الرجاجيل .. معروف
أبحث و أدوّر .. لين أرد .. مْعروفك
قلْ للزمن لامن بغى يدحم كتوف
يدحم كتوفي .. قبل يدحم .. كتوفك
وشلون .. تبغاني .. أخليك .. وآشوف
كف الزمن .. يلوي أصابع .. كفوفك
لا صار جيبك خالي و عندك ضيوف
حرمت نفسي لجل أعشي ضيوفك
-
-