؛
|​
على كثر الكلام وكثر ماقبل الكلام جروح
.............سكت ومالقيت الكلمتين الي علي بالي​
أخاف إن قلتها وإن قلتها وإن قلتها بوضوح
.............توسدني ملامات الرفيق وشرهة الغالي​
كذوبة يالهجوس اللي على الخاطر تجي وتروح
.............بغيت أزبن ذراها واستريح وما تهيا لي​
ورحت أتلي شتاتي وآترجا صوتي المبحوح
.............تموج بي الدروب ومسند كفي على ظلالي​
عسي ما إنتي رجايا يابروق في سماي تلوح
.............يشرهبني رعدها والظما بالصدر همالي​
نقلت جروح ما أعرفها بقلب مرهف مجروح
.............تنطحت البياض وسود الله وجه عذالي​
ولو طالت بي الحروة وبانت للملام شبوح
.............نهض شوفي جنحانه واستبان المرقب العالي ​
ولو خان الشفق مرة ومرة طيره المذبوح
.............بقا وكره على جباه النجوم المرقبة خالي ​
يسامحني رفيق كل ما أخطى قلت له مسموح
.............على كبر الهقاوي من رفيقي مرخي حبالي​
ماهو ذنب الكفوف اللي شذاها بالجميل يفوح
.............إلى من صافحت بعض الردى في بعض الأحوالي ​
ماهو ذنب الورود اللي قطفها عابث مشفوح
.............تشح بعطرها عن كف قاطفها ولا تبالي ​
ماهو بذنب الوفا والنية البيضا وطيب الروح
.............وأنا ثوب الجمالة ما لبسته جرد وسمالي ​
على كثر الكلام وكثر غيظي مانويت أبوح
.............عساها ماتعود الكلمتين اللي على بالي