عمرنا الحقيقي ما بيتحسبش باليوم إللي إتولدنا فيه و لا بالسنة إللي جينا فيها للدنيا...
لكن بيتحسب باللحظات الحلوة إللي عيشناها و إللي لسه هنعيشها و بالناس الجميلة إللي القدر هدانا بيهم و بذكرياتنا الحلوة معاهم إللي مستحيل تتنسي...
و بكل أزمة مرت في حياتنا خليتنا نعرف قيمتنا عندهم بوفقتهم جنبنا و كانوا لينا هما الظهر و السند من غير حتى ما نطلب منهم...
و بكل كلمة حلوة خرجت من القلب إحنا إللي قولناها أو إتقالت لنا و فرحنا بيها بعض...
و بكل خير حتى و لو صغير ربنا قدرنا نقدمه لمحتاج و إحنا شايفين فرحته ماليه عينيه...
و بكل لحظة قربنا فيها من ربنا و حسينا بالسعادة الحقيقية في معية الله...
و بكل لحظة أمل بنعيشها و إحنا بندعي ربنا من قلبنا و مستنين بكره الأحلى و كلنا ثقة إنه أكيد جاي لأننا واثقين أوي في وعده لينا "أدعوني أستجب لكم"...
لو إعتبرنا حياتنا "عملية حسابية" نجمع فيها لحظاتنا الحلوة و نطرح منها كل لحظة إحباط أو خوف أو حزن و نضرب كل لحظة ألم أو يأس بسلاح الأمل و الثقة في الله...و نقسم الفرحة بينا و بين بعض أكيد حياتنا هتتغير للأجمل و "معادلة" حياتنا هتظبط.. و هنفضل من جوانا طول الوقت حاسين إننا "شباب" حتى لو بقى عندنا ١٠٠ سنة🌹 منقول
مما أعجبني 