بس انا بسمع كلام كتير اوي حوالين الحب غير المشروط والقبول غير المشروط
وبشوف ان سقف طموح الناس خاصة الجيل الصغير اللي عرف التعبيرات دي من بدري عالي اوي زيادة عن اللزوم.
وحيث ان العلاقات الإنسانيه في مصر ودول كتير
فكرت اطلع شوية افكار في دماغي كده حوالين الموضوع..
كل ما احاول اسمع او اقرا فيه بلاقي الآتي:
ملحوظة الآتي ديه وجهة نظر تحتمل الصواب والخطأ.. لكنها بتقلل كمية الاحباط اللي بتيجي من توقعات غير منطقية من الاخر..
الحب غير المشروط ده شئ فطري المفروض انه موجود من الأم والأب لأولادهم والعكس..
وبين الاهل عموما..
وعدم وجوده من ناحية الاب والام شئ غير طبيعي.. وينسب ليهم هما بس..
مفيش اب او ام بيكرهوا ولادهم بدون خلل واضح فيهم هما.
عدم وجوده من ناحية الأبناء بيبقى شئ مؤلم جدا جدا.. دايما بقف عند كمية الآذى والألم اللي تعرضلها طفل علشان يكره امه او ابوه..
دايما بقف عند كمية المجهود اللي محتاج يعمله علشان يتجاوز المرحلة دي.. ده لو عرف يتجاوزها..
مش هنكر ساعات بلاقي ولاد مشكلتهم في القدرة على تفهم اللي اتعمل من اهاليهم.. بس دول أقلية الحقيقه.. وفي الغالب بيبقى بالفعل وقع عليهم ضرر شديد.
ممكن نلاقي الحب الغير مشروط ده بين أصحاب العمر..
اللي عدي بينهم كتير اوي وثبت ليهم ان الحب ده مش مرتبط بمصالح ولا باتفاق او اختلاف على أشياء مهما كانت..
ودول لو عندك منهم يبقوا كنز حقيقي.
متستناش الحب غير المشروط من أصدقاء جدد..
مهما كان عمق العلاقة.. الزمن وحده هو القادر على ترسيخ الحب ده لحد ما تقدر توصفه انه حب غير مشروط..
بين ال couples بقا.. أصحاب مخطوبين متجوزين ايا كان المسمى الاجتماعي للعلاقة..
بينطبق ما ينطبق على الصداقه..
مش على الحب البيولوجي بين الأهل وبعض.
يعني ازرع هتجني..
وازرع في أرض صالحة للزراعة مش ارض بور..
وازرع محصول مناسب للارض اللي بتزرع فيها..
بمعنى..
متستناش حب غير مشروط من واحدة او من واحد وانتوا تعرفوا بعض من كام شهر.. او حتى من سنه او اتنين...
المواقف اللي بتقفوا فيها في ضهر بعض.. هي اللي بترفع مقام الحب ده يوم بعد يوم وسنه بعد سنه لحد ما يتحول بالمراعاة و المشاركة لحب غير مشروط..
مش هييجي من الاول... ومتطالبش طرف تاني بيه وانتوا لسه في أول الطريق..
وحيث ان البوست طول اوي..
هنخلي القبول الغير مشروط في بوست تاني
بس خليني اقول..
الحب غير المشروط يعني اني بحبك مهما كانت عيوبك بالنسبالي او خلافاتنا..
القبول الغير مشروط بالنسبالي اني قبلاك كشخص رغم اعتراضي على بعض عيوبك..
ومش شايفه بأي صورة من الصور ان قصة نقبل الناس القريبين مننا زي ما هما كده بدون الاعتراض على اي حاجه تخصهم ده شئ قابل للتطبيق او حتى شئ صحي للعلاقات الانسانيه.
للحديث بقية