يامعذب الاحباب ياغايب متى وقت الوصول
انا على نار انتظر رجعتك لوطال الغياب


ياهمي اللي لو يزول العمر كله مايزول
ياقرب من اللي في يدي وابعد علي من السحاب


ياصيف عمري ياربيع العمر يا أغلى الفصول
يافرحتي ياسلوة الايام يا أنواع العذاب


يابحر جده ياشفا الطايف ياحايل ويش اقول
ياتراث مكه ياحضارة نجد يا أبها والضباب


يانغمة الاوتار ياعزف الموسيقى والطبول
ياضحكة الاحباب مابين التغلي والعتاب


ياعنفوان الخيل ياوقفات ماضين الفعول
يانشوة الكسبان ياعزة عزيزين الجناب


ياضحكة الاطفال يا النظرات في الطرف الخجول
ياهيبة السلطان ياقدر اللحى حق الرقاب


ياحكمة العاقل ياعطف الام يامعنى القبول
يالذة الماء في ظماء الظميان ياعذب الشراب


يامعجم الاخلاق يافهرس تعاليم الوصول
ياروعة الابداع يابنك المبادي والاداب


فديت عمرك يابعد عمري جعل عمرك يطول
احسب احساب اللي حسب لحساب حسبتنا حساب


بجاه رب ام القرى والقدس وبجاه الرسول
انا مصاب و واجبك يلزمك بإسعاف المصاب


صبرت حول وحال حول الحول واستقبلت حول
وانا انتظرك تذوب في قلبي وقلبي فيك ذاب


وجيتك وانا كلي غلا جيتك وانا كلي ميول
النفس لرضاك حضرت .. والقلب لرضاك إستجاب


وعجزت ياصعب طلوع اسألك ياصعب نزول
تصمت ولا أحكي لك سؤال اصمت ولاتحكي جواب


عزلتني عن عالمٍ ماكنت انا عنه معزول
اطرد وراك العمر كله كني اطرد لي سراب


سمعت قولي وانت قلي ودي اسمع ويش تقول
انا طرحت الك السوال ومنتظر رد الجواب


الشاعر .. عبدالله السميري