ي صباحو
ليكي حياتي انا قبل خبرتك بمواضيع تانية إلك انو انتي من النوع
اللي بضل يزن او مابيعجبوا شي .. وبضل في جواتك نوع من عدم الرضا
وهيدا غلط كتيييير

لك هيدي المشكلة الله يجعلها اكبر مشاكلك!
طالما انتي بصحة وعافيـة خلص مابيلزمك شي .. بعدين انتي عم تقولي
عندكم بالعيلة في متزوجين وعندهم 4 و 5 اطفال واسم الله متل المحرك وبيتن
عم يلمع من النضافــة .. انتي شو ناقصك عنهم .. ؟ بشو اقل منهم .. ؟

فيكِ تكوني ست بيت مرتبة ونضيفة اذا انتي بدك ..
قصة انو كنت عن اهلي مدللة وابصر شو بدك تنسيها ..
وبتوقع من اول زواجك وانتي بتعرفي وضع زوجك وتوقعتي انو مايجيب لك خدم ..
وخلص يعني صرلك سنتين معو ع اقل تقدير
صار وقت تتأقلمي وتعملي مسار لحياتك معو ومع بيتك
مابصير هيك اضلك بس عم تشكي وتتضايقي وبدك كل شي يوصل لعندك!

انا بس كنت اصغر من هيك
كان عنا خدامـة .. ماما بتشتغل وكنا 3 اولاد صغار وكتير عليها لحالها
خصوصي انو مغتربين ومافي حدا يساعدا ..
لحد مااجى يوم سبحان الله كان راح تصير جريمة قتل بالبيت من ورا الخدامـة
وقتها رفعت السكينة عليي .. !
ومن وقتها .. ماما حرمت ادخل خدامـة ع البيت .. مش عم خبرك انو كل الخدم مش مناح
بس كمان مش من اهلك لتوثقي فيهم!

بعدين دخلك انتوا كيف هيك بتوثقوا بالخدم وتأمنوا يكونوا بالبيت معكم
انا مابحب الخدم .. وبس اتزوج مستحيل دخلها ع بيتي
انا هلأ وحيدة اهلي تمام .. ماعندي خوات ..
وهياني بالبيت لحالي وشايلتو شيل ع راسي مع اني موظفة ومضغوطة جدا
بس انا اللي بغسل وبطبخ وبنضف وبخلص كل امور اهلي برا وجوا البيت!
اكيـد مارح ارمي الهم ع اهلي .. فـ انا شايلة كل شي وبالعكس مبسوطة بحالي
لأن حلوة الحركـة وحلو النشاط وحلو الواحد يتحمل مسؤوليـة ويحس بقيمة حالو

انتي مابتشتغلي .. وماعندك الا هالبيبي .. شو عذرك .. ؟
شديلي حيلك شوي واهتمي بزوجك وبيتك وابنك لأن بتوقع للصبر حدود عندو
ومابتوقع يتحمـل هالأد دلع واهمــال

الله يسر امرك

.
.