2020 ,,
انا لا انتظر ، انا استحق

كانت سنه محملة بكل شيء سواء كان سعيد ام حزين ، جيد ام سيء ..
نظرتنا للامور ترسم لنا نهاية السنه هل احنا استمتعنا او لا ، هل انجزنا او لا ،،


من بداية السنه كنت متفائلة فيها و لا زلت حتى نهاية السنه مهما صار من احداث ،،
صار اسمي بين صديقاتي مرتبط بـ 2020 .. كل ما صار شي رجعو يسألوني اذا كنت لازلت عند كلامي
و كنت اجاوبهم و اكثر ،،

الاحداث اللي كانت تصير لي شخصياً كانت مبهرة ،، كل شي كنت افكر فيه و اخطط كان يصير ،،
حتى لو اشياء بسيطة مرره ،، اذكر من هذي الاشياء في بداية السنة كان اختباري للشهادة المهنيه ،،
في بداية السنه ما كان محدد التاريخ ،، لكن انا جذبته بطريقة تفكيري فيه ،،
اختباري كان يوم 30 يناير ،، يوم خميس ،، و انا من بداية الاسبوع كنت اجهز له و انا مو عارفة اصلاً متى تبدآ الاختبارات
كنت اول دفعة تختبر ،، يعني قبلها ب اسبوع كنت اجهز ، الخميس اتصلو علي قالوا اختبارك الخميس الجاي
قد ما كنت متحمسة كان فيه رهبة و فرحة بنفس الوقت ، كيف افكاري كانت تجذب شي انا اجهز له
انا كنت متجهزة قبلها ب اسبوع ،، و قبلها بيوم قلت لصديقاتي انا بجيب درجة فوق 85
و رحت اختبر و نجحت و درجتي كانت 86
صح الواحد يطمح بدرجه اعلى من كذا لكن انا كنت مبسوطة مرره لان قوة افكاري و تركيزي جاب نتيجة
طبعاً كل اللي قاعد يصير بتوفيق من الله ، و انا مؤمنه ان كل شي قاعد يصير لي بإرادة الله ،،

طبعاً اجمل شيء صار لي انتقالي لفرع جميل ، يستاهلني و استاهله ،،
و كانت مديرته من اعز صديقاتي ، و لكم انت تتخيلون قد ايش كانت الايام و الصباحات جميلة
متخيلين انك تبدأ يومك مع شخص تحبه و تعزه ، و سواليف و ايجابية الى بداية الدوام ،
بصراحة كانت ايام سعيدة مررره
نهاية الشهر الاول حدث لي موقف مرره حزين ،،لكن بفضل الله كانت الاحداث من حولي ما تخليني ازعل
و كنت اقول في نفسي هذي خيرة من الله ،، عشان انتبه و ارجع افوق ، و عشان سنتي تكون حلوة
حاولت اتناسى ، ابدأ اخلق اشياء جميلة في حياتي عشان افرح و ما يأثر علي الموقف بشكل سلبي
كنت بهذا التناسي الى هذي اللحظة ، و مخططة لـ 2021 التناسي يكون نسيان

شهر فبراير ، قررت اسوق و اخذ الرخصة ، ودفعت رسومها ،، لكن ما فيه مواعيد
و على مارس سجلت في دروس سباحه اخذت كلاسين و جات بعدها. كورونا و خربت علينا كل مخططاتنا

بس كانت الفضاوة حلوه صراحة ، و فتره بالنسبه لي جميله جداً ،، اول شي تعلمته في هذي الفتره هو الطبخ ،
عرفت اطبخ صح ، عرفت اسوي كوكيز و هي امنية حياتي اضبطه ،
تعرفت على نفسي اكثر ، بفتره الهدوء ، صحيح الاجواء حولك كلها خوف و قلق
و ابتعدنا عن اعز الناس لنا ، حتى العيد كان طعمه غير ، بس اهلي ،، مافي زيارات و لا شي
ناسبني كثير هذا الجو ، و صارت اجتماعاتنا اكثر في نفس البيت ، و كان نظامنا واحد ،
اجوائي كلها هدوء و تصالح مع النفس ،
من شهر ثمانية الى الان ، كانت النفسية شوي مضطربة نقلت مرتين ، و واجهت ناس توجههم عكس توجهتي تماماً
انا ما عندي مشكلة مع ذولا الناس ، لكن الاحتكاك فيهم يرهق روحي ، .. كملت معهم كأن شي لم يكن
اجواء المشاحنات و الكره ما تناسبني تماما ،، لكن لازم نتقبل و نتعايش مع الاوضاع ،
و فضلت اخذ اجازه هالوقت عشان اعيد توازن روحي ، اجلس مع نفسي شوي
ارتب افكاري و خططي ،

و هذي الايام اخذت الرخصه ، يوم 30\12\2020
كانت خاتمه جميلة لذي السنه ، صحيح اني تعثرت شوي ، و كان الكلام حولي لا تكملين ما تقدرين لكن كملت و ثابرت
و حسيت كل شي حولي مرتب لي بالدقه ، مرتب بشكل ما تتخيلونه ، تفاصيل صارت غريبة لكن في صالحي

سنه حبيتها بكل تفاصيلها ، سنه تقولنا ترا الله موجود ، و قادر على تغيير الاحوال ، قادر على خلق البهجه في عز الحزن
قادر على تغيير روتين حياتنا ، و برمجة نظامنا ،
كأن هذي السنه كانت رحمة من الله ، لطف من الله ،
سنه تخليك ترتب اولوياتك ، ترتب حياتك و اهدافك صح ، تعرف من لازم يجلس في حياتك و مين يطلع
و تخليك تعرف ان اللي يروح من يدك ما هو لك اصلا ، و اللي لك بيبقى لك لو في اصعب الظروف

احاول اصيغ مشاعري لكم بكلام واضح و سلس ، و ان شاءالله يوصل لقلوبكم ،

و نستقبل 2021 بكل الحب ، زي ما نعطيها حب و امل راح تعطينا اكثر ،
اول الاهداف هذي السنه : زيادة طاقة الحب في روحي و للناس و الاشياء اللي حولي ،
قد ما تعطي حب راح تاخذ حب ،،

الحب ، يلطف من روحك و الاجواء حولك ،، يخليك رقيق و لطيف و جميل
حب نفسك ، و حب اللي حولك ، حب الناس و العالم
حب كل الاشياء حولك ،

هذا كان مبدأي هالسنه و السنه الجايه و كل سنه بأذن الله



2021

لكي تبحر في النور ، عليك اولاً مقاومة الظلام