اوقات بيبقى عندنا اعتقاد اننا عايزين حاجات بعينها كده.. وانها لو جاتلنا هنحافظ عليها بعنينا..
واننا هنعمل اللي ميتعملش علشانها..
ولكن للأسف اوقات كتير مبنعملش ده..
ورغم كل شئ.. بنسيبها تضيع..
متعرفش بقا هو احنا مش بنبقى مستعدين انها تيجي..
او بنبقى فاكرين اننا هنقدر نحافظ عليها ولا لا؟
ولا بنبقى فاكرين اننا فعلا هنعمل كتير علشان ده اللي احنا عايزينه.. وننسى او منقدرش؟
وقتها بتبقى واقف عايز تلوم الحياة والظروف والكوكب والمجره كلها على أن الحاجه دي راحت منك.. وانك معرفتش تحافظ عليها..
ولو انت حد عنده رؤيه كويسه هتعرف تخرج من الحته دي وتشوف ايه اللي فيك انت اللي خلاك معرفتش تحافظ على ده..
َساعتها بيبقى قدامك حل من الاتنين.. يا تقعد في دايرة ذنب وغم على دماغك كده.. يا تقوم تصلح اللي فيك وخلاك تخسر.. على الاقل علشان متخسرش تاني.
اما بالنسبه لكل الحاجات الحلوه في حياتنا ومعرفناش نحافظ عليها.. احنا بنفضل آسفين.. آسفين انها ضاعت.. آسفين لكل حد حلو معرفناش نحافظ عليه.. آسفين نيابة عننا وعن العالم.. آسفين على الوجع اللي سببناه.. وعلى بكره اللي حلمنا بيه ومكانش.. آسفين على الجرح اللي يمكن ميتعالجش..
لكل حد حلو فيه حد معرفش يحافظ عليه.. قوم داوي روحك وعيش.. محدش هيداوي اللي جواك غيرك انت وكام حد غاليين في حياتك هيقفوا جنبك لحد ما تنور تاني..
قوم بص على حياتك هتلاقي فيها ناس يهمهم انك تفضل.. يهمهم انك تكون بخير..