‏


همسه

ارتفاع حرارة الاطفال مرهقه بقدر لايمكن وصفه
بسبب نحاستهم
بس الحلو فيها هسترتهم يالله تخليني اضحك وادخل جو معهم
اتوقع الحمى حتى مع الكبار كذا بس ما ادري الصغار اكثر عرضه للهستره
انا كانت اسوء حاله مرضيه اتعرض لها الحمى مو اهستر وبس انتقل من عالم تماماً
زين اني ما انسى اهلي
كنت دايم ولازالت اتذكر اني اصير بين السحب وفي ملكه لابسه فستان ابيض
كبيره كبيره كبيره بالحجم يعني ضخمه انا اكون بالنسبه لها يمكن قعموصه
المهم تجلس تعذبني واختبي منها بين السحب اصلاً هذا اللي ساكن في خيالي فقط
معها شوكه كبيره بيضاء من قزاز وفوق راسها تاج جميل
مره من المرات عذبتني بطريقة تخليني امدد ريالات كبيره كبيره اكبر من سجادات المساجد كل شيء في هذا العالم ضخم
الا انا وكنت ابكي واحاول امددهم مشوار لين انتهي من الريال الاول مع تأثير الهواء لمن يرفع طرفها ويخربطبها لي وانا ورايه ريالات غيرها يعني المفروض امدد ريال وانام اسبوع حسبي الله عليها بروحي عن نفسي
طبعاً انا ابكي في خيالي وفي الحقيقه كمان واذا ضحكت يشوفوني اهلي اضحك يومي كله اضحك وابكي مثل المجانين ماينعرف لي
وماما طبعاً تنهار وتبكي وتقروش بابا حتى اخوالي وجدي الله يرحمه متواجدين عندي
بس انا ساكنه عالمها لين افوق
الله يجاهدها من اميره الحمد لله وهي جميله اقلها ما ارتعب منها
بالفعل جميله بشكل الى الان متخيله شكلها وحجمها وهي وسط السحاب
وهذه هسترتي مع الحمى اسكن بين السحب مع هذه الاميره الضخمه واتخبى منها
متنقله بين السحب لانها تتحرك واذا تخبيت وحسيت اني تخبيت امسك ع فمي واضحك
وطبعاً اضحك في الواقع واذ لقتني ابكي وتبدا تأمرني بشيء وانا اكون تعبانه مافيني اعمل اللي تطلبه
ولكن ما اقدر اقولها لا اظل ابكي واحاول انفذ المهمه وابكي بقوه حتى حرارتي ترتفع زياده
في كل مره اموض فيها يكون لها نوع عقاب مختلف

بنت خالو مو خلتني اضحك بغيت اموت من الضحك
طيلة هسترتها وهي تقول الجمل بياكلني الجمل هناك يطالع فيني يا ماما
الجمل بعديه عني
وربي اني راحمه حالها مدري كيف لو ان حمتي جمل اتوقع ثلاث ايام ويدفنوني ما احب الحيوانات مره كيف يجي في خيالي جمل وبعد يلاحقني
سبحان الله حتى في المرض الله يعطي كل شخص ع قدر استطاعته وتحمله
كل انسان ربي يعطيه مرض ع قدر تحمله
ان الله رحيم بنا
الحمد لله دائماً


هل ياترى انتم تفتكرون طفولتكم وايش تحسون فيه مع الحمى ؟






‏
..
‏