لو بتبذل مجهود كبير عشان تحتفظ بالطرف التاني في العلاقة، وبتستحمل وتصبر وتطنش مواقف كتير، يبقى فيه حاجة غلط، رقم ناقص عشان المعادلة تتحل.

فالأصل في التواصل الإنساني: التكافؤ والندية، أقدّم السبت تقدّم الحد، أرخي في موقف، ترخي في موقف، لكن لو فيه حد متمسك أكتر من التاني،..
معطاء ومضحي أكتر، يبقى غالبا مضحوك عليه وبيتم ابتزازه عاطفيا!العلاقات دي شديدة السمية، وبتستنزف الطاقة تماما، والأسوأ إنها ما بتنتهيش بسهولة لأن دايما فيه مساحة من الشك إننا ممكن نكون ظالمينه، طب ندي له فرصة، طب نستنى شوية، طب ما ممكن ما ألاقيش غيره،
لحد ما العمر يتسرب من بين إيدينا زي قطرات المطر!

إحنا بنحب عشان نلاقي نفسنا، عشان يبقى عندنا مبرر نصحى الصبح، عشان نتقدم وننجز ونتحقق، عشان نضحك ونطنطط من الفرحة ونرجع عيال، عشان يبقى بالنا مرتاح وقلبنا واثق ويقيننا مكتمل.
فلو ما كانتش العلاقة بتقدم لك كل ده، يبقى تقف..، وتقطع عرق وتسيح دم وتهرب بقلبك وعقلك وإنسانيتك من الضلال ده، وتكرتنهم وتقفل عليهم في خزنة حديد بكلمة سر، لحد ما تلاقي اللي يقدّرهم صح.

القلب مش بعزقة!