السلام عليكم ورحمة الله
هذي القصيده
كتبتها للاخت الفاضله الجادل2018
تعبيرا عن شكري لها على تفصيلها واظهارها
لخبايا القصائد التي اكتبها
اتمنا ان تصل لمستاوك العالي
ولا اظن انها ستصل
ولكن اقبليها مني
يقول
اذا ودك تعرف اللي يدمر سكة الاحباب
احب اعلمك ان التجاهل من يدمرها
اذا حبيت شخص اصدق بحبك لاتصير كذاب
ترا الكذبه الصغيره تنحسب لاتقول مررها
وفي هذا الزمن ياناس شفت ان الغلا بحساب
يضيع ابن الفقر لاحب وتكبر عنده اصغرها
تراني يالنجم ضايع جريح بوحدتي منصاب
خسرت الاوّله* وماريد تجيني وحده وخسرها
انا ودي بها جنبي نكون اصحاب نكون اقراب
نكون احباب ونقيم العلاقات،،،،،، ونعمّرها
الا يابنت لاجيتك طلبتك لاتصكي الباب
وحذرا تكسري روحي كفايه الوقت كاسرها
وروفي ورفقي بلي فؤاده في هواكم ذاب
يريد وصالكم ماغير لشوفتكم يناظرها
اريدك وبتغي وصلك ودور للوصال اسباب
انادي وسأل الغيمه على دربك وماطرها
وناديها ليا مرت من جموع الحمام اسراب
لعل الصوت ياصلها وترهيلي مشاعرها
الا يالجادل اللي لك حروف الذايقه تنساب
وتتغنى على مودك وتنزل من محادرها
ترا يومي طريت اسمك بقيفاني الشعر لي طاب
عشانك جيت انا الليله حروف الشعر اسطرها
بعد ماشفت تحليلك كشفتي اللي ورا الجلباب
تغوصي في تفاصيل الحروف وفي مقابرها
عجبتيني وتدري ويش هو دافع الاعجاب
لانك تقري الكلمه وتدري بقصد شاعرها
كأنك في تفاكيري تعيشي وقافله للباب
كأنه في يدك وصفة القصيده اللي احظرها
كأنك بالوصف غيمه تمري والمطر سكاب
كأنك بلسم الكلمه من العاهات يجبرها
تدوري كالغزال اللي تدور ومِسكها جوّاب
يفوح المسك لامنها مشت بقعا تعطّرها
عشقتك ايه وحبيتك عشق ومحبة الاصحاب
ماهو مثل المحبه الي بهاليومين خابرها
محبه صافي النيه محبة حرفك الجذاب
محبه غير يالجادل مدري كيف افسرها
تراك انتي اذا حطوك جمله من جمل الاعراب
تكوني مبتدا مرفوع عن اوسطها وآخرها
انتي وسمحي ان قلت انك للفكر محراب
انتي اللي اذا بشكرك مدري كيف بشكرها
وسلامت الجميع
اخوكم ابوالليل/عبدالرحمن الشريف