فيه اوقات كده في حياتك
هتعدي وانت عندك فكره مسيطره انك مش مستني حاجه من حد..
لو حظك حلو في الدنيا هيبقى عندك كام حد كده بره القاعده دي..
لو مش حلو! هتبقى حاسسها ناحية كل الناس..
يمكن وصلتلها بعد احباطات كتير..
جايز انت اللي توقعاتك من الناس مبالغ فيها..
جايز انت اللي شخص قادر تدي بزيادة.. فمحدش بيعرف يديك اد ما انت بتعرف تدي الناس..
جايز تكون مجرد فتره حالفك فيها حظ سئ.. او حصلك كام حاجه مش كويسه ورا بعض..
الفتره دي بتبقى فتره رخمه جدا...
يمكن لإننا بطبيعتنا محتاجين لبعض..
بس لو عايز تطلع منها بخساير اقل.. او لو عايز تتعلم فيها حاجه..
اتعلم تدي لنفسك كل اللي تقدر تديه..
بحيث ان اللي انت بتحتاجه من الناس اصلا يقل..
اتعلم تدي الناس على ادهم..
سواء بقا اخترت تديهم على اد ما هما يقدروا يدوك..
او تدي اللي ميأثرش عليك انت ولا يسحب منك..
او حتى قررت في النهايه انك تدي احسن ماعندك ومتتوقعش ان حد يقدر يديك نفس الحاجات..
المهم تبقى عارف انت بتعمل ايه.