وش يرفع اللي هاقيـن فيـه لاطـاح
انشهد ان طيحتـه ماهـي بطيحـه
واحـر منهـا لاتذكـرت مـاراح
يوم نصحـوك ولاسمعـت النصيحـه
وقفت معـه بهـم وبحـزن وافـراح
وزعلت من شانـه وجيهـن فليحـه
واللي استفدت هموم وطعون وجـراح
ويح اللـذي سـواء فعايلـه ويحـه
ياطيـر يومنـي دعيتـك بمـلـواح
ابـا تعـذر فيـك واجـر صيحـه
ماهو عشانك طنب القلـب بصيـاح
اصيح مـن هـمٍ عسـى الله يزيحـه
القلب قفل ولا لقى القفـل مفتـاح
واللي ترادى بـي عسـى الله يبيحـه
اخيل برق العز مـن ويـن مـا لاح
ولا خيل براق النفـوس الشحيحـه
الله خلقنـي للثقـيـلات نـطـاح
اتعـب وهـم قلوبهـم مستريـحـه
لو شفتنـي مرتـاح مانـي بمرتـاح
اضحك وفي عيني تضيـق الفسيحـه
مطلب ومن دونـي بواريـد ورمـاح
قربي لهـا خطـر ومـردي فضيحـه
ماخاف لكنـي بـلا درع وسـلاح
ماقد قنيت سـلاح كـود القريحـه
كرامتـي قبـل الخسايـر والاربـاح
والله يديمـك يالعلـوم الصحيـحـه
خسرت لي قوم ٍ على شان الانصـاح
وصارحت ناس ٍ واحسب انها صريحه
نـاس ٍ تفرقهـا مفاهيـم الاصـلاح
وتجمعت علـى الصحـن والذبيحـه
لو قلد الجاهل مـن العقـل بوشـاح
تلقاء معـه كبـد الركـاده جريحـه
ولو يسكت العاقل ولا ادلاء بالافصاح
تلقـاء تعابيـر النواظـر فصيـحـه
والله خلق لـي عقـل مانـي بمـداح
ولا اشره على ذم الزمـان ومديحـه
وقت ٍ تغير وقلبـت فيـه الاريـاح
وعامـت مراكيـب الجهالـه بريحـه
تبي تفارق صاحبك وانـت مرتـاح
لا شفته اخطاء عاتبـه فـي نصيحـه