مفارقة العلاقات المؤذية ومعرفة قيمة أنفسنا، بيعتمد -بشكل أساسي- على قانون الفرز والاستبعاد:
ده يناسبني وهيفضل في حياتي، وده وحش ما يناسبنيش، أو ده كويس والله، بس مش لوني، موجته مش متوافقة مع موجتي، مش مولّفين مع بعض.

واللي بيخلي القانون ده يشتغل بفاعلية وفي صالحك تماما: التوقيت، امتى نفرز وننحاز أو نستبعد.

من الطبيعي الناس تبقى حواليك وإنت ناجح أو مشهور أو بتخدمهم..لكن شوف مين هيبقى في ضهرك وإنت تعبان أو مفلّس أو مش لاقي شغل أو خايف أو مخذول أو مكتئب أو مش عايز تخرج من سريرك أو مجروح أو عايز تنزل تجري في الشارع نص الليل أو بتتصرف غلط أو رايح تتخانق أو بتفكر تنتحر..

اعمل لستة وحط كل واحد في مكانه ورتبته اللي يستحقها، واديله درجة من واحد لعشرة، وما تعاملش الصديق على إنه حبيب ولا الحبيب على إنه صديق، ولا اللي يستاهل على إنه ما يستاهلش ولا اللي ما يستاهلش على إنه يستاهل..

احسم الاختلاف بالاختبارات والمواقف واكشف الغموض وفك الالتباس في أشكال العلاقات وما تخضعش للابتزاز العاطفي والصعبانيات والألوان البراقة والصوت العالي، لأن الرحلة شاقة ومتعبة وبعيدة.. ومش هيكمل فيها غير الصادقين.